ബിഗ് സ്ക്രീനിലും ഓഫ് സ്ക്രീനിലും ആരാധകര് ഏറെയുള്ള താരദമ്പതിമാരാണ് ബിജു മേനോനും സംയുക്ത വര്മ്മയും. മലയാള സിനിമാപ്രേക്ഷകര്ക്ക് ഏറെയിഷ്ടമുള്ള താരജോഡികള് വ്യക്തിജീവിതത്തിലും ഒന്നായപ്പോള് ആരാധകരത് നിറഞ്ഞ ഹൃദയത്തോടെ സ്വീകരിച്ചു. വളരെ കുറച്ച് സിനിമകളില് മാത്രമേ അഭിനയിച്ചിട്ടുള്ളുവെങ്കിലും സംയുക്ത ഇന്നും പ്രേക്ഷകര്ക്ക് ഏറെയിഷ്ടമുള്ള നായികയാണ്. ബിജു മേനോനെ പ്രണയിച്ച് വിവാഹം ചെയ്തതോടെ സംയുക്ത അഭിനയമേഖല വിട്ടു.
മഴ, മേഘമല്ഹാര്, മധുര നൊമ്പരക്കാറ്റ് എന്നീ ചിത്രങ്ങളില് സംയുക്തയും ബിജു മേനോനും നായികനായകന്മാരായിരുന്നു. ഈ സിനിമാ സെറ്റുകളില് വെച്ചാണ് ഇരുവരും തമ്മിലുളള പ്രണയം മൊട്ടിട്ടത്. മധുരനൊമ്പരക്കാറ്റും മേഘമല്ഹാറും സംവിധാനം ചെയ്തത് കമലായിരുന്നു.
ഇപ്പോഴിതാ ഇരുവരുടേയും പ്രണയം കയ്യോടെ പൊക്കിയതിനെ തുറിച്ച് തുറന്ന് പറയുകയാണ് സംവിധായകന് കമല്. പ്രണയത്തെ കുറിച്ച് സംയുക്തയോ ബിജു മേനോനോ തന്നോട് പറഞ്ഞത് അല്ലെന്നും പക്ഷേ ഷൂട്ടിംഗിനിടെയുളള ഇരുവരുടേയും പെരുമാറ്റത്തിലൂടെ താനടക്കമുളളവര് അക്കാര്യം കണ്ട് പിടിക്കുകയായിരുന്നുവെന്ന് കമല് പറയുന്നു.
‘‘വളരെ പെട്ടെന്നാണ് സംയുക്തയും ബിജുവും തമ്മിലുളള പ്രണയം ഞങ്ങള് കണ്ട് പിടിച്ചത്. മധുരനൊമ്പരക്കാറ്റിലായിരുന്നു തുടക്കം. അത് കഴിഞ്ഞ് മേഘമല്ഹാറില് അഭിനയിക്കാന് വന്നപ്പോഴും അവര് നല്ല പ്രണയത്തിലായിരുന്നു. അത് ആ സിനിമയ്ക്കും ഗുണം ചെയ്തു. പ്രണയ സിനിമകള് കൂടുതല് ചെയ്തിട്ടുളളത് കൊണ്ട് അത്തരം കഥാപാത്രങ്ങള് അവരെ സ്വാധീനിക്കുന്നുണ്ടായിരിക്കാം. പ്രണയം കണ്ട് പിടിച്ചപ്പോള് ബിജു ചമ്മി. ബിജു ഒട്ടും പ്രതീക്ഷിച്ചിരുന്നില്ല.
മധുരനൊമ്പരക്കാറ്റില് ഇവര് ബസ്സില് പോകുന്ന ഒരു സീനുണ്ട്. ബിജു മേനോനും സംയുക്തയും ഒരുമിച്ച് ഇരിക്കുകയാണ്. ജൂനിയര് ആര്ട്ടിസ്റ്റുകള് ഒക്കെ ബസ്സില് നിന്ന് ഇറങ്ങി. ഇവര് ഇറങ്ങിയില്ല. ആദ്യത്തെ കുറച്ച് ഷോട്ടുകള് എടുത്ത ശേഷം ബസ് വരുന്നതിന്റെ കുറച്ച് ലോംഗ് ഷോട്ടുകള് എടുക്കാന് ക്യാമറാ മാന് സൂം ഒക്കെ സെറ്റ് ചെയ്ത് വെച്ചിരിക്കുകയാണ്.
