ലോകം ആര്ട്ട്ഫീഷ്യല് ഇന്റലിജന്റ്സിന്റെ കാലത്തിലൂടെ കടന്നുപോകുമ്പോഴും ഇന്ത്യയില് ഹിന്ദു ആത്മീയതയുടെ ഏറ്റവും ഉയര്ന്ന നിലയായ കുംഭമേളയിലേക്കും പുണ്യസ്നാനം ചെയ്യാനും ലോകത്തുടനീളമുള്ള ഭക്തജനങ്ങളുടെ ഒഴുക്കാണ്. ലോകത്തിലെ ഏറ്റവും വലിയ മതപരവും ആത്മീയവുമായ പരിപാടിയില് ഗംഗ, യമുന, പുരാണത്തിലെ സരസ്വതി നദി എന്നിവയുടെ സംഗമസ്ഥാനമായ സംഗമത്തില് പുണ്യസ്നാനം നടത്താന് വിദേശികള് ഉള്പ്പെടെ 40 കോടിയിലധികം ഭക്തര് എത്തുമെന്നാണ് പ്രതീക്ഷിക്കുന്നത്.
ഇവന്റുമായി ബന്ധപ്പെട്ട് അനേകം വീഡിയോകളാണ് സോഷ്യല്മീഡിയയില് എത്തിയിരിക്കുന്നത്. എന്നാല് അതില് ആധിപത്യം പുലര്ത്തിയിരിക്കുന്ന വീഡിയോകളില് ഒന്നില് എലോണ് മസ്ക്കും മെസ്സിയും വില്സ്മിത്തും വ്ളാഡിമര് പുടിനുമെല്ലാം സ്നാനം ചെയ്യുന്നത് എഐ ഇമേജില് ചെയ്ത വീഡിയോയാണ് കുതിക്കുന്നത്. എലോണ് മസ്ക്, ഡൊണാള്ഡ് ട്രംപ്, ലയണല് മെസ്സി, ക്രിസ്റ്റ്യാനോ റൊണാള്ഡോ, വില് സ്മിത്ത്, തുടങ്ങിയ പ്രമുഖര് കുംഭമേളയില് പങ്കെടുക്കുന്നതിന്റെയും മുങ്ങി നിവരുന്നതിന്റെയും ഒരു ആര്ട്ടിഫിഷ്യല് ഇന്റലിജന്സ് നിര്മ്മിത വീഡിയോ, ഏകദേശം ആറ് ദശലക്ഷം കാഴ്ചകളോടെ ട്രെന്ഡിംഗില് എത്തിയിരിക്കുകയാണ്.
പ്രധാനമന്ത്രി നരേന്ദ്ര മോദിയും ഇറ്റാലിയന് പ്രധാനമന്ത്രി ജോര്ജിയ മെലോണിയും വിശുദ്ധ സ്നാനമേറ്റുകൊണ്ടാണ് ആരംഭിക്കുന്നു. തുടര്ന്ന് മസ്ക്, സ്മിത്ത്, മെസ്സി, റൊണാള്ഡോ, ട്രംപ്, റിഷി സുനാക്, സെന്ഡയ, ടോം ഹോളണ്ട്, ജോണ് സീന, ജസ്റ്റിന് ട്രൂഡോ എന്നിവര് ചടങ്ങുകള് നടത്തുന്നത് വീഡിയോയില് കാണാം. ''മഹാകുംഭ് പ്രയാഗ്രാജിലെ സെലിബ്രിറ്റികള്'' എന്നാണ് വീഡിയോയിലെ അടിക്കുറിപ്പ്.
മൂന്ന് ലക്ഷത്തിലധികം ലൈക്കുകളാണ് ഇന്സ്റ്റഗ്രാമില് വീഡിയോയ്ക്ക് ലഭിച്ചത്. വീഡിയോയോട് പ്രതികരിച്ചുകൊണ്ട് ഒരു ഉപയോക്താവ് എഴുതി, ''ഇതൊരു മാസ്റ്റര്പീസ് ആണ്. വളരെ ഭംഗിയായി ചെയ്തു.'' മറ്റൊരു ഇന്സ്റ്റാഗ്രാം ഉപയോക്താവ് അഭിപ്രായപ്പെട്ടു, ''ഓസ്കാര് അവാര്ഡ് എഡിറ്റര്''. ''ഇത് എന്നെ എത്രമാത്രം സന്തോഷിപ്പിച്ചുവെന്ന് വിവരിക്കാന് വാക്കുകളില്ല,'' മൂന്നാമത്തെ ഉപയോക്താവ് പറഞ്ഞു.
കുംഭമേളയുടെ ആദ്യ നാല് ദിവസങ്ങളില് ആറ് കോടിയിലധികം ഭക്തരാണ് സംഗമത്തില് മുങ്ങിയത്. 45 ദിവസം നീണ്ടുനില്ക്കുന്ന ഉത്സവം അവസാനിക്കുമ്പോള് ഈ എണ്ണം 40 കോടി കവിയുമെന്നാണ് പ്രതീക്ഷിക്കുന്നത്. സംഗംഘട്ടിന് സമീപമുള്ള താപനില വ്യാഴാഴ്ച രാവിലെ ആറ് ഡിഗ്രി സെല്ഷ്യസായി കുറഞ്ഞെങ്കിലും അത് ഭക്തരെ പുണ്യസ്നാനത്തില് നിന്ന് പിന്തിരിപ്പിച്ചില്ല.
