പാലക്കാട്: പനയമ്പാടം അപകടത്തില് നാല് വിദ്യാര്ത്ഥികള് മരിച്ച സംഭവത്തില് റോഡ് നിര്മാണത്തില് പാളിച്ചയുണ്ടെന്ന പരാതി ശ്രദ്ധയില്പ്പെട്ടിട്ടുണ്ടെന്ന് ഗതാഗതമന്ത്രി കെ.ബി. ഗണേഷ്കുമാര്. പനയമ്പാടത്തെ കാര്യം തന്റെ ശ്രദ്ധയില് വന്നില്ല, വന്നിരുന്നുവെങ്കിലും അതില് ഇടപെടുമായിരുന്നുവെന്നും മന്ത്രി പറഞ്ഞു. നാളെ പാലക്കാട് സന്ദര്ശിക്കുന്നുണ്ടെന്നും മന്ത്രിമാരായ കൃഷ്ണന്കുട്ടി, മുഹമ്മദ് റിയാസ് എന്നിവരുമായി കൂടിയാലോചിച്ച് വിഷയത്തില് പരിഹാരം കാണാന് ശ്രമിക്കുമെന്നും പറഞ്ഞു.
ഇന്ന് വിശദമായ പരിശോധന നടത്തിയ ശേഷം അവിടത്തെ ഡിടിസിയും ആര്ടിഒയും റിപ്പോര്ട്ട് സമര്പ്പിക്കും. വിഷയം ആഴത്തില് പഠിച്ച് മാറ്റങ്ങള് വരുത്താന് ഉദ്യോഗസ്ഥരെ ഏര്പ്പെടുത്തുമെന്ന് മന്ത്രി പറഞ്ഞു. ബ്ലൈന്ഡ് സ്പോട്ടുകള് കണ്ടെത്തേണ്ട ചുമതല മോട്ടോര് വാഹന ഡിപ്പാര്ട്ട്മെന്റിനാണ്. ധാരാളം സ്ഥലങ്ങളില് ബ്ലൈന്ഡ് സ്പോട്ടുകളുണ്ട്. പിഡബ്ല്യൂഡിക്ക് മാത്രമേ ഇത് പണിയാന് സാധിക്കുകയുള്ളൂ. മോട്ടോര്വെഹിക്കിള് ഡിപ്പാര്ട്ട്മെന്റ് സമര്പ്പിക്കുന്ന റിപ്പോര്ട്ട് ലഭിച്ച ശേഷം മന്ത്രി മുഹമ്മദ് റിയാസുമായി സംസാരിക്കും.
ഒരു ലിസ്റ്റ് തരാന് പിഡബ്ല്യൂഡി ആവശ്യപ്പെടുമെന്നും മന്ത്രി പറഞ്ഞു. പ്രാദേശികമായ പ്രശ്നങ്ങളും പഞ്ചായത്ത് മെമ്പര്മാരുടെ അഭിപ്രായങ്ങളും കേട്ട ശേഷം വേണം റോഡ് ഡിസൈന് ചെയ്യാനെന്ന് മന്ത്രി അഭിപ്രായപ്പെട്ടു. റിയാസുമായി സംസാരിച്ചിട്ടുണ്ടെന്നും അടിയന്തിരമായി മീറ്റിങ് വിളിക്കാമെന്ന് പറഞ്ഞിട്ടുണ്ടെന്നും മന്ത്രി പറഞ്ഞു. ഹൈവെ പണിയാന് വരുന്നിടത്ത് എഞ്ചിനിയേഴ്സിന് വലിയ റോളില്ല. ഓരോ കമ്പനികളെ ഏല്പ്പിച്ചിരിക്കുകയാണ്. അവരുടെ കോണ്ട്രാക്ടര്മാരും അവരുടെ ഡിസൈനിങ്ങുമാണെന്നും പറഞ്ഞു.
