പ്രശസ്ത നിര്മ്മാതാവും അഭിനേതാവുമായ സുരേഷ് കുമാറിന്റെയും അഭിനേത്രിയായിരുന്ന മേനക സുരേഷിന്റെയും മകള് എന്ന ലേബലിലാണ് കീര്ത്തി സുരേഷിനെ ആരാധകര് അറിഞ്ഞു തുടങ്ങിയത്. ബാലതാരമായി അഭിനയിച്ചു തുടങ്ങിയ താരം പിന്നീട് നായികയായി മലയാളത്തിലും തമിഴിലും തെലുങ്കിലും തിളങ്ങി. മികച്ച കഥാപാത്രങ്ങളിലൂടെ തന്റേതായൊരു ഇടം നേടാന് കീര്ത്തിക്ക് കഴിഞ്ഞിട്ടുണ്ട്.
കുറച്ചു നാളുകള്ക്ക് മുമ്പാണ് കീര്ത്തി വിവാഹിതയാകാന് ഒരുങ്ങുന്നു എന്ന വാര്ത്ത പുറത്തു വന്നത്. എന്നാല് ഇതില് കുടുംബമോ താരമോ സ്ഥീരികരണം നല്കിയിരുന്നില്ല. പക്ഷേ പിന്നീട് പ്രണയം പൂവണിയാന് പോകുന്നുവെന്ന വിവരം കീര്ത്തി സോഷ്യല് മീഡിയയിലൂടെ അറിയിച്ചു. അതോടെ വരന് ആരെന്ന് ആരാധകര് തിരഞ്ഞു തുടങ്ങി. എഞ്ചിനീയറായ ആന്റണി തട്ടിലാണ് വരന് എന്നും 15 വര്ഷമായി ഉള്ള പ്രണയമാണെന്നും താരം തന്നെ ആരാധകരെ അറിയിച്ചു.
ഇപ്പോഴിതാ തന്റെ വിവാഹച്ചടങ്ങുകളും ചിത്രങ്ങള് പങ്കിട്ടിരിക്കുകയാണ് കീര്ത്തി. സുരേഷ് കുമാറിന്റെ മടിയിലിരിക്കുന്ന കീര്ത്തിക്ക് ആന്റണി താലി ചാര്ത്തുന്നതും കീര്ത്തിയുടെ കണ്ണുകളില് സന്തോഷക്കണ്ണീര് നിറയുന്നതും ആന്റണി നെറുകയില് ഉമ്മ വയ്ക്കുന്നതുമായ ചിത്രങ്ങളാണ് താരം പങ്കുവച്ചിരിക്കുന്നത്. പരമ്പരാഗത രീതിയിൽ വധുവായി അണിഞ്ഞൊരുങ്ങിയാണ് കീർത്തി ചടങ്ങിനെത്തിയത്. മഞ്ഞയിൽ പച്ചബോർഡറുള്ള പട്ടുപുടവയാണ് കീർത്തി ധരിച്ചത്. ജിമിക്കി കമ്മലും ട്രഡീഷണൽ ടച്ചുള്ള ആഭരണങ്ങളും നെറ്റിച്ചുട്ടിയുമൊക്കെ അണിഞ്ഞ കീര്ത്തി ഒരു തമിഴ് വധു സ്റ്റൈലിലായിരുന്നു. ചടങ്ങുകളുടെ ചിത്രങ്ങള് ഫോട്ടോകള് സോഷ്യല് ലോകത്ത് വൈറലാകുകയാണ്.
ഗോവയിൽ വച്ചുനടന്ന വിവാഹ ചടങ്ങിൽ അടുത്ത ബന്ധുക്കളും സുഹൃത്തുക്കളും മാത്രമാണ് പങ്കെടുത്തത്. നടന് വിജയിയും കീര്ത്തിയുടെ വിവാഹത്തില് പങ്കെടുക്കാന് എത്തിയിരുന്നു. കൊച്ചി സ്വദേശിയാണ് ആന്റണി തട്ടില് ബിസിനസുകാരനാണ്. കൊച്ചിയിലും ദുബായിലും ബിസിനസുള്ള ആന്റണി, ആസ്പിരെസോ വിൻഡോസ് സൊലൂഷൻസിന്റെ മേധാവിയാണ്. ചെന്നൈയില് രജിസ്റ്റര് ചെയ്തിരിക്കുന്ന കമ്പനിയാണിത്. സിനിമ നിര്മാതാവും നടനുമായ ജി സുരേഷ് കുമാറിന്റെയും നടി മേനകയുടെയും രണ്ടാമത്തെ മകളാണ് കീര്ത്തി സുരേഷ്.
