തിരുവനന്തപുരം: കൂടുതല് വ്യക്തത ആവശ്യപ്പെട്ട് എഡിജിപി എം ആര് അജിത് കുമാറിന് ക്ലീന്ചിറ്റ് നല്കി സമര്പ്പിച്ച റിപ്പോര്ട്ട് വിജിലന്സ് ഡയറക്ടര് മടക്കി. അജിത്കുമാറിനെതിരേ സാമ്പത്തീക ആരോപണങ്ങള് അടക്കം ഉയര്ന്ന സാഹചര്യവുമായി ബന്ധപ്പെട്ടാണ് റിപ്പോര്ട്ട് സമര്പ്പിച്ചത്. എന്നാല് ചില കാര്യങ്ങളില് റിപ്പോര്ട്ടില് വ്യക്തത കുറവുണ്ടെന്ന് ചൂണ്ടിക്കാട്ടിയായിരുന്നു വിജിലന്സ് ഡയറക്ടര് യോഗേഷ് ഗുപ്ത റിപ്പോര്ട്ട് തള്ളിയത്്. അനേകം ആരോപണം ഉയര്ന്നിട്ടും റിപ്പോര്ട്ടില് അജിത് കുമാറിന് ക്ലീന് ചിറ്റ് നല്കിയിരുന്നു.
പി വി അന്വര് എംഎല്എ ഉന്നയിച്ച ആരോപണങ്ങളിലാണ് എഡിജിപി എം ആര് അജിത്കുമാറിനെതിരെ അന്വേഷണം പ്രഖ്യാപിച്ചത്. റിപ്പോര്ട്ടിലെ വ്യക്തത കുറവുള്ള ഭാഗങ്ങളില് വിശദമായ അന്വേഷണം വേണമെന്നും വിജിലന്സ് ഡയറക്ടര് ആവശ്യപ്പെട്ടിട്ടുണ്ട്. കഴിഞ്ഞദിവസമായിരുന്നു എം ആര് അജിത് കുമാറിനെതിരെ അന്വേഷണം നടത്തിയ ഉദ്യോഗസ്ഥരുടെ റിപ്പോര്ട്ട് യോഗേഷ് ഗുപ്തയുടെ മേശപ്പുറത്തെത്തിയത്.
അജിത് കുമാര് ക്രിമിനല് പ്രവര്ത്തനങ്ങള് വഴി പണസമ്പാദനം നടത്തുന്നതായിട്ടായിരുന്നു പി.വി. അന്വര് എംഎല്എ ഉയര്ത്തിയ അതിശക്തമായ ആരോപണം. സ്വര്ണക്കടത്ത് സംഘത്തിന് സഹായം നല്കിയതുവഴി വലിയ രീതിയില് സാമ്പത്തിക സഹായം, ക്രമക്കേട് ഉണ്ടെന്ന ആരോപണം ഉയര്ന്ന ആഡംബര വീട് നിര്മ്മാണം, ഫ്ളാറ്റ് വാങ്ങി ഇരട്ടിവിലയ്ക്ക് മറിച്ചുവിറ്റു, എസ്പി ക്യാമ്പിലെ മരംകുറി തുടങ്ങിയവയായിരുന്നു എം ആര് അജിത് കുമാറിനെതിരെ പി വി അന്വര് ഉന്നയിച്ച ആരോപണങ്ങള്.
അജിത് കുമാറിനെതിരെ വിജിലന്സ് അന്വേഷണം പ്രഖ്യാപിച്ചത് മുഖ്യമന്ത്രിയായിരുന്നു. അജിത് കുമാറിന് ക്ലീന് ചിറ്റ് നല്കിയ ഉദ്യോഗസ്ഥര് അദ്ദേഹത്തിനെതിരേ ഉയര്ന്നിട്ടുള്ള സ്വര്ണക്കടത്ത് ആരോപണം തെറ്റെന്നാണ് റിപ്പോര്ട്ടില് പറഞ്ഞിട്ടുള്ളത്. വീട് നിര്മാണം സര്ക്കാരിനെ അറിയിച്ചിരുന്നു. ഫ്ളാറ്റ് വിറ്റതില് ക്രമക്കേടില്ല. മരംമുറിയില് അജിത് കുമാറിന് ഒരു പങ്കുമില്ലെന്നും റിപ്പോര്ട്ടില് വ്യക്തമാക്കിയിരുന്നു.
