പത്തനംതിട്ട: വിദ്യാര്ഥിനി തുടര്ച്ചയായ ലൈംഗിക പീഡനത്തിന് ഇരയായ സംഭവത്തില് കൂടുതല് കേസുകളെടുത്ത് പോലീസ്. പ്രത്യേക അന്വേഷണ സംഘത്തെയും നിയോഗിച്ചു. പത്തനംതിട്ട, ഇലവുംതിട്ട സ്റ്റേഷനുകളില് കൂടുതല് കേസുകള് രജിസ്റ്റര് ചെയ്തു. പത്തനംതിട്ടയില് ഇന്നലെ ഒരു കേസ് കൂടി രജിസ്റ്റര് ചെയ്തു. ഒരു പ്രതി പിടിയിലായി, ലിജോ (26) ആണ് അറസ്റ്റിലായത്. ഇതോടെ പത്തനംതിട്ട പോലീസ് രജിസ്റ്റര് ചെയ്ത ആകെ 7 കേസുകളിലായി 21 പ്രതികള് പിടിയിലായിട്ടുണ്ട്, ഇതില് 4 പേര് കുട്ടികളാണ്.
ഇലവുംതിട്ടയില് ഒമ്പത് എഫ്.ഐ.ആറാണു രജിസ്റ്റര് ചെയ്തത്. ആരെയും അറസ്റ്റ് ചെയ്തിട്ടില്ല. ഇലവുംതിട്ടയില് ആകെ 6 പേരും അറസ്റ്റിലായി. പീഡനസംഭവങ്ങളില് ഇരു സ്റ്റേഷനുകളിലുമായി ഇതുവരെ 27 പ്രതികളാണ് അറസ്റ്റിലായത്. കഴിഞ്ഞവര്ഷം പ്ലസ് ടൂവിന് പഠിക്കുമ്പോള് ഇന്സ്റ്റാഗ്രാം വഴി പരിചയപ്പെട്ട ദീപുവും അയാളുടെ സുഹൃത്തുക്കളും ചേര്ന്നു പീഡിപ്പിച്ചതായി പെണ്കുട്ടി മൊഴി നല്കിയിട്ടുണ്ട്. ഇതുപ്രകാരം പത്തനംതിട്ട പോലീസ് ഇന്നലെ രജിസ്റ്റര് ചെയ്ത കേസില് കഴിഞ്ഞ ദിവസം ആറു പേര് റാന്നിയില്നിന്നും പിടിയിലായിരുന്നു. നേരില് കാണാന് ആഗ്രഹം പ്രകടിപ്പിച്ച കുട്ടിയെ ദീപു വിളിച്ചുവരുത്തി കാറില് രണ്ട് കൂട്ടുകാര്ക്കൊപ്പം കയറ്റിക്കൊണ്ടു പോകുകയായിരുന്നു. മൂവരും തുടര്ന്ന് ഓട്ടോറിക്ഷയില് എത്തിയ മറ്റ് മൂന്നുപ്രതികളും പീഡിപ്പിച്ചു.
അടുത്ത കേസില് നാല് പ്രതികളുണ്ട്, പത്തനംതിട്ട ജനറല് ആശുപത്രിയില് വച്ചാണ് ഇവര് കൂട്ട ബലാല്സംഗത്തിനിരയാക്കിയത്. 2024 ജനുവരിയിലൊരു ദിവസമാണ് പീഡനം നടന്നത്. പത്തനംതിട്ട സ്വകാര്യ ബസ് സ്റ്റാന്ഡില്നിന്നും കാറില് കടത്തിക്കൊണ്ടു പോയി തോട്ടുപുറത്തെ പൂട്ടിയിട്ട കടയുടെ സമീപത്ത് കാറില് വച്ച് രണ്ടുപേര് പീഡിപ്പിച്ചതായി വിദ്യാര്ഥിനി വെളിപ്പെടുത്തിയതു പ്രകാരം എടുത്ത കേസ് ആണ് അടുത്തത്. ലൈംഗികമായി പീഡിപ്പിച്ചശേഷം ഇവര് വീടിനരികില് ഇറക്കി വിട്ടതായും പറയുന്നു.
കഴിഞ്ഞവര്ഷം ജൂലൈയിലാണ് സംഭവം. പത്തനംതിട്ട സ്വകാര്യ ബസ് സ്റ്റാന്ഡ് കേന്ദ്രീകരിച്ചാണ് പ്രതികളില് പലരെയും പരിചയപ്പെട്ടതും, കുട്ടിയെ പലയിടങ്ങളിലേക്കും വാഹനങ്ങളില് കൊണ്ടുപോയി പീഡനത്തിനു വിധേയയാക്കിയതെന്നും അന്വേഷണത്തില് വ്യക്തമായിട്ടുണ്ട്.
സംഭവത്തില് വിശദമായ അന്വേഷണത്തിന് പ്രത്യേകസംഘത്തെ നിയമിച്ചു. ജില്ലാ പോലീസ് മേധാവി വി.ജി. വിനോദ് കുമാറിന്റെ മേല്നോട്ടത്തില് പത്തനംതിട്ട ഡിവൈ.എസ്.പി: എസ്. നന്ദകുമാര് അന്വേഷണത്തിന് നേതൃത്വം നല്കും. പോലീസ് ഇന്സ്പെക്ടര്മാരായ ഡി. ഷിബുകുമാര്(പത്തനംതിട്ട), ടി.കെ. വിനോദ് കൃഷ്ണന്(ഇലവുംതിട്ട), ജിബു ജോണ് (റാന്നി), വനിതാ പോലീസ് സ്റ്റേഷന് എസ്.ഐ: കെ.ആര്. ഷെമിമോള് ഉള്പ്പെടെ വിവിധ പോലീസ് സ്റ്റേഷനുകളിലെ വ്യത്യസ്ത റാങ്കുകളില്പ്പെട്ട 25 പോലീസ് ഉദ്യോഗസ്ഥര് അടങ്ങുന്നതാണ് പ്രത്യേകഅന്വേഷണസംഘം. അന്വേഷണപുരോഗതി ദിവസവും ജില്ലാ പോലീസ് മേധാവി നേരിട്ട് വിലയിരുത്തും.
ശാസ്ത്രീയ തെളിവുകള് അടക്കം പോലീസ് ശേഖരിച്ചുവരികയാണ്. മൊബൈല് ഫോണുകളും മറ്റും പരിശോധിച്ച് വിശദമായ അന്വേഷണം തുടരുകയാണെന്ന് ജില്ലാ പോലീസ് മേധാവി അറിയിച്ചു. സംഭവം സമൂഹ മനഃസാക്ഷിയെ ഞെട്ടിക്കുന്നതാണെന്ന് പ്രതിപക്ഷ നേതാവ് വി.ഡി. സതീശന്. ഈ കേസില് ഉള്പ്പെട്ട ഒരു കുറ്റവാളിയെയും രക്ഷപ്പെടാന് അനുവദിക്കാത്ത തരത്തിലുള്ള അന്വേഷണവും പഴുതടച്ചുള്ള തെളിവ് ശേഖരണവുമാണ് വേണ്ടത്. ഇതിനായി വനിതാ ഐ.പി.എസ്. ഉദ്യോഗസ്ഥയുടെ നേതൃത്വത്തിലുള്ള പ്രത്യേക അന്വേഷണ സംഘത്തെ അടിയന്തരമായി നിയമിക്കാന് സര്ക്കാര് തയാറാകണമെന്നും അദ്ദേഹം ആവശ്യപ്പെട്ടു.
