ഹിസാര്; ഉറങ്ങിക്കിടക്കുകയായിരുന്ന കുട്ടികള്ക്ക് മുകളിലേക്ക് ഇഷ്ടിക ചൂളയുടെ മതില് ഇടിഞ്ഞുവീണ് 4 പേര് മരിച്ചു.ഒരു കുട്ടിയ്ക്ക് ഗുരുതര പരിക്കേറ്റു. ഹരിയാനയിലെ ഹിസാറിലുള്ള ബുദാന ഗ്രാമത്തിലായിരുന്നു സംഭവം. മാതാപിതാക്കള് ജോലി ചെയ്യവെ ഉറങ്ങിക്കിടക്കുകയായിരുന്ന കുട്ടികളാണ് അപകടത്തില്പ്പെട്ടത്.
നിഷ (മൂന്ന് മാസം പ്രായം), സൂരജ് (9 വയസ്), നന്ദിനി (5 വയസ്), വിവേക് (9 വയസ്) എന്നിവരാണ് മരിച്ചത്. ഉത്തര്പ്രദേശ് സ്വദേശികളായ കുട്ടികളുടെ മാതാപിതാക്കള് ഇഷ്ടിക നിര്മാണ കേന്ദ്രത്തില് ജോലി ചെയ്യാനായി ഹിസാറില് എത്തിയതായിരുന്നു. രാത്രി ജോലികള് നടന്നു കൊണ്ടിരിക്കവെയാണ് അപകടമുണ്ടായത്. തൊഴിലാളികളില് കുറച്ച് പേരും കുട്ടികളും ചൂളയുടെ പുകക്കുഴലിന് അടുത്തുള്ള മതിലിന് താഴെ കിടന്നുറങ്ങുകയായിരുന്നു.
സൂരജും നന്ദിനിയും വിവേകും അപകട സ്ഥലത്തു വെച്ചു തന്നെ മരിച്ചു. ആശുപത്രിയിലേക്ക് കൊണ്ടുപോകവെയാണ് നിഷ മരിച്ചത്. അഞ്ച് വയസുകാരി ഗൗരിയെ ഗുരുതരമായ പരിക്കുകളോടെ ഹിസാര് സിവില് ആശുപത്രിയില് പ്രവേശിപ്പിച്ചിരിക്കുകയാണ്. കുട്ടി അപകട നില തരണം ചെയ്തിട്ടില്ല. മരിച്ച കുട്ടികളെല്ലാവരും ഉത്തര്പ്രദേശിലെ അംബേദ്കര് നഗര് ജില്ലയില് നിന്നുള്ളവരാണ്. സംഭവത്തില് ആരും ഇതുവരെ പരാതി നല്കിയിട്ടില്ലെന്നാണ് അധികൃതര് പറയുന്നത്.
