കട്ടപ്പന: ഇടുക്കിയില് സഹകരണ സൊസൈറ്റിക്ക് മുന്നില് ജീവനൊടുക്കിയ നിക്ഷേപകന് സാബു തോമസിന് മാനസീകപ്രശ്നം ഉണ്ടായിരുന്നോയെന്ന് പരിശോധിക്കണമെന്ന വിവാദപ്രസ്താവനയുമായി എംഎം മണി എംഎല്എ. ആത്മഹത്യയുടെ പാപഭാരം സിപിഎമ്മിന്റെ തലയില് കെട്ടിവെയ്ക്കാന് നോക്കേണ്ടെന്നും പറഞ്ഞു. എല്ഡിഎഫിന്റെ നയവിശദീകരണയോഗത്തിലായിരുന്നു പരാമര്ശം.
സാബുവിന് എന്തെങ്കിലും മാനസിക പ്രശ്നം ഉണ്ടായിരുന്നോയെന്നും ചികിത്സ ചെയ്തിരുന്നോ എന്നുമൊക്കെയുള്ള കാര്യങ്ങള് പരിശോധിക്കപ്പെടണം. എന്തുകൊണ്ട് ആത്മഹത്യ ചെയ്തുവെന്ന കാര്യം പരിശോധിക്കണം. സാമ്പത്തിക ഭദ്രതയുള്ള അദ്ദേഹത്തിന് ആത്മഹത്യ ചെയ്യേണ്ട കാര്യമില്ല. സാബുവിന് എന്തെങ്കിലും പ്രത്യേക മാനസികാവസ്ഥ ഉണ്ടോയെന്നും തങ്ങള്ക്കറിയില്ല. അതൊന്നും തങ്ങളെ ബാധിക്കുന്ന കാര്യമല്ലെന്നും വഴിയേ പോയ വയ്യാവേലി തങ്ങളുടെ തലയില് കെട്ടിവെക്കാന് ഒരുത്തനും ശ്രമിക്കേണ്ടെന്നും എംഎം മണി പറഞ്ഞു.
ഭാര്യയുടെ ചികിത്സയ്ക്കായി പണം പിന്വലിക്കാനെത്തിയതിന് പിന്നാലെ കട്ടപ്പന മുളപ്പാശ്ശേരിയില് സാബു റൂറല് ഡെവലപ്പ്മെന്റ് കോ-ഓപ്പറേറ്റീവ് സൊസൈറ്റിക്ക് മുന്പില് ജീവനൊടുക്കിയത് വിവാദമായിരുന്നു. സാബുവിന്റെ ആത്മഹത്യാകുറിപ്പും കണ്ടെത്തിയിരുന്നു.
നിക്ഷേപ തുക പിന്വലിക്കാന് എത്തിയപ്പോള് ബാങ്ക് ജീവനക്കാര് പണം നല്കാന് കൂട്ടാക്കാതെ പരിഹസിച്ചെന്നും പിടിച്ചുതള്ളുകയും അസഭ്യം പറയുകയും ചെയ്തുവെന്നും ആരോപിക്കുന്ന ആത്മഹത്യാകുറിപ്പ് കണ്ടെത്തിയിരുന്നു. തന്റെ സമ്പാദ്യം മുഴുവനും ബാങ്കില് നിക്ഷേപിച്ചിരുന്നെന്നും മരണത്തിന് ഉത്തരവാദി ബാങ്ക് ആണെന്നും കത്തില് ആരോപിച്ചിരുന്നു.
