കൊച്ചി: സാമൂഹികമാധ്യമങ്ങളിലൂടെ അപകീര്ത്തിപ്പെടുത്തിയെന്ന നടി ഹണി റോസിന്റെ പരാതിയില് അറസ്റ്റ് സാധ്യത മുന്നില്കണ്ട് രാഹുല് ഈശ്വര്. കോടതിയില് മുന്കൂര് ജാമ്യാപേക്ഷ നല്കി. ഹര്ജി ഇന്നു പരിഗണിക്കും. കേസെടുക്കുന്നതില് പോലീസ് നിയമോപദേശം തേടിയ വേളയിലാണു ഹൈക്കോടതിയില് രാഹുല് ഈശ്വര് മുന്കൂര് ജാമ്യാപേക്ഷ നല്കിയത്. സാമൂഹികമാധ്യമങ്ങളിലൂടെ അപകീര്ത്തി പ്പെടുത്തിയതിനാണു രാഹുല് ഈശ്വറിനെതിരേ ഹണി റോസ് എറണാകുളം സെന്ട്രല് പോലീസില് പരാതി നല്കിയത്.
സൈബര് ഇടങ്ങളില് തനിക്കെതിരേ രാഹുല് ഈശ്വര് സംഘടിത ആക്രമണം നടത്തുന്നുവെന്നാണ് ആരോപണം. ഹണി റോസിന്റെ പരാതിയില് ഇതുവരെയും കേസെടുത്തിട്ടില്ല. നിയമോപദേശം ലഭിച്ച ശേഷം മാത്രമാകും നടപടി. ബോബി ചെമ്മണൂരിന്റെ അറസ്റ്റിനു പിന്നാലെയാണു നടി ഹണി റോസിനെ വിമര്ശിച്ചു രാഹുല് ഇൗശ്വര് രംഗത്തെത്തിയത്. നടിയുടെ വസ്ത്രധാരണത്തെയടക്കം വിമര്ശിച്ചിരുന്നു.
ഇതിനു ചുവടുപിടിച്ചു സാമൂഹികമാധ്യമങ്ങളില് ഹണി റോസിനെതിരേ വ്യാപക പ്രചാരണവുമുണ്ടായി. ഇതു ചൂണ്ടിക്കാട്ടിയാണു സിറ്റി പോലീസിനെ സമീപിച്ചത്. രാഹുല് ഇൗശ്വറിന്റെ നേതൃത്യത്തില് സംഘടിത സൈബര് ആക്രമണമാണെന്നും നടപടി വേണമെന്നുമാണ് ആവശ്യം.
പൊതുബോധം തനിക്കെതിരാക്കാനാണു ശ്രമം. വലിയ ഗൂഢാലോചന ഇതിന്റെ ഭാഗമായുണ്ട്. ഇക്കാര്യങ്ങളെല്ലാം പരിശോധിക്കണമെന്നാണ് ആവശ്യം. രാഹുലുമായി ബന്ധപ്പെട്ട് ഫെയ്സ്ബുക്ക് പോസ്റ്റുകളുടെയടക്കം പകര്പ്പുകളും പരാതിയുടെ ഭാഗമാക്കിയിട്ടുണ്ട്.
കൊച്ചി: ചെറിയ കാര്യത്തിനും പുരുഷന്മാരെ കേസില് കുടുക്കി അപമാനിക്കാനുള്ള നിലപാടുകളെ ശക്തമായി നേരിടുമെന്ന് രാഹുല് ഇൗശ്വര്.
'ഹണി റോസ് അത് ഉറപ്പിച്ചോളൂ.. ഹണി റോസും ഞാനും ബോച്ചേയുമൊക്കെ പൊതുമണ്ഡലത്തില് നില്ക്കുന്നവരാണ്. മുഖ്യമന്ത്രി നേരിട്ടു ഫോണ് വിളിക്കുന്നയാളാണു ഹണി റോസ്. കേരളത്തിലെ 99 ശതമാനം മാധ്യമങ്ങളും, പോലീസുകാരും പിന്തുണക്കുമ്പോളും തനിക്ക് ഏകാന്തതയാണെന്നെന്നും അവര് പറയരുത്'. കേസിനെ അതിശക്തമായി നേരിടുമെന്നും രാഹൂല് ഈശ്വര് ഫേയ്സ് ബുക്കില് കുറിച്ചു.
ഹണി റോസിനെ അപമാനിക്കുന്ന തരത്തില് പരാമര്ശം നടത്തിയ രാഹുല് ഈശ്വര് ഹൈക്കോടതിയില് മുന്കൂര് ജാമ്യാപേക്ഷ നല്കിയതിനു പിന്നാലെയാണു ഫെയ്സ്ബുക്കില് വീഡിയോ സ്റ്റോറിയുമായി എത്തിയത്. ഹണി റോസിനെതിരേ ആസൂത്രിതമായ കുറ്റകൃത്യം നടന്നുവെന്നു പറയുന്നതു വെറുതേയാണെന്നും ഇന്ത്യയുടെ നിയമസംവിധാനത്തിലും ഹൈക്കോടതിയിലും വിശ്വാസമുണ്ടെന്നും അദ്ദേഹം പറഞ്ഞു.
'കൈയില് മാത്രമല്ല, മനസിലും ഗാന്ധിയെ പച്ചകുത്തിയവനാണു ഞാന്. അതുകൊണ്ടുതന്നെ ധര്മവും സംസ്കാരവും എന്നു നമ്മള് വിശ്വസിക്കുന്ന കാര്യത്തിനുവേണ്ടി ജയിലില് പോകാനും എനിക്കു മടിയില്ല. ഹണി റോസിനെതിരായ വിമര്ശനം പോസിറ്റീവായിരിക്കും. അവരെ വളഞ്ഞുകെട്ടി വിമര്ശിക്കില്ല. ശനിയാഴ്ച എന്റെ മകന്റെ ജന്മദിനം ആയിരുന്നു. മകന്റെ കൂട്ടുകാരൊക്കെ വീട്ടില് വന്നിരുന്നു. അവരുടെ മുന്നില്വച്ച് അറസ്റ്റ് അടക്കമുള്ള നീക്കങ്ങള് ഉണ്ടാകാം എന്നതുകൊണ്ട് ശനിയാഴ്ചതന്നെ തന്നെ നിയമപരമായി ഞാന് നീങ്ങിയിരുന്നു.
ഇന്ത്യയില് പ്രധാനമന്ത്രി നരേന്ദ്ര മോദിയെയും, മുഖ്യമന്ത്രി പിണറായി വിജയനേയും, രാഷ്ട്രപതിയെയും, സോണിയാ ഗാന്ധിയെയുമെല്ലാം വിമര്ശിക്കാം. ഹണി റോസിനെ മാത്രം വിമര്ശിക്കരുതെന്നു പറയുന്നതില് അര്ഥമില്ല'- രാഹൂല് ഫേയ്സ്ബുക്കില് കുറിച്ചു.
