ഡെറാഡൂണ്: ഉത്തരാഖണ്ഡിലെ ചമോലി ജില്ലയില് വന് ഹിമപാതം. മഞ്ഞുമലയിടിച്ചിലില് കുടുങ്ങിയ 57 റോഡ് നിര്മാണ തൊഴിലാളികളില് 32 പേരെ രക്ഷിച്ചു. കാണാതായ 25 തൊഴിലാളികള്ക്കായി രക്ഷാപ്രവര്ത്തനം ഊര്ജിതം. അതേസമയം, പ്രതികൂല കാലാവസ്ഥ രക്ഷാപ്രവര്ത്തനം മന്ദഗതിയിലാക്കിയത് ആശങ്കയുണ്ടാക്കുന്നുണ്ട്.
പ്രശസ്തമായ ബദ്രിനാഥ് ക്ഷേത്രത്തിന് മൂന്നുകിലോമീറ്റര് അകലെ ഇന്തോ-ടിബറ്റന് അതിര്ത്തിയോടു ചേര്ന്ന മനാ ഗ്രാമത്തിലാണ് സംഭവം. ബോര്ഡര് റോഡ്സ് ഓര്ഗനൈസേഷന്റെ ക്യാമ്പിനു സമീപമാണ് മഞ്ഞിടിച്ചിലുണ്ടായത്. റോഡ് നിര്മാണത്തിനെത്തിയ തൊഴിലാളികളാണ് ദുരന്തത്തില്പ്പെട്ടത്. രക്ഷപ്പെടുത്തിയ 32 തൊഴിലാളികളെ മനായിലെ സൈനിക ക്യാമ്പിലേക്കു മാറ്റി. കരാറുകാരന്റെ കീഴില് പണിയെടുത്തിരുന്ന തൊഴിലാളികളാണ് ക്യാമ്പിലുണ്ടായിരുന്നത്. ഐ.ടി.ബി.പിയുടെയും സൈന്യത്തിന്റെയും നേതൃത്വത്തിലാണ് രക്ഷാപ്രവര്ത്തനം.
എസ്.ഡി.ആര്.എഫിന്റെയും എന്.ഡി.ആര്.എഫിന്റെയും സംഘങ്ങള് സംഭവസ്ഥലത്തേക്കു പുറപ്പെട്ടിട്ടുണ്ട്. ഇവിടേക്കുള്ള റോഡ് ഹിമപാതത്തില് തകര്ന്നതും കനത്ത ശീതക്കാറ്റും കാഴ്ചപരിധി കുറഞ്ഞതും രക്ഷാപ്രവര്ത്തനത്തെ ബാധിച്ചിട്ടുണ്ട്. അപകടം നടന്ന സ്ഥലത്ത് മൊബൈല് കവറേജില്ലാത്തതും പ്രതികൂലമാണ്. ഹനുമാന്ചട്ടിക്കു മുമ്പ് റോഡ് തകര്ന്നതുമൂലം മനായിലേക്ക് എത്തിച്ചേരാനാകില്ല.
റോഡ് നന്നാക്കാന് ശ്രമം പുരോഗമിക്കുകയാണെന്നും വൈകാതെ കൂടുതല് രക്ഷാപ്രവര്ത്തകര്ക്ക് അപകടസ്ഥലത്തേക്ക് എത്താനാകുമെന്നും ബോര്ഡര് റോഡ്സ് ഓര്ഗനൈസേഷന് കമാന്ഡര് കേണല് അങ്കുര് മഹാജന് പറഞ്ഞു. ഹെലികോപ്ടര് ഉപയോഗിച്ച് രക്ഷാപ്രവര്ത്തകരെ എത്തിക്കാനും ശ്രമം നടത്തുന്നുണ്ട്. എന്നാല്, പ്രതികൂല കാലാവസ്ഥ വെല്ലുവിളിയാണ്. അപകടത്തില്പ്പെട്ടവരെ രക്ഷപ്പെടുത്താന് സാധ്യമായതെല്ലാം ചെയ്യുമെന്ന് ഉത്തരാഖണ്ഡ് മുഖ്യമന്ത്രി പുഷ്കര് സിങ് ധാമി പറഞ്ഞു.
