കൊച്ചി: ഉമാ തോമസ് എം.എല്.എ. വീണു ഗുരുതരമായി പരുക്കേറ്റ സംഭവത്തില് കലൂര് സ്റ്റേഡിയത്തില് നടന്ന നൃത്ത പരിപാടിയുടെ സംഘാടകരായ മൃദംഗ വിഷന് ഉടമ നിഗോഷ് കുമാര് പാലാരിവട്ടം പോലീസ് സ്റ്റേഷനില് കീഴടങ്ങി.
അതേസമയം, നൃത്ത പരിപാടിയുടെ സാമ്പത്തിക ഇടപാടിനെക്കുറിച്ച് അനേ്വഷിക്കുന്നതിനിടെ നൃത്താവതരണത്തിനു നേതൃത്വം നല്കിയ നടി ദിവ്യ ഉണ്ണി അമേരിക്കയിലേക്കു പോയതു പോലീസിനു തിരിച്ചടിയായി. കേസിലെ പ്രതികളുടെ മൊഴിയെടുത്തശേഷം ആവശ്യമെങ്കില് നടി ദിവ്യ ഉണ്ണിയെ തിരികെവിളിക്കാനാണു പോലീസ് തീരുമാനം. കുറെ വര്ഷങ്ങളായി ദിവ്യ ഉണ്ണി അമേരിക്കയിലാണു സ്ഥിരതാമസം.
ചട്ടം ലംഘിച്ചു തട്ടിക്കൂട്ട് വേദി സ്റ്റേഡിയത്തില് നിര്മ്മിച്ച് അപകടമുണ്ടാക്കിയ സംഭവത്തില് മറ്റുവഴിയില്ലാതെയായതോടെയാണു സംഘാടകനായ നിഗോഷ് കുമാര് കീഴടങ്ങിയത്. കഴിഞ്ഞ ദിവസം ഹൈക്കോടതി ഇയാളോടു കീഴടങ്ങാന് നിര്ദ്ദേശിച്ചിരുന്നു. പരിപാടി നടത്തിപ്പിന്റെ മുഖ്യചുമതല നിഗോഷിനായിരുന്നുവെന്നാണു കഴിഞ്ഞ ദിവസം പോലീസ് അറസ്റ്റ് ചെയ്ത മൃദംഗ വിഷന് സി.ഇ.ഒ. മൊഴി നല്കിയത്.
നിര്മ്മാണത്തിലെ അപാകതയ്ക്കൊപ്പം സാമ്പത്തിക വഞ്ചനാക്കുറ്റവും ഇയാള്ക്കെതിരേ ചുമത്തും. പരിപാടിക്കു പണം നല്കി വഞ്ചിതരായെന്നു പറഞ്ഞ് കൂടുതല് ആളുകള് പോലീസിനെ സമീപിക്കുന്നുണ്ട്. മൃദംഗവിഷന്റെ സാമ്പത്തിക ഇടപാടുകള് പരിശോധിക്കും. ഇതിനായി പുതിയ കേസ് രജിസ്റ്റര് ചെയ്തു. പണമിടപാടുകള് ആദായ നികുതി വകുപ്പും പരിശോധിക്കുന്നുണ്ട്. സംഘാടകരായ മൃദംഗവിഷനുമായി സഹകരിച്ച മറ്റ് ഏജന്സികളുടെയും വ്യക്തികളുടെയും മൊഴിയെടുക്കും.
അപകടമുണ്ടായതില് സംഘാടകര്ക്കും വേദി നിര്മ്മിച്ച കരാറുകാര്ക്കും മാത്രമല്ല ജി.സി.ഡി.എയ്ക്കും വീഴ്ചയുണ്ടായോ എന്നു പോലീസ് പരിശോധിക്കുന്നുണ്ട്. അനുമതിയില്ലാതെ വേദി നിര്മ്മിച്ചതു ജി.സി.ഡി.എ. എന്ജിനിയറിങ് വിഭാഗത്തിന്റെ മൗനാനുവാദത്തോടെയാണോ എന്നും പോലീസ് പരിശോധിക്കുന്നുണ്ട്. ജി.സി.ഡി.എയുടെ നിബന്ധനകള് പാലിക്കാതിരുന്നിട്ടും ജി.സി.ഡി.എ. ഇടപെടാതിരുന്ന സാഹചര്യമാണ് അനേ്വഷിക്കുന്നത്.