അസിസ്റ്റന്റ് ഡയറക്ടര് ചെന്ന് പറഞ്ഞു, 10 മിനുറ്റാവും ഷോട്ട് റെഡിയാകാന് എന്ന്. അപ്പോള് ബിജു മേനോന് പറഞ്ഞു, കുഴപ്പമില്ല ഞങ്ങള് ഇവിടെ ഇരുന്നോളാം എന്ന്. അപ്പോള് തന്നെ ഞങ്ങള്ക്ക് സംശയം തോന്നി. നല്ല ചൂടുണ്ട്, അപ്പോള് ബസ്സില് തന്നെ ഇരിക്കേണ്ട കാര്യം ഇല്ല. ക്യാമറാമാന് പി സുകുമാര് സൂം ചെയ്ത് നോക്കിയപ്പോള് ഇവര് തമ്മിലുളള സംസാരം കണ്ട് തന്നെ വിളിച്ചിട്ട് പറഞ്ഞു, സര് ഒന്ന് ക്യാമറയിലൂടെ നോക്കിയേ എന്ന്.
അങ്ങനെ നോക്കിയപ്പോള് തന്നെ തോന്നി, അതൊരു സാധാരണ സംസാരമല്ല, ഇവര് തമ്മില് എന്തോ ഉണ്ട് എന്ന്. പക്ഷേ ഞങ്ങള് അപ്പോള് ഒന്നും പറഞ്ഞില്ല. രണ്ട് മൂന്ന് ദിവസം കഴിഞ്ഞപ്പോള് സിനിമയിലെ ക്ലൈമാക്സില് കാറ്റടിക്കുന്ന സീന് ഷൂട്ട് ചെയ്യുകയായിരുന്നു. സംയുക്തയ്ക്ക് ശ്വാസം മുട്ടലിന്റെ പ്രശ്നമുണ്ട്. പൊടി അടിച്ചിട്ട് സംയുക്തയ്ക്ക് ശ്വാസം കിട്ടാതെയായി. എല്ലാവരും പേടിച്ചു. സെറ്റിലുണ്ടായിരുന്ന ഒരു പയ്യന്റെ ഇന്ഹേലര് തല്ക്കാലും അടിച്ച് കൊടുത്തു. കുറച്ച് ശ്വാസം കിട്ടി. സംയുക്തയുടെ അമ്മ വന്ന് ആശുപത്രിയില് കൊണ്ട് പോയി.
സംയുക്ത ഇല്ലാത്തത് കൊണ്ട് 4 മണിയോടെ ഷൂട്ട് നിര്ത്തി. ഞങ്ങള് ഹോട്ടലിലേക്ക് പോയി. ബിജു ഒരു അര മണിക്കൂര് മുന്പേ പോയിരുന്നു. ഞാനും സുകുമാറും പോകുന്ന വഴിക്ക് സംയുക്തയെ കണ്ടിട്ട് പോകാമെന്ന് കരുതി ചെന്നു. കോളിംഗ് ബെല് അടിച്ചപ്പോള് വാതില് തുറന്നത് ബിജു മേനോന്. ചമ്മേണ്ട ഒരു കാര്യവും ഇല്ല. കാരണം ബിജുവിന് സംയുക്തയെ ചെന്ന് കാണാം, ഒരു കുഴപ്പവും ഇല്ല. പക്ഷേ ബിജു ആകെ ചമ്മി മുഖമൊക്കെ മാറി. അങ്ങനെയാണ് ഞങ്ങള് പിടിച്ചത്. സംയുക്തയ്ക്ക് വയ്യാത്തത് കൊണ്ട് വന്ന് കണ്ടെന്നേ ഉളളൂ എന്നൊക്കെ ബിജു ന്യായീകരിക്കാന് നോക്കി. സുകു പറഞ്ഞു ഞങ്ങള്ക്ക് ഇത് കുറച്ച് ദിവസമായി അറിയാം, ഇനി ആരോടും പറയാനൊന്നും പോകുന്നില്ല എന്ന്. പക്ഷേ ബാക്കി എല്ലാവരും കുറേശ്ശെയായി കണ്ട് പിടിച്ചു...’’ കമല് പറഞ്ഞു.
തന്റെ സിനിമാ സെറ്റുകളില് മൊട്ടിട്ട പ്രണയങ്ങളെ കുറിച്ചുളള ചോദ്യത്തിന് മറുപടി നല്കി സംസാരിച്ചപ്പോഴാണ് കമല് ഇത് പറഞ്ഞത്. ദിലീപ്- മഞ്ജു വാര്യര്, പാര്വ്വതി-ജയറാം, ബിജു മേനോന്- സംയുക്ത വര്മ്മ പോലുളള പ്രണയങ്ങള് തുടങ്ങിയത് കമലിന്റെ സിനിമാ സെറ്റുകളില് നിന്നായിരുന്നു.
