കോഴിക്കോട് : ഇന്നു സത്യപ്രതിജ്ഞ ചെയ്ത് അധികാരമേല്ക്കുന്ന യു.ഡി.എഫ്. സര്ക്കാര് നേരിടാന് പോകുന്ന ആദ്യ വെല്ലുവിളി പി.എം. ശ്രീ (പ്രധാന് മന്ത്രി സ്കൂള്സ് ഫോര് റൈസിങ് ഇന്ത്യ)പദ്ധതി. പദ്ധതിയില് ഒപ്പുവയ്ക്കുന്നതില് യു.ഡി.എഫ്. സര്ക്കാരിന്റെ നിലപാട് എന്താണെന്ന് ഇപ്പോഴും വ്യക്തമല്ല. വി.ഡി. സതീശന് മന്ത്രിസഭയില് മുസ്ലിം ലീഗിലെ എന്. ഷംസുദ്ദീനായിരിക്കും വിദ്യാഭ്യാസമന്ത്രി.
ഈ വിഷയത്തില് ഇടതു മുന്നണിക്കുള്ളിലെ അഭിപ്രായവ്യത്യാസങ്ങള് പുറത്തുവന്നപ്പോള് മുന് എല്.ഡി.എഫ്. സര്ക്കാര് മുഖം രക്ഷിക്കാന് പാടുപെടുകയായിരുന്നു. തുടക്കത്തില് ഈ പദ്ധതിയെ ശക്തമായി എതിര്ത്ത സംസ്ഥാന സര്ക്കാര്, പിന്നീട് സമഗ്രശിക്ഷാ അഭിയാന് ഫണ്ട് കേന്ദ്രം തടഞ്ഞുവച്ചതിനെത്തുടര്ന്ന് പദ്ധതിയില് ഒപ്പുവയ്ക്കുകയുണ്ടായി. ശേഷിക്കുന്ന ഫണ്ടുകള് നേടാനുള്ള ഒരേയൊരു മാര്ഗമാണിതെന്ന് സി.പി.എം. അന്ന് അവകാശപ്പെട്ടിരുന്നു. സംസ്ഥാനത്തിനുള്ള ഏകദേശം 1,100 കോടി രൂപ സമഗ്ര ശിക്ഷ ഫണ്ട് 2023 മുതല് കേന്ദ്രം തടഞ്ഞുവച്ചെന്നാണ് പറഞ്ഞിരുന്നത്. യു.ഡി.എഫ്. സര്ക്കാരും ഇതേ സമ്മര്ദം നേരിടാന് സാധ്യതയുണ്ട്.
ദേശീയ വിദ്യാഭ്യാസ നയത്തോടുള്ള പ്രത്യയശാസ്ത്രപരമായ എതിര്പ്പിന്റെ പേരില് പദ്ധതി മൂന്ന് വര്ഷത്തേക്ക് നിരസിച്ച എല്.ഡി.എഫ്. സര്ക്കാര് കഴിഞ്ഞ വര്ഷം ഒക്ടോബറിലാണ് കരാറില് ഒപ്പുവച്ചത്. തടഞ്ഞുവയ്ക്കപ്പെട്ട ഫണ്ടുകള് ലഭ്യമാക്കുന്നതിനായി മുഖ്യമന്ത്രി പിണറായി വിജയന്റെ നേതൃത്വത്തിലുള്ള സര്ക്കാര് പി.എം ശ്രീ പദ്ധതിയുമായി സഹകരിക്കാന് തീരുമാനിക്കുകയായിരുന്നു. വിദ്യാഭ്യാസ മന്ത്രി വി. ശിവന്കുട്ടിയാണ് ഈ തീരുമാനം ഔദ്യോഗികമായി വിശദീകരിച്ചത്. കുട്ടികള്ക്ക് അര്ഹതപ്പെട്ട ഫണ്ടുകള് നഷ്ടപ്പെടാന് അനുവദിക്കില്ലെന്ന്് അദ്ദേഹം വ്യക്തമാക്കിയിരുന്നു. ഇതുമായി ബന്ധപ്പെട്ട് ഇടതുമുന്നണിയില് സി.പി.ഐ- സി.പി.എം തര്ക്കങ്ങള് ഉടലെടുത്തിരുന്നു. പദ്ധതിയില് ഒപ്പുവയ്ക്കാനുള്ള തീരുമാനത്തെ സി.പി.ഐ. എതിര്ത്തിരുന്നു.
സമഗ്ര ശിക്ഷാ ജീവനക്കാര്ക്ക് ശമ്പളം നല്കുന്നത് പോലും ഫണ്ടിന്റെ അഭാവം മൂലം ബുദ്ധിമുട്ടായി മാറുന്നതിനാല്, വരും മാസങ്ങളില് യു.ഡി.എഫിന് പ്രതിസന്ധിയുണ്ടാവാന് സാധ്യതയേറെയാണ്. പ്രധാന വകുപ്പുകളില് ഒന്നായ വിദ്യാഭ്യാസ വകുപ്പില് പുതിയ സര്ക്കാര് നിരവധി വെല്ലുവിളികള് നേരിടേണ്ടിവരും. വിവിധ കേന്ദ്ര ഫണ്ടുകള് മുതല് പ്ലസ് വണ് പ്രവേശനം വരെ, ഇവയില് പലതിനും ഭരണപരമായ അനുമതിയേക്കാള് സര്ക്കാരിന്റെ നയപരമായ തീരുമാനങ്ങള് ആവശ്യമാണ്.
സംസ്ഥാനത്ത് നടപ്പിലാക്കണമെന്ന് കേന്ദ്ര സര്ക്കാര് സംസ്ഥാനത്തിന് വീണ്ടും കത്തെഴുതുന്നതോടെ, പുതിയ സര്ക്കാര് പദ്ധതിയില് ഉടന് തീരുമാനമെടുക്കേണ്ടിവരും. പശ്ചിമ ബംഗാളില് ബി.ജെ.പി. സര്ക്കാര് അധികാരത്തിലേറിയതിനാല് പി.എം. ശ്രീ പദ്ധതി നടപ്പിലാക്കുന്നതിനുള്ള കരാറില് ഉടന് ഒപ്പുവയ്ക്കും.
