'അസിം, ഇൗ കാറില് (ബി.എം.ഡബ്ല്യു.) യാത്ര ചെയ്യുന്നത് എനിക്ക് ഇഷ്ടമല്ല. എന്റെ കാര് മാരുതിയാണ്'. ആ വാക്കുകള് എസ്.പി.ജി. ഉദ്യോഗസ്ഥനായിരുന്ന അസിം അരുണ് ഞെട്ടി. ബി.എം.ഡബ്ല്യുവിന്റെ സുരക്ഷാ സംവിധാനത്തെക്കുറിച്ചു വിശദീകരിച്ചിട്ടും മാരുതി 800 നായി ഡോ. മന്മോഹന് സിങ് ഉറച്ചുനിന്നു.
ഇപ്പോള് ഉത്തര് പ്രദേശില് മന്ത്രിയാണ് അസിം അരുണ്. സാമൂഹിക മാധ്യമങ്ങളിലാണ് അദ്ദേഹം ഡോ. മന്മോഹന് സിങ്ങിനെക്കുറിച്ചുള്ള ഓര്മകള് പങ്കുവച്ചത്. സ്പെഷല് പ്രൊട്ടക്ഷന് ഗ്രൂപ്പ് (എസ്.പി.ജി) ഉദ്യോഗസ്ഥനെന്ന നിലയില് അസിം മൂന്ന് വര്ഷത്തോളം ഡോ. സിങ്ങിന്റെ സുരക്ഷയുടെ ചുമതല വഹിച്ചു. പ്രധാനമന്ത്രിയെന്ന നിലയില് ഒൗദ്യോഗിക ചുമതലകള്ക്കായി ബി.എം.ഡബ്ല്യു. ആക്സസ് കാറാണു ഡോ. മന്മോഹന് സിങ്ങിന് അനുവദിച്ചിരുന്നത്. പക്ഷേ, അദ്ദേഹത്തിന് ഇഷ്ടം തന്റെ മാരുതി കാറിനോടായിരുന്നു.
'എ.ഐ.ജി സി.പി.ടി എന്ന നിലയില്, പ്രധാനമന്ത്രിയുടെ നിഴല് പോലെ എല്ലായ്പ്പോഴും അദ്ദേഹത്തോടൊപ്പം നില്ക്കുക എന്നതായിരുന്നു എന്റെ ഉത്തരവാദിത്വം. ഒരു അംഗരക്ഷകന് മാത്രമേ അദ്ദേഹത്തോടൊപ്പം താമസിക്കാന് കഴിയൂവെങ്കില്, അത് ഞാനായിരിക്കണം'- അസിം അനുസ്മരിച്ചു. ഒരു മധ്യവര്ഗക്കാരനെന്ന നിലയിലാണ് അദ്ദേഹം സ്വയം കണ്ടത്. മാരുതി 800 ലെ യാത്രയാണ് അദ്ദേഹത്തിന് ഇഷ്ടം.
തന്റെ മധ്യവര്ഗ പശ്ചാത്തലവുമായുള്ള ബന്ധം ഡോ. സിങ് നിലനിര്ത്തിയത് ഇങ്ങനെയാണ്- അരുണിന്റെ കുറിച്ചു. ബി.എം.ഡബ്ല്യു പ്രധാനമന്ത്രിയുടെ സ്ഥാനത്തിന്റെ മഹത്വത്തെ പ്രതീകപ്പെടുത്തുമെങ്കിലും, അദ്ദേഹത്തിന്റെ ഹൃദയത്തില് അദ്ദേഹം മാരുതിയെ തന്റെ കാറായി കണ്ടു. ഡോ. സിങ്ങുമായി സവിശേഷമായ ഒരു ബന്ധമാണു തനിക്കുണ്ടായിരുന്നതെന്ന് അസിം അരുണ് അനുസ്മരിച്ചു.
