ഒരു നീക്കം പിഴച്ചാല് ഒരു നോട്ടം തെറ്റിയാല് ശ്രദ്ധ ഒന്നു പതറിയാല് ഇതുവരെ ചെയ്തതെല്ലാം വൃഥാവില്. അതിന്റെ ആകാംക്ഷയും പ്രാര്ഥനകളും ചെസ് പ്രേമികള്ക്ക്. ലോക ചെസ് ചാമ്പ്യന്ഷിപ്പിന്റെ ഫൈനല് സിംഗപ്പുരിലായിരുന്നെങ്കിലും സമ്മര്ദം എല്ലാവരിലേക്കുമെത്തി.
തന്റെ കുതിരയെ ആദ്യനീക്കത്തില് കളത്തിലിറക്കിക്കൊണ്ടു റെട്ടി ഓപ്പണിങ്ങിലായിരുന്നു ഡിങ് ലിറേന് 14-ാം ഗെയിം. ആരംഭിച്ചത്. പിന്നീട് അത് കിങ്സ് ഇന്ത്യന് അറ്റാക്കിക്കിലേക്കു മാറി. ഒന്പതാമത്തെ നീക്കത്തില് തന്റെ റാണിയുടെ മുന്നിലെ ആളിനെ വെള്ളയുടെ ഭാഗത്തേക്ക് ഗുകേഷ് കളിച്ചപ്പോള് കിങ്സ് ഇന്ത്യന് അറ്റാക്കിലെ കറ്റാലന് സ്റ്റൈല് പോണ് പ്ലേ ആയി. ആദ്യ നീക്കങ്ങളില് പതിവ് ശൈലിയില് തന്നെ രണ്ടുപേരും നീങ്ങി. 13-ാം നീക്കത്തില് നീക്കത്തില് ഗുകേഷ് തന്റെ കുതിരയെ നീക്കിയതു സംശയകരമായ നീക്കമായി. അവിടെ 'ഇ 5' ആയിരുന്നു നല്ല നീക്കം. പിന്നീട് ഇരുവരും വലിയ പരിക്കുകള് പറ്റാതെ കരുക്കള് നീക്കി.
സമയത്തിന്റെ വലിയ ആനുകൂല്യം ഗുകേഷിനു എപ്പോഴുമുണ്ടായിരുന്നു. എപ്പോഴും അര മണിക്കൂറില് കൂടുതല് സമയാനുകൂല്യം ഗുകേഷിനു ഉണ്ടായിരുന്നു. 39 നീക്കം കഴിഞ്ഞപ്പോള് ഗുകേഷിനു 34 മിനിറ്റിന്റെ മുന്തൂക്കം. കരുനിലയില് വലിയ മാറ്റം ഇല്ലായിരുന്നു. 54-ാം നീക്കം ബോര്ഡില് കണ്ടപ്പോള് ഗുകേഷിന് ഒരു മണിക്കൂറോളം കൂടുതല് ഡിങ്ങിനെക്കാളുണ്ടായിരുന്നു. അതിന്റെ പ്രതിഫലനം എന്നോണം 55-ാം നീക്കത്തില് ലോകചാമ്പ്യന് ആന മണ്ടത്തരം കാണിച്ചു. എങ്ങനെയും സമനിലയിലാക്കാന് റൂക്കുകളെ (തേര്) പരസ്പരം വെട്ടി മാറ്റാന് ഡിങ് വച്ചുകൊടുത്തു. അത് ഈ ചാമ്പ്യന്ഷിപ്പിലെ ഏറ്റവും വലിയ ''ബ്ലണ്ടര്'' ആയി. ആ റൂക്ക് നീക്കത്തിന്റെ വില ലോക കിരീടം തന്നെയായിരുന്നു. അതുവരെ തുല്യതമായിരുന്ന കളിയില് ഡിങ് നടത്തിയ മോശം നീക്കം ഏറ്റവും പ്രായം കുറഞ്ഞ ലോക ചാമ്പ്യനെ സൃഷ്ടിക്കുന്നതായി. ഗുകേഷ് പുതിയ ലോക ചെസ് ചാമ്പ്യന്. ചരിത്രത്തിലെ ഏറ്റവും പ്രായം കുറഞ്ഞ ചാമ്പ്യന്. നിലവിലെ ലോക ചാമ്പ്യനാണെങ്കിലും ഡിങ് ലിറേന് ലോക റാങ്കിങ്ങില് 22-ാമനാണ്. ഗുകേഷ് ലോക റാങ്കിങ്ങില് അഞ്ചാമനും. ചാമ്പ്യന്ഷിപ്പിനെ ഏറ്റവും അവസാന ഗെയിം വരെ എത്തിക്കാനായെന്നതില് ഡിങ്ങിന് അഭിമാനിക്കാം.
''യഥാര്ത്ഥത്തില്, ഡിങ് ''എഫ്2'' കളിക്കുമ്പോള്, മനസിലായില്ല, മിക്കവാറും ''ബി3'' കളിക്കാന് പോകുകയാണെന്ന്, പക്ഷേ ഡിങിന്റെ ബിഷപ്പ് കുടുങ്ങിക്കിടക്കുന്നതായി കണ്ടു, 'കെഇ1' നു ശേഷം, എനിക്ക് 'കെഇ5' ഉം ജയിക്കുന്ന രാജാവിന്റെ സ്ഥാനവും ഉണ്ട്. അത് തിരിച്ചറിഞ്ഞപ്പോള്, ഒരുപക്ഷേ അത് ജീവിതത്തിലെ ഏറ്റവും മികച്ച നിമിഷമായി'' അവസാന നിമിഷത്തെപ്പറ്റി കളിക്കുശേഷം ഗുകേഷ് പറഞ്ഞു. ഗുകേഷിനെ സംബന്ധിച്ചിടത്തോളം ഈ ജയം തന്റെ ചിരകാല സ്വപ്നത്തിന്റെ പരിസമാപ്തിയായി. '' ഏഴാം വയസ് മുതല്, ഈ നിമിഷത്തിനായി ജീവിക്കുന്നു. ഓരോ ചെസ് കളിക്കാരനും ഈ നിമിഷം പരീക്ഷിക്കാന് ആഗ്രഹിക്കുന്നു, അവസരം ലഭിക്കുന്നില്ല. ഞാന് എന്റെ സ്വപ്നത്തില് ജീവിക്കുന്നു,'' പുത്തന് ലോക ചാമ്പ്യന് തുടര്ന്നു.
