മഹാരാഷ്ട്ര: ഹിംഗോളി ജില്ലയിൽ 18 വയസ്സുള്ള നീറ്റ് (NEET) പരീക്ഷാർഥി പുനഃപരീക്ഷയ്ക്ക് ശേഷം ജീവനൊടുക്കിയതായി റിപ്പോർട്ട്. അമ്മയെ അഭിസംബോധന ചെയ്ത് വൈകാരികമായ വീഡിയോ സന്ദേശം പോസ്റ്റ് ചെയ്തതിന് ശേഷമാണ് വിദ്യാർത്ഥി ആത്മഹത്യ ചെയ്തതെന്നാണ് വിവരം.
സുശീൽ ധാഗെ എന്ന വിദ്യാർത്ഥിയാണ് ജൂൺ 21ന് നടന്ന മെഡിക്കൽ പ്രവേശന പരീക്ഷ വീണ്ടും എഴുതിയത്. ചോദ്യപേപ്പർ ചോർച്ചയെ തുടർന്ന് മെയ് 3ന് നടന്ന പരീക്ഷ റദ്ദാക്കിയതിനാൽ പുനഃപരീക്ഷ നടത്തുകയായിരുന്നു.
സംഭവത്തിന് മുമ്പ് മൊബൈൽ ഫോണിൽ റെക്കോർഡ് ചെയ്ത 33 സെക്കൻഡ് ദൈർഘ്യമുള്ള വീഡിയോയിൽ, അമ്മയോട് ക്ഷമ ചോദിക്കുന്നതും തന്റെ തീരുമാനത്തെക്കുറിച്ച് ദുഃഖം പ്രകടിപ്പിക്കുന്നതുമാണ് ഉള്ളത്. “അമ്മേ, ഇന്ന് ഞാൻ എന്റെ ജീവിതം അവസാനിപ്പിക്കാൻ പോകുന്നു. ദയവായി വിഷമിക്കരുത്. അടുത്ത ജന്മത്തിൽ ഞാൻ വീണ്ടും നിങ്ങളുടെ മകനായി ജനിക്കും,” എന്ന് കൈകൾ കൂപ്പി വിദ്യാർത്ഥി പറയുന്നതായി വീഡിയോയിൽ കേൾക്കുന്നു.
