മുണ്ടക്കയം: പശ്ചിമയില് പുലിയിറങ്ങിയെന്ന സംശയത്തില് ജനങ്ങള് ആശയങ്കയിലായിരിക്കേ, ഏതാനും കിലോമീറ്ററുകള് മാത്രം അകലെയാണു തിങ്കളാഴ്ച കാട്ടാന വീട്ടമ്മയെ കൊലപ്പെടുത്തിയത്. ഇതോടെ മലയോരത്തിനു വീണ്ടും ഉറക്കം നഷ്ടമായി. കോട്ടയം ജില്ലയില് അല്ല കഴിഞ്ഞ ദിവസത്തെ സംഭവമെങ്കിലും ഈ സ്ഥലത്തോടു ചേര്ന്നു കിടക്കുന്ന ജില്ലയിലെ വനാതിര്ത്തി ഗ്രാമങ്ങളിലും എപ്പോള് വേണമെങ്കിലും ആനയും പുലിയുമൊക്കെ ഇറങ്ങി ജീവന് എടുക്കാവുന്ന അവസ്ഥയാണ്.
ഒരു ഭാഗത്ത് കെ.കെ. റോഡും മറുഭാഗത്ത് ശബരിമല വനവും അതിര്ത്തി പങ്കിടുന്ന ടി.ആര്.ആന്റ് ടീ എസ്റ്റേറ്റിലാണു കഴിഞ്ഞ ദവിസം വീട്ടമ്മയ്ക്കു ജീവന് നഷ്ടമായത്. എസ്റ്റേറ്റിന്റെ വനാതിര്ത്തി പ്രദേശത്ത് ഏതാനും വര്ഷങ്ങളായി കാട്ടാനയുടെ ശല്യം രൂക്ഷമാണ്. 2018ന്റെ ആരംഭത്തോടെയാണു കാട്ടാനകള് ജനവാസ മേഖലകളിലേക്കു വ്യാപകമായി ഇറങ്ങാന് തുടങ്ങിയത്. ചക്ക ഉണ്ടാകുന്ന സീസണില് മാത്രം ഇറങ്ങിയിരുന്ന ആനകള് പിന്നീട് സ്ഥിരമായി എത്തി തുടങ്ങിയതായി പ്രദേശവാസികള് പറയുന്നു.
2019 ഡിസംബറില് ആനകള് കൂട്ടത്തോടെ കാടു കടന്നു നാട്ടിലെത്തി. ഏതാനൂം മാസങ്ങള്ക്കു മുന്പ് 24 ആനകള് അടങ്ങിയ കൂട്ടമാണു ജനവാസ കേന്ദ്രത്തിലെത്തിയത്. ദിവസങ്ങളുടെ പരിശ്രമത്തിനൊടുവിലാണ് ഇവയെ കാടുകയറ്റാന് വനംവകുപ്പിനായത്. ഏതാനും കിലോമീറ്ററുകള് അകലെ അമലഗിരിയില് കെ.കെ. റോഡിനോട് ചേര്ന്നും മുറിഞ്ഞപുഴ -കണയങ്കവയല് റോഡിലുമൊക്കെ കാട്ടാന എത്തിയത് സമീപനാളുകളിലാണ്.
ടി.ആര്.ആന്റ് ടീ എസ്റ്റേറ്റിന്റെ പല ഭാഗങ്ങളും കാടുകയറിയ നിലയിലാണെന്നത് ആന ഉള്പ്പെടെയുള്ള വന്യമൃഗങ്ങള്ക്ക് സൗകര്യമാകുന്നു. കൊമ്പുകുത്തി, കണ്ണിമല, എരുമേലി പഞ്ചായത്തിന്റെ വിവിധ പ്രദേശങ്ങള് എന്നിവിടങ്ങളിലെല്ലാം കാട്ടാന ശല്യ ഭീതിയിലാണ്. കോരുത്തോട് പഞ്ചായത്തിന്റെ വനാതിര്ത്തി മേഖലകള് എന്നും കാട്ടാന ഭീതിയിലാണ്. ഈ പ്രദേശങ്ങളിലെ നൂറുകണക്കിന് ഏക്കര് കൃഷിയാണ് ഏതാനും വര്ഷങ്ങള്ക്കുള്ളില് കാട്ടാനകള് നാമാവശേഷമാക്കിയത്.
നാടു വിറപ്പിച്ചു പുലി; പുറത്തിറങ്ങാന് ഭയന്നു ജനം
മുണ്ടക്കയം: പുലികളും മലയോര ഗ്രാമങ്ങളെ വിറപ്പിക്കുകയാണ്. ആടിനെയും പശുവിനെയും നായകളെ പോലും വളര്ത്താന് കഴിയാത്ത അവസ്ഥയിലാണ് നാട്ടുകാര്. ടി.ആര്.ടീ എസ്റ്റേറ്റിലെ ചെന്നാപ്പാറ ടോപ്, കൊമ്പുകുത്തി, കുപ്പക്കയം മേഖലയില് ഏതാനും വര്ഷത്തിനുള്ള നായകളും പശുക്കളും ഉള്പ്പെടെ അമ്പതിലേറെ വളര്ത്തുമൃഗങ്ങളെയാണു പുലി കൊന്നൊടുക്കിയത്. എസ്റ്റേറ്റിലെ ഇ.ഡി.കെ. ഡിവിഷനിലായിരുന്നു ശല്യമേറെയും.ഇപ്പോള്, പുലിശല്യം പറഞ്ഞുകേള്ക്കുന്നില്ലെങ്കിലും ഏതു നിമിഷവും തിരിച്ചെത്താമെന്നു നാട്ടുകാര് പറയുന്നു.
