കല്പറ്റ: പനമരത്ത് യുഡിഎഫ് മുസ്ലിം വനിതയെ മാറ്റി ആദിവാസി പെണ്ണിനെ പഞ്ചായത്ത് പ്രസിഡന്റാക്കിയെന്ന് വിവാദ പരാമര്ശം നടത്തി സിപിഎം വയനാട് ജില്ലാക്കമ്മറ്റിയംഗം വിവാദത്തില്. പനമരത്ത് അവിശ്വാസ പ്രമേയത്തിന് പിന്നാലെ ഭരണമാറ്റം സംഭവിച്ചതിനെക്കുറിച്ച് പ്രസംഗിക്കുമ്പോള് ആയിരുന്നു വിവാദ പരാമര്ശം നടത്തിയത് വയനാട് സിപിഎം ജില്ലാക്കമ്മറ്റിയംഗം എ എന് പ്രഭാകരനാണ്.
ആദ്യമായി മുസ്ലിം വനിത പ്രസിഡണ്ടായിരുന്ന പഞ്ചായത്തിലെ ഭരണം ലീഗ് മറിച്ചിട്ടെന്നും ആദിവാസിപെണ്ണിനെ പഞ്ചായത്ത് പ്രസിഡന്റാക്കിയെന്നുമായിരുന്നു പരാമര്ശം. പനമരത്ത് ചെയ്തത് ചരിത്രപരമായ തെറ്റാണെന്നും അടുത്ത തെരഞ്ഞെടുപ്പില് വീട് കയറുമ്പോള് ലീഗുകാര് മറുപടി പറയേണ്ടി വരുമെന്നും എ.എന് പ്രഭാകരന് പറഞ്ഞു.
പനമരത്ത് എല്ഡിഎഫ് പഞ്ചായത്ത് പ്രസിഡണ്ടായിരുന്ന ആസ്യ യുഡിഎഫ് കൊണ്ടുവന്ന അവിശ്വാസ പ്രമേയത്തിലൂടെയാണ് പുറത്തായിരുന്നു. പ്രസിഡന്റ് സ്ഥാനാര്ത്ഥിയായി ഹസീനയുടെയും ലക്ഷ്മി ആലക്കമുറ്റത്തിന്റെയും പേരുകള് ചര്ച്ചയില് ഉണ്ടായിരുന്നു. യുഡിഎഫിലെ ഭിന്നതയെ തുടര്ന്ന് ആദ്യദിവസം തെരഞ്ഞെടുപ്പ് നടന്നിരുന്നില്ല. പാണക്കാട് സാദിഖ് അലി തങ്ങള് ഇടപട്ടാണ് ലക്ഷ്മി ആലക്കമുറ്റത്തെ പ്രസിഡന്റ് സ്ഥാനാര്ഥിയായി തീരുമാനിച്ചത്.
