ഇന്ത്യന് അഭിനേത്രിയും മോഡലുമായ കനി കുസൃതിയെ മലയാളി സിനിമാ പ്രേക്ഷകര് ആദ്യമായി കാണുന്നത് ഒരുപക്ഷേ 2009 ൽ പുറത്തിറങ്ങിയ കേരള കഫെ എന്ന ചിത്രത്തിലെ ഐലൻഡ് എക്സ്പ്രസ്സ് എന്ന സെഗ് മെന്റിൽ പൃഥ്വിരാജിന്റെ കാമുകിയുടെ കഥാപാത്രത്തിലൂടെയാണ്. പിന്നീട് പല സിനിമകളിലും ചെറിയ കഥാപാത്രങ്ങള് കനി ചെയ്തു.
ചെറിയ റോളുകളിലൂടെ വന്ന് ഇന്ന് മലയാളസിനിമക്ക് അന്താരാഷ്ട്ര തലത്തില് പ്രശസ്തി നേടിക്കൊടുത്ത അഭിനേത്രിയാണ് കനി കുസൃതി. ലെനിന് രാജേന്ദ്രന് സംവിധാനം ചെയ്ത അന്യര് എന്ന ചിത്രത്തില് ചെറിയൊരു വേഷത്തിലൂടെ സിനിമയിലേക്ക് കടന്നുവന്ന കനി ഓള് വീ ഇമാജിന്ഡ് ആസ് ലൈറ്റ് എന്ന ചിത്രത്തിലൂടെ കാന് ഫിലിം ഫെസ്റ്റിവലില് അന്താരാഷ്ട്ര ശ്രദ്ധ നേടിയിരുന്നു. 2020ല് പുറത്തിറങ്ങിയ ബിരിയാണി എന്ന ചിത്രത്തിലെ പ്രകടനത്തിന് മികച്ച നടിക്കുള്ള സംസ്ഥാന അവാര്ഡും കനി സ്വന്തമാക്കി.
പലപ്പോഴും സ്വന്തം നിലപാടുകള് കൊണ്ടും വ്യക്തി ജീവിതത്തിലെ തുറന്നു പറച്ചിലുകള് കൊണ്ടും കനി വാര്ത്തകളില് ഇടം നേടിയിട്ടുണ്ട്. മാതാപിതാക്കളുമായിട്ടുള്ള കനിയുടെ ബന്ധവും വാര്ത്തകളില് ഇടം പിടിച്ചിട്ടുണ്ട്. അച്ഛനെ പേരു ചൊല്ലി വിളിക്കുന്ന അമ്മയുമായി സൗഹൃദത്തില് കവിഞ്ഞുള്ള ബന്ധം കാത്തുസൂക്ഷിക്കുന്ന കനിയുടെ നിലപാടുകള് വ്യക്തി ജീവിതത്തിലും നിഴലിച്ചു നില്ക്കാറുണ്ട്.
ഇപ്പോഴിതാ താനും അച്ഛനും അമ്മയും തമ്മിലുള്ള ആരോഗ്യപരമായ ബന്ധത്തെക്കുറിച്ച് പറയുകയാണ് കനി. അച്ഛനും അമ്മയും തന്നോട് ഒരു കൂട്ടുകാരിയോടെന്ന പോലെയാണ് പെരുമാറുന്നതെന്നും വീട്ടില് തനിക്ക് എല്ലാവിധത്തിലുമുളള സ്വാതന്ത്ര്യവും ഉണ്ടായിരുന്നെന്നും പറയുകയാണ് കനി.
‘‘അച്ഛനും അമ്മയും എന്നോട് ഒരു കൂട്ടുകാരിയോടെന്ന പോലെയാണ് പെരുമാറുന്നത്. ചെറുപ്പം മുതല്ക്കേ അങ്ങനെ തന്നെയാണ്. എന്നെ കൂടുതലും നോക്കിയിട്ടളളത് അച്ഛനാണ്. സ്കൂളില് അയക്കുന്നതും ഭക്ഷണം വാരിതരുന്നതുമെല്ലാം അച്ഛനായിരുന്നു. വീട്ടില് എനിക്ക് എല്ലാവിധത്തിലുമുളള സ്വാതന്ത്ര്യവും ഉണ്ടായിരുന്നു. ബാക്കിയുളള കുട്ടികള്ക്ക് വീട്ടില് നിന്ന് പുറത്തുപോകുമ്പോഴാണ് സ്വാതന്ത്ര്യം കിട്ടുന്നതെന്ന് പറഞ്ഞ് കേട്ടിട്ടുണ്ട്. എനിക്ക് അങ്ങനെ അല്ല.
അമ്മയായിരുന്നു ജോലിക്ക് പോയിരുന്നത്. എന്റെ ഇരുപതാമത്തെ വയസില് ഗർഭിണിയാണെന്ന് തോന്നിയിട്ടുണ്ട്. പിരിയഡ്സാകാൻ കുറച്ച് വൈകുമ്ബോഴും വെറുതെയിരിക്കുമ്പോഴുമെല്ലാം ഗർഭിണിയാണെന്ന് തോന്നിയിട്ടുണ്ട്. അത് അമ്മയോട് പറഞ്ഞിരുന്നു. അമ്മയ്ക്ക് തൈറോയിഡിന്റെയും ഗർഭാശയത്തിന്റെയും ശസ്ത്രക്രിയ കഴിഞ്ഞ് വീട്ടില് ഉണ്ടായിരുന്ന സമയമായിരുന്നു.
ആ സമയത്ത് ഞാൻ ഗർഭിണിയാണെന്ന് ഒരു തോന്നലുണ്ടായിട്ടുണ്ട്. അങ്ങനെ പാതിരാത്രി അമ്മയോട് ഞാൻ ഗർഭിണിയാണെന്ന് തോന്നുന്നുണ്ടെന്ന് പറഞ്ഞു. എനിക്ക് ആ സമയത്ത് ബോയ് ഫ്രണ്ട് ഉണ്ടായിരുന്നോയെന്ന് അമ്മ ചോദിച്ചു. ഞാൻ ഇല്ലെന്ന് മറുപടി പറഞ്ഞു. അതുകേട്ട അമ്മ കുഴപ്പമില്ലെന്നും അബോഷൻ ചെയ്യാമെന്നുമാണ് പറഞ്ഞത്. അമ്മ നിസാരമായാണ് മറുപടി പറഞ്ഞത്...’’ കനി പറയുന്നു.
ഒരു യൂട്യൂബ് ചാനലിന് അനുവദിച്ച അഭിമുഖത്തിലാണ് കനി ഇക്കാര്യങ്ങള് പങ്കുവച്ചത്.
