മലയാള സിനിമയില് മാത്രമല്ല സൈബർ ലോകത്തും ഹേറ്റേഴ്സില്ലാത്ത സംവിധായകനും ഗായകനും അഭിനേതാവുമാണ് വിനീത് ശ്രീനിവാസന്. താരത്തിന്റെ സിനിമകള്ക്കായി നിറഞ്ഞ മനസ്സോടെയാണ് ആരാധകര് കാത്തിരിക്കുന്നത്. വിനീത് ശ്രീനിവാസന് സംവിധാനം ചെയ്യുന്ന സിനിമകള്ക്ക് മാത്രമല്ല, അഭിനയിച്ച സിനിമകള്ക്കായും പ്രേക്ഷകര് കാത്തിരിക്കാറുണ്ട്. മനസ്സില് കുളിര്മഴ പെയ്യിക്കുന്ന സിനിമകളാണ് വിനീതിന്റെ സംവിധാനത്തിലൂടെ പ്രേക്ഷകര്ക്ക് മുന്നില് എന്നും എത്തിയിട്ടുള്ളത്.
വിനീത് ശ്രീനിവാസനെ നായകനാക്കി എം.മോഹനൻ സംവിധാനം ചെയ്യുന്ന ‘ഒരു ജാതി ജാതകം’ എന്ന സിനിമയാണ് വിനീതിന്റേതായി റിലീസിന് എത്തുന്ന ഏറ്റവും പുതിയ സിനിമ. റൊമാന്റിക് കോമഡി എന്റർടെയ്നറായ സിനിമയാണിത്.
വിവാഹിതനാകാൻ ആഗ്രഹിച്ച്, മോഹിച്ച് നടക്കുന്ന ചെറുപ്പക്കാരന്റെ വേഷത്തിലാണ് വിനീത് ചിത്രത്തിലെത്തുന്നത്. ഹ്യൂമറിന് പ്രാധാന്യം നല്കിയാണ് ചിത്രം ഒരുക്കിയത്. ബന്ധുവായ രാകേഷ് മണ്ടോടിയുടേതാണ് തിരക്കഥ.
ഇപ്പോഴിതാ സിനിമയുടെ പ്രമോഷനുമായി ബന്ധപ്പെട്ട് യൂട്യൂബ് ചാനലിന് നല്കിയ അഭിമുഖത്തില് തിരക്കഥാകൃത്തും ബന്ധുവുമായ രാകേഷ് മണ്ടോടി വിനീതിനെ കുറിച്ച് പറഞ്ഞ വാക്കുകളാണ് ശ്രദ്ധനേടുന്നത്. വീനീത് പണ്ട് ഷോവനിസ്റ്റ് ആയിരുന്നു എന്നും ഇപ്പോഴാണ് മാറിയതെന്നും വിനീതിന്റെ പ്രണയകാലം രസകരമായിരുന്നെന്നും പറയുകയാണ് രാകേഷ്. വിനീതും എം. മോഹനനും ,രാകേഷും ഒരുമിച്ചെത്തിയ അഭിമുഖമായിരുന്നു ഇത്. ‘‘നോർമല് സിനിമയും പോണ് സിനിമയുമൊക്കെ കണ്ടിട്ട് പെണ്കുട്ടികള് അങ്ങനെ ആയിരിക്കണം... ഭാര്യ ഇങ്ങനെയായിരിക്കണം എന്നൊക്കെ ഒരുപാട് കണ്ടീഷൻസുള്ള കുറച്ച് സുഹൃത്തുക്കള് എനിക്കുണ്ടായിരുന്നു. അവരെ പ്രതിനിധീകരിച്ചാണ് ഒരു ജാതി ജാതകം എന്ന സിനിമ താൻ ഒരുക്കിയത്.
വിനീത് പണ്ടൊരു പ്രണയഭിക്ഷുകനായിരുന്നു. ചെറുപ്പത്തില് ഇവൻ ഷോവനിസ്റ്റായിരുന്നു. വിനീതും ദിവ്യയും പ്രണയത്തിലായിരുന്ന സമയത്ത് ദിവ്യ ഷാള് ധരിച്ച് വന്നില്ലെങ്കില് ദിവ്യ കുട്ടി ഷാള് എവിടെയെന്നൊക്കെ ചോദിച്ചിരുന്നയാളാണ്.
പിന്നീട് കല്യാണം കഴിഞ്ഞപ്പോള് ഇവൻ ഭയങ്കര പ്രോഗ്രസീവായി. ഇപ്പൊ ആള് മാറി, ഇപ്പോളിവന് അടിപൊളിയാണ്. വിനീതിന്റെ പ്രണയം തുടങ്ങുന്നത് ഏഴാം ക്ലാസിലാണ്. ഇവൻ പ്രണയഭിക്ഷുകനായിരുന്നു. ആ പെണ്കുട്ടിയുടെ പേര് വരെ എനിക്ക് ഓർമയുണ്ട്...’’ രാകേഷ് പറയുന്നു. ‘പണ്ട് എല്ലാരും ഇങ്ങനെയല്ലേ’യെന്ന് ചിരിച്ച് കൊണ്ട് വിനിത് മറുപടിയും പറയുന്നുണ്ട്. കോളജ് പഠന കാലത്താണ് ദിവ്യ വിനീതിന്റെ ജീവിതത്തിലേക്ക് എത്തുന്നത്.
ഒരു മാമൻ - മരുമക്കള് കൂട്ടുകെട്ടിലുള്ള സിനിമയാണ് ‘ഒരു ജാതി ജാതകം’. അരവിന്ദന്റെ അതിഥികള്ക്ക് ശേഷം അമ്മാവൻ എം. മോഹനനും വിനീത് ശ്രീനിവാസനും വീണ്ടും ഒന്നിക്കുന്ന സിനിമയാണിത്. ഇവരുടെ ബന്ധുവാണ് തിരക്കഥാകൃത്തായ രാകേഷ് മണ്ടോടി.
