കൊല്ലം: കൊട്ടാരക്കര ഏരിയാ കമ്മിറ്റിയില് നിന്ന് ഒഴിവാക്കിയതിനെ തുടര്ന്ന് മുന് എം.എല്.എയും ഓള് ഇന്ത്യ ലോയേഴ്സ് യൂണിയന് സംസ്ഥാന ട്രഷററുമായ പി.അയിഷാ പോറ്റി സജീവ രാഷ്ട്രീയം വിടുന്നു. കുറെ നാളുകളായി പാര്ട്ടി പരിപാടികളില് നിന്ന് വിട്ടു നില്ക്കുകയായിരുന്നു. കഴിഞ്ഞ ലോക്സഭാ തെരഞ്ഞെടുപ്പില് കൊല്ലത്തുനിന്ന് അയിഷാ പോറ്റി മത്സരിക്കുമെന്നാണ് ആദ്യം പറഞ്ഞു കേട്ടത്. എന്നാല് എം. മുകേഷാണ് മത്സരിച്ചത്. തെരഞ്ഞെടുപ്പിനുശേഷം പാര്ട്ടി അവഗണന കാട്ടുന്നതായി പരാതിയും ഉയര്ന്നിരുന്നു.
മൂന്നു തവണ എം.എല്.എയായ അയിഷാ പോറ്റിയെ സ്പീക്കര്, വനിതാ കമ്മിഷന് അധ്യക്ഷ സ്ഥാനത്തേക്ക് പരിഗണിക്കുമെന്ന പ്രചാരണവും ഉണ്ടായിരുന്നു. പദവികളിലേക്കു പരിഗണിക്കാതിരുന്നതിനു പുറമെ മണ്ഡലത്തിലെ വികസന പ്രവര്ത്തനങ്ങളില് നിന്ന് ഒഴിവാക്കുകയും ചെയ്തിരുന്നു. ഏറെനാളായി നേതൃത്വവുമായി അകല്ച്ചയിലായിരുന്നു. പാര്ട്ടി പ്രവര്ത്തനങ്ങളില് സജീവമല്ലെന്നു കാട്ടിയാണ് കഴിഞ്ഞ ദിവസം സി.പി.എം. കൊട്ടാരക്കര ഏരിയാ കമ്മിറ്റിയില് നിന്നു അയിഷാ പോറ്റിയെ ഒഴിവാക്കിയത്.
കൊട്ടാരക്കരയിലെ ജനപ്രിയ നേതാവായിരുന്നു 66-വയസുകാരിയായ അയിഷാ പോറ്റി. ആരോഗ്യ പ്രശ്നങ്ങളെ തുടര്ന്നാണ് ഇങ്ങനെയൊരു തീരുമാനം എടുത്തതെന്ന് അയിഷാ പോറ്റി പറയുന്നു. ഒന്നും ചെയ്യാനാകാതെ പാര്ട്ടിയില് നില്ക്കാനാകില്ലെന്നും ഓടിനടന്നു രാഷ്ട്രീയ പ്രവര്ത്തനം നടത്താന് കഴിയുന്നവര് തുടരട്ടെയെന്നും അവര് പറഞ്ഞു. എം.എല്.എ. കാലാവധി കഴിഞ്ഞ ശേഷം പാര്ട്ടി കമ്മിറ്റികളില് നിന്നും പൊതു പരിപാടികളില് നിന്നും അയിഷ പോറ്റി ഒഴിഞ്ഞ് നില്ക്കുകയായിരുന്നുവെന്നാണ് ഏരിയ കമ്മിറ്റിയില് നിന്ന് ഒഴിവാക്കിയതിന് പാര്ട്ടി നേതൃത്വം നല്കുന്ന വിശദീകരണം.