കഴിഞ്ഞ ദിവസം മുണ്ടക്കയത്തു നിന്ന് ഏതാനും കിലോമീറ്ററുകള് അകലെ പശ്ചിമയില് പുലി എത്തിയതായി നാട്ടുകാര് പറയുന്നു. വളര്ത്തുനായകളെയും ആടിനെയും കൊന്നിരുന്നു. എന്നാല്, പുലിയാണെന്നു സ്ഥിരീകരിക്കാന് വനംവകുപ്പ് തയാറായിട്ടില്ല, അതുകൊണ്ടു തന്നെ കൂടും സ്ഥാപിച്ചിട്ടില്ല. മുണ്ടക്കയം -എരുമേലി റൂട്ടില് പുലിക്കല്ലില് നിന്നു 2023 ജൂലൈ 19നു പുലിയെ പിടികൂടിയിരുന്നു.
വേനല് കടുത്താല്, കൂട്ടത്തോടെ കാടിറങ്ങും
കോട്ടയം: വേനല് കടുത്തതോടെ കുടിവെള്ളവും ഭക്ഷണവും തേടി വന്യമൃഗങ്ങള് കൂട്ടത്തോടെ നാട്ടിലേക്ക് ഇറങ്ങുന്നതും മലയോര നിവാസികളെ ഭീതിയിലാക്കുന്നു. കാട്ടാന മുതല് കാട്ടുപന്നി വരെ ഇക്കൂട്ടത്തിലുണ്ട്. പെരുവന്താനം, പുഞ്ചവയല്, കണ്ണിമല, കോരുത്തോട്, വണ്ടന്പതാല്, കണമല, എരുമേലി, പാമ്പാടി, മുക്കൂട്ടുതറ, പൊന്തന്പുഴ, മണിപ്പുഴ എന്നിവിടങ്ങളിലാണ് ഇവയുടെ ശല്യം രൂക്ഷം.
ഏക്കര് കണക്കിന് കൃഷി ഇതിനകം നശിപ്പിച്ചു. ആനശല്യം ഭയന്നു രാത്രി വീടുവിട്ടു പോകേണ്ട സാഹചര്യമാണ് പലര്ക്കും. ഇതോടൊപ്പമാണു മലയണ്ണാനും കാട്ടുപൂച്ചയും മയിലും പാമ്പും അടക്കമുള്ളവയുടെ ശല്യം. കാട്ടാനകളെ നിയന്ത്രിക്കാന് സോളാര് വൈദ്യുതിവേലി, കിടങ്ങുകള് എന്നിവ സ്ഥാപിക്കുന്നതിനു നടപടി ഇഴയുകയാണ്. രണ്ടു വര്ഷം മുമ്പ് ബജറ്റില് പ്രഖ്യാപിച്ച പദ്ധിയുടെ പണികള് അടുത്തിടെയാണ് ആരംഭിച്ചത്.
കര്ഷകര്ക്കുണ്ടാകുന്ന നാശത്തിന് നഷ്ടപരിഹാരവും തുച്ഛമാണ്. വര്ഷങ്ങള്ക്ക് മുമ്പേ നിശ്ചയിച്ച നിരക്കിലാണ് ഇപ്പോഴും നഷ്ടപരിഹാരം നല്കുന്നത്. കൃഷിയിടങ്ങളിലും ഇതിനോട് ചേര്ന്ന പ്രദേശങ്ങളിലും കാട്ടുമൃഗങ്ങള് അപായപ്പെട്ടാല് ഉത്തരവാദിത്വം കര്ഷകര്ക്കുമേല് കെട്ടിവയ്ക്കുന്ന പ്രവണതയുമുണ്ട്.
ആനയെ കണ്ട് ഭയന്നോടി പരുക്കേറ്റത് നൂറിലേറെ പേര്ക്ക്
മുണ്ടക്കയം: ടി.ആര്. ആന്ഡ് ടീ എസ്റ്റേറ്റില് മാത്രം ഇതുവരെ ആനയെ കണ്ട് ഭയന്നോടി പരുക്കേറ്റത് നൂറിലേറെ പേര്ക്ക്. മുണ്ടക്കയത്തിനു ചുറ്റുവട്ടത്തുള്ള മലയോര മേഖലകളില്, തിങ്കളാഴ്ചത്തേത് ഉള്പ്പെടെ ഏഴുവര്ഷത്തിനുള്ളില് കാട്ടാന ആക്രമണത്തില് കൊല്ലപ്പെട്ടത് നാലു പേരാണ്. 2018 ഓഗസ്റ്റ് 16ന് വീടിനു സമീപം വനത്തില് വിറകിന് പോയ പാക്കാനം ഇഞ്ചക്കുഴി കുര്യന് പറമ്പില് സൗദാമിനി ആനയുടെ ചവിട്ടേറ്റ് മരിച്ചിരുന്നു.
അഞ്ചു മാസങ്ങള്ക്കു ശേഷം 2019 ജനുവരി ഒന്പതിന് കാനന പാതയില് വള്ളിത്തോടിനു സമീപം, തമിഴ്നാട് സേലം സ്വദേശി പരമശിവം (35) ആനയുടെ ആക്രമണത്തില് കൊല്ലപ്പെട്ടു. 020 ജനുവരി അഞ്ചിന് മുക്കുഴി പൂക്കുറ്റി താവളത്തില് ആനയുടെ ചവിട്ടേറ്റ്, ശബരിമല തീര്ഥാടകനായ കോയമ്പത്തൂര് സ്വദേശി ബത്തിരപ്പന് (58) കൊല്ലപ്പെട്ടു.
