തൃശൂര്: അവിടെ മെത്രാന്മാരെ ആദരിക്കുമ്പോള് ഇവിടെ പൂല്ക്കൂട് തകര്ക്കുന്നെന്ന് ഓര്ത്തഡോക്സ് സഭ തൃശൂര് ഭദ്രാസന മെത്രാപ്പോലീത്ത യൂഹാനോന് മാര് മിലിത്തിയോസ്. പാലക്കാട് സ്കൂളില് ക്രിസ്മസ് കരോള് തടഞ്ഞ സംഭവത്തിലും, പുല്ക്കൂട് തകര്ത്ത സംഭവത്തിലും ഫേസ്ബുക്ക് പോസ്റ്റിലൂടെയായിരുന്നു പരിഹാസം.
''അവിടെ മെത്രാന്മാരെ ആദരിക്കുന്നു, പുല്ക്കൂട് വന്ദിക്കുന്നു. ഇവിടെ പുല്ക്കൂട് നശിപ്പിക്കുന്നു. ഇത്തരം ശൈലിക്ക് മലയാളത്തില് എന്തോ പറയുമല്ലോ..!'' പോസ്റ്റില് പറയുന്നു. കഴിഞ്ഞ ദിവസം ഡല്ഹിയില് കാത്തലിക് ബിഷപ് കോണ്ഫറന്സ് ഓഫ് ഇന്ത്യ സംഘടിപ്പിച്ച ക്രിസ്മസ് ആഘോത്തില് പ്രധാനമന്ത്രി നരേന്ദ്രമോദി പങ്കെടുത്തിരുന്നു. അതിനിടയിലാണ് പാലക്കാട് ചിറ്റൂര് നല്ലേപ്പിള്ളി ഗവ. യു.പി. സ്കൂളില് ക്രിസ്മസ് ആഘോഷത്തിനിടെ, വിശ്വഹിന്ദുപരിഷത്ത് ജില്ലാനേതാവടക്കം അധ്യാപകരെയും വിദ്യാര്ഥികളെയും ഭീഷണിപ്പെടുത്തിയ സംഭവവും ചിറ്റൂര് തത്തമംഗലം ചെന്താമര നഗര് ജി.യു.പി സ്കൂളില് ക്രിസ്മസ് ആഘോഷത്തിന്റെ ഭാഗമായി ഒരുക്കിയ പുല്ക്കൂടും ക്രിസ്മസ്ട്രീയും സാമൂഹിക വിരുദ്ധര് തകര്ത്ത സംഭവവവും ഉണ്ടായത്.
സ്കൂള് അധികൃതര് വിവരമറിയിച്ചതിനെ തുടര്ന്ന് ചിറ്റൂര് പോലീസ് സ്ഥലത്തെത്തി അന്വേഷണം ആരംഭിച്ചിരിക്കുകയാണ്. അന്വേഷിക്കാനായി പ്രത്യേക സംഘത്തെ രൂപീകരിക്കാന് തീരുമാനമെടുത്തിരിക്കുകയാണ്. എസ്.പി, ഡിവൈ.എസ്.പി, ഡോഗ് സ്ക്വാഡ്, വിരലടയാള വിദഗ്ധര് ഫൊറന്സിക് വിദഗ്ധര് തുടങ്ങിയവര് സ്കൂളിലെത്തി പരിശോധന നടത്തി. സംഭവത്തില് പ്രതിഷേധിച്ച് ഡി.വൈ.എഫ്.ഐയും യൂത്ത് കോണ്ഗ്രസും സൗഹൃദ ക്രിസ്മസ് കരോള് സംഘടിപ്പിച്ചു. സ്കൂളിനു മുന്നില് കേക്ക് മുറിച്ചു. കരോള് നടത്തി. സ്കൂളിന് മുന്നില്നിന്നും ആരംഭിച്ച കരോള് നല്ലേപ്പിള്ളി മാട്ടുമന്തയില് സമാപിച്ചു.
