കൊച്ചി: ഇന്ന് ജയില്മോചിതനായ ബോബി ചെമ്മണ്ണൂരിനെ രൂക്ഷമായി വിമര്ശിച്ച് ഹൈക്കോടതി. കഥമെനയാന് നോക്കുകയാണോയെന്നും ഇപ്പോഴും അറസ്റ്റ് ചെയ്തു ജയിലിലിടാന് കഴിയുമെന്നും കോടതി പറഞ്ഞു. നാടകം കളിക്കരുതെന്നും വേണ്ടി വന്നാല് ജാമ്യം റദ്ദാക്കുമെന്നും നിയമത്തിന് മുകളിലാണെന്ന തോന്നലൊന്നും വേണ്ടെന്നും ബോബി ചെമ്മണ്ണൂരിനെ കോടതി താക്കീത് ചെയ്തു. ഇന്ന് ഉച്ചയ്ക്ക് 12 മണിയോടെ എന്തുകൊണ്ടു പുറത്തുവന്നില്ലെന്ന് വ്യക്തമാക്കണമെന്നും ജസ്റ്റീസ് പി.വി. കുഞ്ഞികൃഷ്ണന് ആവശ്യപ്പെട്ടു.
മറ്റു തടവുകാരുടെ വക്കാലത്ത് ബോബി എടുക്കേണ്ടെന്നും മുകളില് മറ്റാരും ഇല്ലെന്ന് വിചാരിക്കേണ്ടെന്നും പറഞ്ഞു. മാധ്യമശ്രദ്ധയ്ക്ക് വേണ്ടിയാണ് ഇതെല്ലാം ചെയ്യുന്നതെന്ന് അറിയാമെന്നും വേണ്ടി വന്നാല് ജാമ്യം റദ്ദാക്കി അറസ്റ്റ് ചെയ്യാന്' ഉത്തരവിടാന് കോടതിക്ക് അറിയാമെന്നും പറഞ്ഞു. ഇന്നലെ എന്തുകൊണ്ട്് പുറത്തിറങ്ങിയില്ലെന്ന് 12 മണിക്ക് അറിയിക്കണമെന്നും കോടതി ആവശ്യപ്പെട്ടിരിക്കുകയാണ്.
ഇന്ന് രാവിലെയാണ് ബോബി ചെമ്മണ്ണൂര് ജയിലില് നിന്നും പുറത്തുവന്നത്. ഇന്നലെ ജാമ്യം കിട്ടിയിട്ടും പുറത്തിറങ്ങാന് ബോബി ചെമ്മണ്ണൂര് കൂട്ടാക്കിയില്ല. ബോണ്ടില് ഒപ്പിടാന് വിസമ്മതിച്ച അദ്ദേഹം റിമാന്ഡ് കാലാവധി കഴിഞ്ഞിട്ടും സാങ്കേതികപ്രശ്നങ്ങളാല് പുറത്തിറങ്ങാന് പറ്റാത്ത ഒട്ടേറെ തടവുകാര് ജയിലിലുണ്ടെന്നും അവരോടുള്ള ഐക്യദാര്ഢ്യമാണിതെന്നും പറഞ്ഞിരുന്നു. ഈ സംഭവത്തിന് പിന്നാലെ ബോബി ചെമ്മണ്ണൂരിനെതിരേയുള്ള കേസ് വീണ്ടും കോടതി സ്വമേധയാ പരിഗണിക്കാന് നടപടിയെടുക്കുകയായിരുന്നു. ഇതറിഞ്ഞതോടെ ഇന്ന് രാവിലെ നടപടിക്രമങ്ങള് കേവലം പത്തുമിനിറ്റ് കൊണ്ടു പൂര്ത്തിയാക്കി ബോബി ചെമ്മണ്ണൂര് പുറത്തിറങ്ങുകയായിരുന്നു.
