ന്യൂഡല്ഹി: കോണ്ഗ്രസുകാര് തന്റെ വാക്കുകള് വളച്ചൊടിച്ചെന്ന് ബിജെപി നേതാവും കേന്ദ്ര ആഭ്യന്തരമന്ത്രിയുമായ അമിത്ഷാ. കോണ്ഗ്രസ് ഭരണഘടനാ വിരോധികളും അംബേദ്ക്കര് വിരുദ്ധരും ആണെന്നും അനാവശ്യമായി നുണകള് പ്രചരിപ്പിക്കുകയാണെന്നും അമിത്ഷാ ആരോപിച്ചു. ഇന്നലെ രാത്രി പാര്ലമെന്റില് നടത്തിയ 'അംബേദ്കര് ഈസ് ദി ഫാഷന്' എന്ന അമിത്ഷായുടെ പ്രസംഗമാണ് പ്രതിഷേധത്തിന് കാരണമായിരിക്കുന്നത്. ഇപ്പോള് 'അംബേദ്ക്കര്' എന്ന പരാമര്ശം ഒരു ഫാഷനായി മാറിയിട്ടുണ്ടെന്നും അംബേദ്ക്കര്...അംബേദ്ക്കര് എന്ന് പല തവണ വിളിക്കുന്ന സ്ഥാനത്ത് ദൈവത്തെ വിളിച്ചാല് സ്വര്ഗ്ഗം പൂകാന് സഹായിക്കുമെന്നായിരുന്നു അമിത്ഷായുടെ പ്രസംഗം.
''രാജ്യസഭയില് ഞാന് നടത്തിയ അഭിപ്രായം അവര് (കോണ്ഗ്രസ്) വളച്ചൊടിച്ചു. മോദിജിയുടെ പ്രസംഗങ്ങളുടെ എഡിറ്റ് ചെയ്ത പതിപ്പാണ് അവര് ഉണ്ടാക്കിയത്. എന്റെ മുഴുവന് പ്രസ്താവനയും ജനങ്ങള്ക്ക് മുന്നില് വയ്ക്കാന് മാധ്യമങ്ങളോട് ഞാന് അഭ്യര്ത്ഥിക്കുന്നു... ഞാന് വരുന്നത് അംബേദ്ക്കര് ആദര്ശങ്ങള് പാലിക്കുന്ന ഒരു പാര്ട്ടിയില് നിന്നാണ്.''ഷാ മാധ്യമപ്രവര്ത്തകരോട് പറഞ്ഞു. ''കോണ്ഗ്രസ് സൈന്യത്തോടും സ്ത്രീകളോടും അനാദരവ് കാണിക്കുകയും, രാജ്യം തകര്ക്കുകയും വിദേശശക്തികള്ക്ക് നല്കുകയും ചെയ്തു. ഈ സത്യം വെളിപ്പെട്ടപ്പോള്... ഇന്നലെ അവര് വസ്തുതകള് വളച്ചൊടിച്ച് ജനങ്ങളെ തെറ്റിദ്ധരിപ്പിച്ചു. ഭരണഘടനയുടെ 75-ാം വാര്ഷികത്തോടനുബന്ധിച്ച് നടന്ന ചര്ച്ചയില്, അംബേദ്കറെ അനാദരിച്ചത് കോണ്ഗ്രസ് ആണെന്ന് തെളിയിക്കപ്പെട്ടു.'' രാജി ആഹ്വാനത്തിനെതിരെ പോരാടിക്കൊണ്ട് ഷാ പ്രഖ്യാപിച്ചു.
വിമര്ശന ശബ്ദങ്ങള്ക്ക് നേതൃത്വം നല്കിയ കോണ്ഗ്രസ് മേധാവി മല്ലികാര്ജുന് ഖാര്ഗെയുടെ പേര് എടുത്തുപറഞ്ഞ ഷാ തനിക്ക് രാജിവെക്കാന് ഉദ്ദേശ്യമില്ലെന്ന് പറഞ്ഞു. 'ഖാര്ഗെ എന്റെ രാജി ആവശ്യപ്പെടുന്നു. അത് അദ്ദേഹത്തെ സന്തോഷിപ്പിക്കുമെങ്കില് ഞാന് ചെയ്യും.. പക്ഷേ അത് അദ്ദേഹത്തിന്റെ പ്രശ്നങ്ങള് അവസാനിപ്പിക്കില്ല. 15 വര്ഷം അദ്ദേഹം പ്രതിപക്ഷത്ത് തന്നെ ഇരിക്കേണ്ടിവരുമെന്നും പറഞ്ഞു. 'എന്റെ രാജി അത് മാറ്റില്ല,'' തന്റെ പ്രസംഗത്തിന്റെ പതിപ്പുകള് എഡിറ്റ് ചെയ്തെന്ന് ആരോപിച്ച് കോണ്ഗ്രസിനെതിരായ ''പാര്ലമെന്റിനകത്തും പുറത്തും'' എല്ലാ നിയമ സാധ്യതകളും ബിജെപി പരിശോധിക്കുമെന്നും ഷാ പറഞ്ഞു.
