റിസര്വ് ബാങ്ക് ഓഫ് ഇന്ത്യയുടെ പുതിയ ഗവര്ണറായി റവന്യൂ സെക്രട്ടറി സഞ്ജയ് മല്ഹോത്രയെ കേന്ദ്ര സര്ക്കാര് നിയമിച്ചു. മല്ഹോത്ര എത്തുന്നത് ഡിസംബര് 10ന് കാലാവധി അവസാനിക്കുന്ന ശക്തികാന്ത ദാസിന്റെ പകരക്കാരനായാണ്.
1990 ബാച്ച് രാജസ്ഥാന് കേഡറിലെ ഇന്ത്യന് അഡ്മിനിസ്ട്രേറ്റീവ് സര്വീസ് ഓഫീസറാണ് സഞ്ജയ് മല്ഹോത്ര. കാണ്പൂരിലെ ഇന്ത്യന് ഇന്സ്റ്റിറ്റ്യൂട്ട് ഓഫ് ടെക്നോളജിയില് നിന്ന് കമ്പ്യൂട്ടര് സയന്സില് എഞ്ചിനീയറിംഗ് ബിരുദധാരിയായ അദ്ദേഹം യുഎസിലെ പ്രിന്സ്റ്റണ് സര്വകലാശാലയില് നിന്ന് പബ്ലിക് പോളിസിയില് ബിരുദാനന്തര ബിരുദവും നേടിയിട്ടുണ്ട്.
33 വര്ഷത്തിലേറെ നീണ്ട തന്റെ കരിയറിലെ നേതൃപാടവവും മികവും കൊണ്ട് മല്ഹോത്ര വൈദ്യുതി, ധനകാര്യം, നികുതി, വിവരസാങ്കേതികവിദ്യ, ഖനികള് തുടങ്ങി വിവിധ മേഖലകളില് പ്രവര്ത്തിച്ചിട്ടുണ്ട്. നിലവില് ധനമന്ത്രാലയത്തില് സെക്രട്ടറി (റവന്യൂ) ആണ്. തന്റെ മുന് അസൈന്മെന്റില്, ഇന്ത്യാ ഗവണ്മെന്റിന്റെ ധനകാര്യ മന്ത്രാലയത്തിന് കീഴിലുള്ള ഫിനാന്ഷ്യല് സര്വീസസ് ഡിപ്പാര്ട്ട്മെന്റ് സെക്രട്ടറിയായി അദ്ദേഹം പ്രവര്ത്തിച്ചിട്ടുണ്ട്.
