പണത്തിന് വേണ്ടി എന്ത് തട്ടിപ്പും വെട്ടിപ്പും നടത്താന് ആളുകള് ഇന്ന് റെഡിയാണ്. ഓരോ ദിവസവും ഇത്തരം തട്ടിപ്പുകളുമായി ബന്ധപ്പെട്ട് ഒട്ടനവധി വാര്ത്തകളാണ് പുറത്തുവന്നുക്കൊണ്ടിരിക്കുന്നത്. ഇപ്പോഴിതാ വാത ചികിത്സയ്ക്ക് ഉത്തമം എന്ന പേരില് കടുവ മാത്രം വില്പന നടത്തിയ മൃഗശാല സൂക്ഷിപ്പുകാര്ക്കെതിരെ അന്വേഷണം നടക്കുന്ന വാര്ത്തയാണ് സമൂഹ മാധ്യമങ്ങളില് ശ്രദ്ധ നേടുന്നത്.
മൃഗശാലയില് സന്ദര്ശനം നടത്തിയ ഒരു വ്യക്തിയാണ് സമൂഹ മാധ്യമത്തിലൂടെ ഇത്തരത്തില് ഒരു ആരോപണം ഉന്നയിച്ചത്. സംഭവം നടന്നത് തെക്കുപടിഞ്ഞാറന് ചൈനയിലെ സിചുവാന് പ്രവിശ്യയിലെ യാന് യാന് ബിഫെങ്സിയ വന്യജീവി മൃഗശാലയിലാണ്. വാതരോഗത്തിന് കടുവ മൂത്രം ഉത്തമമാണെന്ന് അവകാശപ്പെട്ട് മൃഗശാലാ അധികൃതര് തന്നൊയാണ് സൈബീരിയന് കടുവകളില് നിന്ന് ശേഖരിച്ച മൂത്രം വില്പ്പന നടത്തിയത്. 50 യുവാന്, അതായത് 600 രൂപയോളം പണം ഈടാക്കിയായിരുന്നു ഈ വില്പന.
ഉളുക്ക്, പേശി വേദന തുടങ്ങിയ വാത രോഗാവസ്ഥകള്ക്ക് കടുവയുടെ മൂത്രം ഉത്തമമാണെന്ന് കുപ്പിക്ക് പുറത്ത് മൃഗശാല അധികൃതര് പരസ്യം ചെയ്ത് കൊണ്ടായിരുന്നു വില്പന. വൈറ്റ് വൈനില് കടുവ മൂത്രം കലര്ത്തി ഇഞ്ചി കഷ്ണങ്ങള് ഉപയോഗിച്ച് വേദനയുള്ള ഭാഗത്ത് പുരട്ടുന്നത് നല്ലതാണന്നും ഇവര് അവകാശപ്പെട്ടു. കൂടാതെ കടുവ മൂത്രം കുടിക്കാമെന്നും അങ്ങനെ ചെയ്യുമ്പോള് എന്തെങ്കിലും ശാരീരിക ബുദ്ധിമുട്ടുകള് അനുഭവപ്പെട്ടാല് ഉടന്തന്നെ വൈദ്യസഹായം തേടണമെന്നുമുള്ള മുന്നറിയിപ്പും ഒപ്പമുണ്ട്. മൃഗശാല ലോകോത്തര വിനോദസഞ്ചാര കേന്ദ്രമാണെന്നും ചൈനയിലെ പരിഷ്കൃത ടൂറിസത്തിന്റെ മാതൃകാ യൂണിറ്റാണെന്നുമാണ് ഓണ്ലൈന് അവകാശപ്പെടുന്നത്.
എന്നാല്, കടുവയുടെ മൂത്രം ഒരു പരമ്പരാഗത മരുന്നല്ലെന്നും തെളിയിക്കപ്പെട്ട ഔഷധ ഫലമൊന്നും അതിനില്ലെന്നും മധ്യ ചൈനയിലെ ഹുബെയ് പ്രൊവിന്ഷ്യല് പരമ്പരാഗത ചൈനീസ് മെഡിസിന് ഹോസ്പിറ്റലില് നിന്നുള്ള പേര് വെളിപ്പെടുത്താത്ത ഒരു ഫാര്മസിസ്റ്റ് വ്യക്തമാക്കിയതായാണ് സൗത്ത് ചൈന മോണിംഗ് പോസ്റ്റ് റിപ്പോര്ട്ട് ചെയ്യുന്നത്. തങ്ങള്ക്ക് കടുവയുടെ മൂത്രം വില്ക്കാനുള്ള ബിസിനസ് ലൈസന്സ് ഉണ്ടെന്നാണ് മൃഗശാല ജീവനക്കാര് അവകാശപ്പെടുന്നത്.
