ന്യൂഡല്ഹി: പാര്ലമെന്റിന്റെ സംയുക്ത സമ്മേളനത്തെ അഭിസംബോധനചെയ്തു രാഷ്ട്രപതി ദ്രൗപതി മുര്മു നടത്തി പ്രസംഗത്തെക്കുറിച്ചു കോണ്ഗ്രസ് മുന് അധ്യക്ഷ സോണിയാ ഗാന്ധി നടത്തിയ പരാമര്ശത്തെച്ചൊല്ലി വന് വിവാദം. രാഷ്ട്രപതി ഭവന് കടുത്ത അതൃപ്തി അറിയിച്ചു. പ്രധാനമന്ത്രി നരേന്ദ്ര മോദിയും ബി.ജെ.പി. നേതാക്കളും സോണിയയെ വിമര്ശിച്ചു രംഗത്തെത്തി.
' പ്രസംഗത്തിന്റെ അവസാനം രാഷ്ട്രപതി വല്ലാതെ തളര്ന്നിരുന്നു. അവര്ക്കു സംസാരിക്കാന് തന്നെ പ്രയാസമായി. പാവം' എന്നായിരുന്നു സോണിയ ഗാന്ധിയുടെ വിവാദപരാമര്ശം. 'രാജകുടുംബം' 'ഗോത്രവര്ഗ മകളെ' അപമാനിച്ചെന്നായിരുന്നു പ്രധാനമന്ത്രി മോദിയുടെ വിമര്ശനം. 'ദ്രൗപതി മുര്മു ജി വന്നത് ഒരു ആദിവാസി കുടുംബത്തില് നിന്നാണ്. അവരുടെ മാതൃഭാഷ ഹിന്ദിയല്ല, ഒഡിയയാണ്.
അവര് ഇന്ന് പാര്ലമെന്റിനെ അത്ഭുതകരമായി പ്രചോദിപ്പിച്ച് ഒരു പ്രസംഗം നടത്തി. എന്നാല് കോണ്ഗ്രസിന്റെ രാജകുടുംബം അവരെ അപമാനി ക്കാന് തുടങ്ങിയിരിക്കുന്നു. രാജകുടുംബത്തിലെ ഒരംഗം രാഷ്ട്രപതിയുടെ പ്രസംഗം വിരസമാണെന്നു പറഞ്ഞു. മറ്റൊരാള് ഒരു പടികൂടി കടന്ന് രാഷ്ട്രപതിയെ 'പാവ'മെന്നു വിളിച്ചു. രാജ്യത്തെ 10 കോടി ആദിവാസി സഹോദരീസഹോദരന്മാരെ അപമാനിക്കുന്നതാണ് പരാമര്ശം. രാജ്യത്തെ പാവപ്പെട്ടവരെയെല്ലാം അപമാനിക്കുന്നതാണ്. അവര് ആളുകളെ അവഹേളിക്കുന്നു, വിദേശരാജ്യങ്ങളില് ഇന്ത്യയെ അപകീര്ത്തിപ്പെടുത്തുന്നു, നഗരനക്സലുകളെക്കുറിച്ചു സംസാരിക്കുന്നു.' -മോദി പറഞ്ഞു.
സോണിയ ഗാന്ധിയുടെ 'പാവം സ്ത്രീ' പരാമര്ശം രാഷ്ട്രപതി ഭവന്റെ അന്തസിനു ഹാനികരവും അസ്വീകാര്യവുമാണെന്നു രാഷ്ട്രപതി ഭവന് പ്രതികരിച്ചു. 'പ്രസിഡന്റ് ഒരു ഘട്ടത്തിലും തളര്ന്നില്ല. വസ്തവത്തില്, സമൂഹത്തിലെ പാര്ശ്വവല്ക്കരിക്കപ്പെട്ടവര്ക്കും സ്ത്രീകള്ക്കും കര്ഷകര്ക്കും വേണ്ടി സംസാരിക്കുമ്പോള് രാഷ്ട്രപതി ഒരിക്കലും ക്ഷീണിതയാകില്ല. കോണ്ഗ്രസ് നേതാവിന്റെ പരാമര്ശം അംഗീകരിക്കാന് കഴിയില്ല. പ്രസ്താവന ഒഴിവാക്കേണ്ടതായിരുന്നു.' - രാഷ്ട്രപതി ഭവന് പ്രസ്താവനയില് വ്യക്തമാക്കി.
സോണിയ ഗാന്ധിയുടെ പ്രസ്താവനയെ പാര്ട്ടി ശക്തമായി അപലപിക്കുന്നതായി ബി.ജെ.പി. പ്രസിഡന്റ് ജെ.പി. നഡ്ഡ പറഞ്ഞു. 'കോണ്ഗ്രസിന്റെ ആദിവാസി വിരുദ്ധതയാണ് ഇത്തരം വാക്കുകളിലൂടെ പുറത്തുവരുന്നത്. രാഷ്ട്രപതി ഭവന്റെ അന്തസിനെ ഹനിക്കുന്നതാണ് പ്രമുഖ കോണ്ഗ്രസ് നേതാക്കളുടെ പ്രസ്താവന.'-നദ്ദ പറഞ്ഞു. അതേ സമയം, സോണിയ ഗാന്ധി രാഷ്ട്രപതിയെ അവഹേളിച്ചിട്ടില്ലെന്നും മാധ്യമങ്ങള് പ്രസ്താവന വളച്ചൊടിക്കുകയാണെന്നും മകളും കോണ്ഗ്രസ് നേതാവുമായ പ്രിയങ്കാ ഗാന്ധി വാധ്ര എം.പി. പറഞ്ഞു. 'എന്റെ അമ്മ 78 വയസുള്ള സ്ത്രീയാണ്. പ്രസിഡന്റ് ഇത്രയും നീണ്ട പ്രസംഗം വായിച്ചു. ക്ഷീണിതയായിരുന്നിരിക്കണം, പാവം എന്നു മാത്രമാണ് അവര് പറഞ്ഞത്. ഇന്ത്യന് പ്രസിഡന്റിനെ അവര് പൂര്ണമായി ബഹുമാനിക്കുന്നു.'- പ്രിയങ്കാ ഗാന്ധി പറഞ്ഞു.
