2024 ലെ മറക്കാനാവാത്ത ഓര്മ്മകള് പങ്കുവെച്ച് നടി ഹിന ഖാന്. പോയവര്ഷത്തെ മറക്കാനാവാത്ത ചില നിമിഷങ്ങളടങ്ങിയ ചിത്രങ്ങളാണ് ഇന്സ്റ്റഗ്രാമിലൂടെ താരം പോസ്റ്റ് ചെയ്തത്. സ്തനാര്ബുദം സ്ഥിരീകരിച്ചതിനേക്കുറിച്ചും ചികിത്സാകാലയളവിലെ പുരോഗതിയെക്കുറിച്ചുമൊക്കെ നിരന്തരം പങ്കുവെക്കുന്ന ആള്കൂടിയാണ് ഹിന.
മെക്കയിലേക്കുളള തീര്ഥയാത്ര, ഷൂട്ടുകളില് നിന്നുളള നിമിഷങ്ങള്, കാമുകനും കുടുംബത്തിനുമൊപ്പമുളള യാത്രകള് തുടങ്ങിയവയാണ് ചിത്രത്തിലുളളത്. ഒപ്പം മനോഹരമായൊരു കുറിപ്പും ഹിന പങ്കുവെച്ചിട്ടുണ്ട്.
ആജീവനാന്ത അനുഭവങ്ങള്ക്ക് തുല്യമായ വര്ഷം എന്ന ആമുഖത്തോടെയാണ് ഹിനയുടെ കുറിപ്പ് ആരംഭിക്കുന്നത്. പോയവര്ഷം ഞെട്ടലുകള്, വേദന, കണ്ണുനീര്, ചെറുസന്തോഷങ്ങള്, മുറിപ്പാടുകള്, ആയിരക്കണക്കിന് സ്റ്റിച്ചുകള്, പ്രതീക്ഷ, പോസിറ്റിവിറ്റി, വിശ്വാസം, സന്തോഷം, ഒരുപാട് സ്നേഹം എന്നിവ നിറഞ്ഞതായിരുന്നു. അതെന്നെയും ക്ഷമയും സഹിഷ്ണുതയും അച്ചടക്കവും നിശ്ചയദാര്ഢ്യവും കൃതജ്ഞതയും പഠിപ്പിച്ചു. അഞ്ഞൂറ് ചിത്രങ്ങളിലൂടെപോലും അതെല്ലാം പ്രകടിപ്പിക്കാനാവില്ലെന്നും ഹിന കുറിച്ചു.
കഴിഞ്ഞ വര്ഷം ജൂണിലാണ് ഹിന ഖാന് സ്തനാര്ബുദം സ്ഥിരീകരിച്ചത്. രോഗം സ്ഥിരീകരിച്ചതിനേക്കുറിച്ചും ഷൂട്ടിങ്ങിനിടയില് കീമോ ചെയ്തതിനെക്കുറിച്ചുമൊക്കെ ഹിന സാമൂഹികമാധ്യമത്തിലൂടെ പങ്കുവെച്ചിട്ടുണ്ട്. മുടി താനേ കൊഴിയുന്നതിന് മുമ്പേ മുഴുവനായും മുറിച്ച് വിഗ് വച്ചതിനേക്കുറിച്ചും ഹിന പറഞ്ഞിരുന്നു.
