തിരുവനന്തപുരം: ഹേമ കമ്മിറ്റി റിപ്പോര്ട്ടിലെ രഹസ്യവിവരങ്ങള് പുറത്തുവിടുന്നതുമായി ബന്ധപ്പെട്ട വിധി പറയല് വിവരാവകാശ കമ്മീഷന് നീട്ടിവെച്ചു. റിപ്പോര്ട്ടിലെ കടുവെട്ട് സംബന്ധിച്ച് വിവരങ്ങള് പുറത്തുവിടുന്നതിന് എതിരെ പരാതി ലഭിച്ചിട്ടുണ്ട് എന്നാണ് കമ്മീഷന് പുറത്തുവിട്ട വിവരം. പരാതി നല്കിയത് ആരാണെന്നോ പരാതി എന്താണെന്നോ സംബന്ധിച്ച് ഔദ്യോഗിക വിശദീകരണം ഉണ്ടായിട്ടില്ല.
ഹേമ കമ്മിറ്റി റിപ്പോര്ട്ടിലെ കൂടുതല് പേജുകള് പുറത്തു വിട്ടേക്കുമെന്നും ഇക്കാര്യത്തില് ഇന്ന് 11 മണിക്ക് വിവരാവകാശ കമ്മീഷണര് ഡോ. അബ്ദുല് ഹക്കീം ഉത്തരവ് പുറത്തുവിടുമെന്നായിരുന്നു അറിയിച്ചിരുന്നത്. റിപ്പോര്ട്ടിലെ 97 മുതല് 107 വരെയുള്ള ഖണ്ഡികകള് പൂഴ്ത്തിവെച്ചതിനെതിരേ അനേകം പൊതുതാല്പ്പര്യ ഹര്ജികളാണ് കോടതിക്ക് മുന്നില് ഉണ്ടായിരുന്നത്.
ഈ ഭാഗങ്ങള് പുറത്തുവിടുമെന്നായിരുന്നു അറിയിപ്പ്. ഹേമ കമ്മിറ്റി റിപ്പോര്ട്ട് പുറത്തുവിടുന്നതിന് അവസാന നിമിഷമാണ് അഞ്ചു പേജുകള് ഒഴിവാക്കിയത്. കടുംവെട്ടില് സാംസ്കാരിക വകുപ്പിന്റെ വാദങ്ങള് കമ്മീഷന് തള്ളിയിരുന്നു. പരാതിയില് കഴമ്പുണ്ടെന്നും കണ്ടെത്തിയിരുന്നു.
