മൂവാറ്റുപുഴ: റോഡ് വികസനത്തിന് തടസമായ പുറമ്പോക്ക് ഭൂമി കൈയേറ്റത്തിനെതിരേ നാട്ടുകാര് നടത്തിയ പോരാട്ടം ഒടുവില് വിജയം കണ്ടു. കക്കടാശേരി-ഞാറക്കാട് റോഡിലെ പുന്നമറ്റത്തെ പുറംമ്പോക്ക് ഭൂമിയാണ് ഇന്നലെ രാവിലെ ഹൈക്കോടതി ഉത്തരവിനെത്തുടര്ന്ന് ഒഴിപ്പിച്ചത്. 2022 ല് റോഡ് വികസനത്തിനായി പുറമ്പോക്ക് ഭൂമി ഏറ്റെടുക്കാന് കെ.എസ്.ടി.പി. ഉദ്യോഗസ്ഥര്ക്ക് നിര്ദേശം നല്കണമെന്ന് ആവശ്യപ്പെട്ടു പോത്താനിക്കാട് കുറ്റിശ്രക്കുടിയില് ഷിബു ഐസക്, ജിനി സ്കറിയ എന്നിവര് ഹൈക്കോടതിയെ സമീപിച്ച് അനുകൂല ഉത്തരവ് നേടിയിരുന്നു.
ഇതേത്തുടര്ന്ന് പ്രദേശത്തെ പുറംമ്പോക്ക് കൈവശക്കാരും മറ്റ് സ്വകാര്യ വ്യക്തികളും കൈവശ ഭൂമി റോഡ് വികസനത്തിനായി സ്വമേധയ വിട്ടുനല്കി. എന്നാല്, പുന്നമറ്റം സ്വദേശികളായ പടിഞ്ഞാറെചാലില് പി.എ. ഷാജഹാന്, പി.എം. റൈഹാന്, പി.എം. മുസ്തഫ, മുഹമ്മദ് ഹസന് എന്നിവര് അതിനു തയാറായില്ല. ഇതോടെ 2022 മാര്ച്ചില് ഹൈക്കോടതി പുറപ്പെടുവിച്ച ഉത്തരവ് കൃത്യമായി നടപ്പിലാക്കാന് നിര്ദ്ദേശം നല്കണമെന്നാവശ്യപ്പെട്ട് കക്കടാശേരി-ഞാറക്കാട് റോഡ് വികസന സമിതിക്കുവേണ്ടി ചെയര്മാന് ഷിബു ഐസക്ക്, കണ്വീനര് എല്ദോസ് പുത്തന്പുര എന്നിവര് അഡ്വ. പീയൂസ് എ. കൊറ്റം വഴി ഹൈക്കോടതിയെ വീണ്ടും സമീപിച്ചു.
തുടര്ന്നു പുറമ്പോക്ക് ഭൂമി ഒഴിപ്പിക്കാന് കെ.എസ്.ടി.പി. ഉദ്യോഗസ്ഥര്ക്കു കോടതി ഉത്തരവ് നല്കി. ഇതോടെ ഈ നാല് പേരും പുറമ്പോക്ക് ഭൂമി കൈയേറി നിര്മിച്ച വീടിന്റെ ചുറ്റുമതിലും ഗേറ്റും അടക്കം ജെ.സി.ബി. ഉപയോഗിച്ച് പൊളിച്ച് നീക്കി ഭൂമി വീണ്ടെടുത്തു. കെ.എസ്.ടി.പി. എക്സിക്യൂട്ടീവ് എന്ജിനീയറുടെ നേതൃത്വത്തിലുള്ള ഉദ്യോഗസ്ഥ സംഘവും പോത്താനിക്കാട് സി.ഐയുടെ നേതൃത്വത്തിലുള്ള പോലീസ് സംഘവും എത്തിയാണ് ഹൈക്കോടതി ഉത്തരവ് നടപ്പാക്കിയത്.
പുറമ്പോക്ക് ഒഴിപ്പിക്കുവാനുള്ള ഹൈക്കോടതി ഉത്തരവ് നടപ്പാക്കാന് എത്തിയ കെ.എസ്.ടി.പി. അധികൃതരുമായി മുന്സിഫ് മജിസ്ട്രേറ്റും പി.എം. റൈഹാന്റെ ഭര്ത്താവ് ഷാനവാസും പി.എം. ഷാജഹാനും വാക്കേറ്റത്തില് ഏര്പ്പെടുകയും ഒഴിപ്പിക്കല് തടസപ്പെടുത്താന് ശ്രമിക്കുകയും ചെയ്തു. എന്നാല് ഹൈക്കോടതി ഉത്തരവ് നടപ്പിലാക്കി റിപ്പോര്ട്ട് സമര്പ്പിക്കേണ്ടത് തങ്ങളുടെ ചുമതലയാണെന്ന് ഉദ്യോഗസ്ഥര് വ്യക്തമായ നിലപാട് സ്വീകരിച്ചു. നാട്ടുകാരുടെ പിന്തുണ കൂടി ലഭിച്ചതോടെ ഒഴിപ്പിക്കല് പൂര്ത്തിയാക്കാനും ആയി.
പുറമ്പോക്ക് ഭൂമി ഏറ്റെടുത്തതോടെ റോഡിന്റെ ഈ ഭാഗത്തെ കൊടും വളവ് നിവര്ത്താനും വെള്ളക്കെട്ട് ഒഴിവാക്കുന്നതിനും ആവശ്യമായ സ്ഥലം ലഭിച്ചു. അപകടം തുടര്ക്കഥയായ ഈ ഭാഗത്തെ പ്രശ്നങ്ങള് ഇനി പരിഹരിക്കാനാകും.
