ചലച്ചിത്രതാരസംഘടനയായ ‘അമ്മ’യില് താരങ്ങളെല്ലാം ഒത്തുകൂടുന്ന ആഘോഷങ്ങള് എപ്പോഴും തരംഗമാകാറുണ്ട്. പല അസ്വാരസ്യങ്ങള് സംഘടനയ്ക്ക് പുറത്തുള്ളവര് പ്രകടിപ്പിക്കാറുണ്ടെങ്കിലും അമ്മയിലുള്ളവര് തമ്മില് സ്നേഹവും ബഹുമാനവുമൊക്കെ ഇപ്പോഴും നിലനില്ക്കുന്നുണ്ട്.
ഇപ്പോഴിതാ ‘അമ്മ’യില് റിപ്പബ്ലിക് ദിനം ആഘോഷിക്കുന്നതിന്റെ വീഡിയോയാണ് തരംഗമാകുന്നത്. സംഘടനയുടെ കൊച്ചി ഓഫിസിലായിരുന്നു ചടങ്ങുകള്. മമ്മൂട്ടിയാണ് ദേശീയ പതാക ഉയർത്തിയപ്പോള് ഒപ്പം മോഹന്ലാലും കേന്ദ്രമന്ത്രിയുമായ സുരേഷ് ഗോപിയും ഉണ്ടായിരുന്നു. നടൻ ശ്രീനിവാസനും പരിപാടിയുടെ ഭാഗമാകാൻ എത്തിയിരുന്നു. വലിയൊരു ഇടവേളയ്ക്ക് ശേഷം മഞ്ജുവാര്യരും അമ്മയുടെ ഔദ്യോഗിക പരിപാടിയില് സജീവമായി പങ്കെടുക്കാന് എത്തിയിരുന്നു.
സുരേഷ് കൃഷ്ണ, ബാബുരാജ്, രമേഷ് പിഷാരടി, ജോമോള്, പൊന്നമ്മ ബാബു, തെസ്നി ഖാൻ തുടങ്ങി നിരവധി താരങ്ങളും ചടങ്ങില് പങ്കെടുക്കാൻ എത്തി. സംഘടന നടപ്പാക്കുന്ന സഞ്ജീവനി ജീവൻരക്ഷാ പദ്ധതിയുടെ ഉദ്ഘാടനവും ചടങ്ങില് വച്ച് നടത്തി.
