മാധവനെയും സിമ്രനെയും കേന്ദ്ര കഥാപാത്രങ്ങളാക്കി 2002 ല് മണിരത്നം സംവിധാനം ചെയ്ത ചിത്രമാണ് കണ്ണത്തില് മുത്തമിട്ടാല്. എന്നാല് മാധവനെക്കാളും സിമ്രനെക്കാളും പ്രേക്ഷകര് ഇന്നും ഓര്ത്തിരിയ്ക്കുന്നത് അതില് അമുദം എന്ന കഥാപാത്രമായി എത്തിയ പെണ്കുട്ടിയെയാണ്. കണ്ണത്തില് മുത്തമിട്ടാല് എന്ന പാട്ട് ഇന്നും സോഷ്യല് മീഡിയ റീലുകളില് വൈറലാണ്, പക്ഷേ പിന്നീടെവിടെയും ഈ പെണ്കുട്ടിയെ ആരും കണ്ടിട്ടില്ല.
തമിഴ് നടന് പാര്ത്ഥിപന്റെയും നടി സീതയുടെയും മകളാണ് അമുദമായി എത്തിയ കീര്ത്തന. മൈ ബോസ് അടക്കമുള്ള മലയാള സിനിമകളിലൂടെ പ്രേക്ഷകര്ക്ക് ഏറെ പരിചിതയാണ് കീര്ത്തനയുടെ അമ്മ സീത. ഇപ്പോഴിതാ വര്ഷങ്ങള്ക്ക് ശേഷം കീര്ത്തനയുടെ ഒരു ഫോട്ടോ സോഷ്യല് മീഡിയയില് വൈറലാവുന്നു. മനോഹരമായ ഒരു അടിക്കുറിപ്പോടെ അച്ഛന് പാര്ത്ഥിപനാണ് മകളുടെ ഫോട്ടോ സോഷ്യല് മീഡിയയില് പങ്കുവച്ചത്.
കേക്ക് വച്ച ഒരു പ്ലേറ്റിന് മുന്നിലിരുന്ന കീര്ത്തനയും പാര്ത്ഥിപനും ചിരിച്ചുകൊണ്ട് സംസാരിക്കുന്നതാണ് ഫോട്ടോ. അതിന് പാര്ത്ഥിപന് നല്കിയിരിക്കുന്ന ക്യാപ്ഷന്, 'പ്ലേറ്റിലെ മധുരത്തെക്കാള്, നിന്റെ ചുണ്ടിലുള്ള ചിരി ഉള്ളില് നിന്നും വന്നാല് സ്വാദിഷ്ടവും സ്വര്ഗീയവുമാണ്' എന്നാണ് ക്യാപ്ഷന്. ഫോട്ടോയ്ക്ക് താഴെ സ്നേഹം അറിയിച്ച് നിരവധി കമന്റുകളുണ്ട്. അതിനിടയില് ഇദ്ദേഹത്തിന്റെ മകളാണോ ഇത് എന്ന് ചോദിച്ചുകൊണ്ടുള്ള കമന്റും കാണാം.
മണിരത്നത്തിന്റെ നിര്ബന്ധത്തെ തുടര്ന്നാണ് കീര്ത്തന കണ്ണത്തില് മുത്തമിട്ടാല് എന്ന ചിത്രത്തില് അഭിനയിച്ചത്. അതിന് ശേഷം അഭിനയത്തില് നിന്നും വിട്ടു നിന്ന നടി, വളര്ന്നതിന് ശേഷം സിനിമ പിന്നണിയില് പ്രവൃത്തിച്ചിട്ടുണ്ട്. മണിരത്നം സംവിധാനം ചെയ്ത ചെക്ക ചിവന്ത വാനം, കാട്ര് വളിയിടൈ തുടങ്ങിയ സിനിമകളുടെ അസിസ്റ്റന്റ് ഡയറക്ടറായിരുന്നു. ടീന്സ്, ഇരവിന് നിഴല്കള് എന്നീ സിനിമകള് നിര്മിയ്ക്കുകയും ചെയ്തിട്ടുണ്ട്.
2018 ല് ആണ് കീര്ത്തന വിവാഹിതയായത്. പ്രമുഖ ചിത്രസംയോജകന് ശ്രീകര് പ്രസാദിന്റെ മകനും സംവിധായകനുമായ അക്ഷയ് അക്കിനേനിയാണ് കീര്ത്തനയുടെ ഭര്ത്താവ്. കാര്ത്തിക് സുബ്ബരാജിന്റെ പിസ എന്ന ചിത്രം ഹിന്ദിയിലേക്ക് റീമേക്ക് ചെയ്തത് അക്ഷയ് അക്കിനേനിയാണ്.