മഞ്ജുവാര്യരും ദിലീപും തമ്മിലുണ്ടായ പ്രണയത്തെക്കുറിച്ചും കമല് പറയുന്നുണ്ട്. ഈ പുഴയും കടന്ന് എന്ന കമല് ചിത്രത്തില് ഇരുവരും നായികാ-നായകന്മാരായി അഭിനയിച്ചിരുന്നു. ഈ ചിത്രത്തിന്റെ ഷൂട്ടിനിടെയാണ് ഇരുവരും പ്രണയത്തിലാകുന്നത്. മഞ്ജു വാര്യരും ദിലീപും തമ്മിലുണ്ടായ പ്രണയം തന്നെ ഞെട്ടിച്ചിരുന്നുവെന്നാണ് കമല് പറയുന്നത്.
‘‘പ്രണയിക്കുന്ന കാര്യം ഇവരാരും തന്നെ തന്നോട് വന്ന് പറഞ്ഞതായിരുന്നില്ല, മറിച്ച് ഞാനടക്കമുളളവര് കണ്ട് പിടിക്കുകയായിരുന്നു ചെയ്യാറുളളത്. ഞാനോ സെറ്റിലുളള ക്യാമറാമാനോ മറ്റുളളവരോ ഇത് കണ്ട് പിടിക്കും. ഞങ്ങള് കുറച്ച് ദിവസം മിണ്ടാതെയിരിക്കും. ഇത് എവിടെ വരെ പോലും എന്ന് നോക്കാന്. ഒരു ഘട്ടം എത്തിക്കഴിയുമ്പോള് ഇവരോട് ചോദിക്കും. എന്നെ ഞെട്ടിച്ചത് ദിലീപും മഞ്ജുവും ആയിരുന്നു. അവര് പ്രണയത്തിലാകുമെന്ന് ഞാന് വിചാരിച്ചിരുന്നില്ല. ഇവര് തമ്മില് അടുപ്പമുണ്ടെന്ന് കുറേക്കഴിഞ്ഞിട്ടാണ് ഞാന് അറിയുന്നത്...’’ കമല് പറയുന്നു.
മലയാള സിനിമാ ലോകത്തെ ഞെട്ടിച്ച പ്രണയമായിരുന്നു മഞ്ജു വാര്യരും ദിലീപും തമ്മിലുളളത്. സല്ലാപം എന്ന ചിത്രത്തിലാണ് ഇരുവരും ആദ്യമായി ഒരുമിച്ച് അഭിനയിച്ചത്. പിന്നീട് ഈ പുഴയും കടന്ന്, കുടമാറ്റം, തൂവല്ക്കൊട്ടാരം എന്നീ ചിത്രങ്ങളിലും ദിലീപും മഞ്ജുവും ഒരുമിച്ച് അഭിനയിച്ചു. വളരെ പെട്ടെന്ന് ഇരുവരും പ്രക്ഷകരുടെ ഇഷ്ടജോഡികളായി മാറി. നാല് വര്ഷത്തോളം പ്രണയിച്ച ശേഷമാണ് 1998 ഒക്ടോബര് 20ന് മഞ്ജു വാര്യര് ദിലീപിനെ വിവാഹം കഴിക്കുന്നത്. ഈ സമയത്ത് മലയാളത്തിലെ മുന്നിര നായികമാരുടെ നിരയിലേക്ക് മഞ്ജു വാര്യര് വളര്ന്നിരുന്നു. വീട്ടുകാരുടെ പൂര്ണസമ്മതത്തോടെ ആയിരുന്നില്ല ഈ വിവാഹം. വിവാഹ ശേഷം മഞ്ജു വാര്യര് സിനിമാഭിനയം നിര്ത്തി. അതേസമയം ദിലീപ് മലയാള സിനിമയിലെ ജനപ്രിയ നായകനായി.
എന്നാല് നീണ്ട 17 വര്ഷത്തെ ദാമ്പത്യജീവിതത്തിന് ശേഷം ദിലീപും മഞ്ജുവാര്യരും വിവാഹമോചിതരാകുന്നത്. ബന്ധം വേര്പിരിഞ്ഞ ശേഷം ഇവരുടെ മകള് മീനാക്ഷി അച്ഛന് ദിലീപിനൊപ്പമാണ്. ഇതിനിടെ മഞ്ജു വാര്യര് നൃത്തത്തിലേക്ക് സിനിമയിലേക്കും തിരിച്ചു വന്നു. ഇപ്പോള് മലയാളത്തിലും തമിഴിലും അടക്കം തിരക്കിലാണ് മഞ്ജു വാര്യര്. മലയാള സിനിമാലോകത്തെ അമ്പരപ്പിച്ചു കൊണ്ട് അഭ്യൂഹങ്ങള് സത്യമാക്കി പിന്നീട് ദിലീപും കാവ്യാ മാധവനും വിവാഹിതരായി. ആ വിവാഹത്തിന് ദിലീപിന്റെ മകള് മീനാക്ഷി മുന്നില്ത്തന്നെയുണ്ടായിരുന്നു. ദിലീപിനും കാവ്യമാധവനും മഹാലക്ഷ്മി എന്ന ഒരു മകളുണ്ട്.
