ന്യൂഡല്ഹി: സഭയില് കോണ്ഗ്രസ് ബഞ്ചില് നോട്ടുകെട്ട് കണ്ടെത്തിയതില് അന്വേഷണം പ്രഖ്യാപിച്ച് രാജ്യസഭാ ചെയര്മാന്. കോണ്ഗ്രസ് എംപി അഭിഷേക് മനു സിംഗ്വിക്ക് അനുവദിച്ച സീറ്റില് നിന്ന് ഇന്നലെ സഭ നിര്ത്തിവച്ചതിന് ശേഷം പരിശോധനയ്ക്കിടെ സുരക്ഷാ ഉദ്യോഗസ്ഥര് പണം കണ്ടെത്തി എന്ന് രാജ്യസഭാ അധ്യക്ഷന് കൂടിയായ വൈസ് പ്രസിഡന്റ് ജഗ്ദീപ് ധന്ഖര് എംപിമാരെ അറിയിക്കുകയായിരുന്നു.
തെലങ്കാന സംസ്ഥാനത്ത് നിന്ന് തിരഞ്ഞെടുക്കപ്പെട്ട അഭിഷേക് മനു സിംഗ്വിക്ക് ഇപ്പോള് അനുവദിച്ചിരിക്കുന്ന സീറ്റ് നമ്പര് 222 ല് നിന്ന് സുരക്ഷാ ഉദ്യോഗസ്ഥര് ഒരു വലിയ കറന്സി നോട്ടുകള് കണ്ടെടുത്തെന്നും ഇക്കാര്യം അന്വേഷിച്ചുവരികയാണെന്നുമായിരുന്നു ധന്ഖര് പറഞ്ഞത്. ഇതോടെ രാജ്യസഭയില് വലിയ ബഹളം ഉണ്ടാകുകയും പിന്നാലെ അദ്ധ്യക്ഷന് അന്വേഷണം പ്രഖ്യാപിക്കുകയുമായിരുന്നു.
അതേസമയം സഭയില് എത്തുമ്പോള് തന്റെ കയ്യില് 500 രൂപ മാത്രമേ ഉണ്ടായിരുന്നുള്ളെന്നും ആരോപണം ആശ്ചര്യപ്പെടുത്തുന്നതായും അഭിഷേക് മനു സിംഗ്വി പ്രതികരിച്ചു. അന്വേഷണത്തോട് എതിര്പ്പില്ലെന്നും എന്നാല് അന്വേഷണം നടക്കുന്നതിനാല് അധ്യക്ഷന് എംപിയുടെ പേര് നല്കരുതെന്നും കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെ പറഞ്ഞു. ഞാന് ഉച്ചയ്ക്ക് 12:57 ന് വീട്ടിലെത്തി ഉച്ചയ്ക്ക് 1 മണിക്ക് വീട് വിട്ടു. തുടര്ന്ന് 1:30 വരെ കാന്റീനില് ഇരുന്നു, തുടര്ന്ന് ഞാന് പാര്ലിലേക്ക് പോയി സിംഗ്വി ഒരു ഓണ്ലൈന് പോസ്റ്റില് പറഞ്ഞു.
ഇന്നലെ സഭയില് 3 മിനിറ്റും കാന്റീനില് 30 മിനിറ്റും ചെലവഴിച്ചു, ഇത്തരം വിഷയങ്ങളില് രാഷ്ട്രീയം ചെയ്യുന്നത് വിചിത്രമാണെന്ന് അദ്ദേഹം പറഞ്ഞു. അതേസമയം വിഷയം ട്രഷറിയിലും പ്രതിപക്ഷ ബെഞ്ചിലും ബഹളമുണ്ടാക്കി. ബിജെപി അധ്യക്ഷനും കേന്ദ്രമന്ത്രിയും രാജ്യസഭാംഗവുമായ ജെപി നദ്ദ ഇത് രാജ്യസഭയുടെ കെട്ടുറപ്പിന് അപമാനകരമാണെന്ന് വിശേഷിപ്പിച്ചു.
