തിരുവനന്തപുരം: ആശാവര്ക്കര്മാരുടെ സമരം നിയമസഭയില് ഉന്നയിച്ച് പ്രതിപക്ഷം. അടിയന്തിരപ്രമേയത്തിന് നോട്ടീസ് നല്കിയെങ്കിലും രണ്ടു അടിയന്തിരപ്രമേയത്തില് നോട്ടീസ് വന്ന വിഷയമാണെന്ന് സ്പീക്കര് ചൂണ്ടിക്കാട്ടി. രാജ്യത്ത് ആശമാര്ക്ക് ഏറ്റവും കൂടുതല് ഓണറേറിയം നല്കുന്നത് കേരളമാണെന്നായിരുന്നു ഇതിന് ആരോഗ്യമന്ത്രി വീണാജോര്ജ്ജ് നല്കിയ മറുപടി. 13,000 രൂപ ആശമാര്ക്ക് നല്കുന്നുണ്ടെന്ന് വീണ ജോര്ജ്ജ് പറഞ്ഞു. വിവിധ സംസ്ഥാനങ്ങളില് ആശമാര്ക്ക് നല്കിവരുന്ന കണക്കുകളും ആരോഗ്യമന്ത്രി അവതരിപ്പിച്ചു.
13,000 രൂപയില് 9400 രൂപ നല്കുന്നത് സംസ്ഥാനവിഹിതമാണെന്നും പറഞ്ഞു. ആശമാരില് 700 പേര് ജനപ്രതിനിധികളാണെന്നും ആരോഗ്യമന്ത്രി പറഞ്ഞു. തുടര്ന്ന് സംസാരിച്ച രാഹുല് മാങ്കൂട്ടത്തില് ആശമാരുടെ സമരത്തെ സര്ക്കാര് ആക്ഷേപിക്കുകയാണെന്ന് പറഞ്ഞു. സിക്കിമില് 10,000 രൂപയാണ് ആശമാര്ക്ക് ഓണറേറിയം നല്കുന്നതെന്നും വീണാജോര്ജ്ജിന്റെ മാപ്പില് സിക്കിം ഇല്ലേയെന്നും രാഹുല് മാങ്കൂട്ടത്തില് പരിഹസിച്ചു. മുഖ്യമന്ത്രിയോ മന്ത്രിമാരോ സമരക്കാരോട് സംസാരിക്കാന് തയ്യാറായോ എന്ന് ചോദിച്ച എംഎല്എ ആരോഗ്യമന്ത്രിക്ക് അധികകാലം ഓഫീസില് ഇരുന്നു വാഴാമെന്ന് കരുതേണ്ടതില്ലെന്നും പറഞ്ഞു.
ആശമാര് സമരം ഇരുന്നത് തുച്ഛമായ തുകപോലും കിട്ടാതായപ്പോഴാണെന്നും ബക്കറ്റ് പിരിവ് എന്നാണ് സിപിഎമ്മിന് അയിത്തമായത് എപ്പോഴാണെന്നും ചോദിച്ചു. ഇതിന് ഓണറേറിയം വര്ദ്ധിപ്പിക്കണമെന്ന് തന്നെയാണ് സര്ക്കാരിന്റെ നിലപാടെന്നും പറഞ്ഞു. സമരക്കാരുമായി വിശദമായ ചര്ച്ച നടത്തിയിട്ടുണ്ടെന്നും വീണാജോര്ജ്ജ് മറുപടി പ്രസംഗത്തില് പറഞ്ഞു. രണ്ടു തവണ നോട്ടീസ് നല്കിയതാണെന്ന് ചൂണ്ടിക്കാട്ടി അടിയന്തിര പ്രമേയത്തിനുള്ള അനുമതി നേരത്തേ സ്പീക്കര് നിഷേധിച്ചിരുന്നു. നോട്ടീസ് നല്കിയ സ്ഥിതിക്ക് ചുരുക്കിപ്പറയാനും സ്പീക്കര് ആവശ്യപ്പെട്ടു.
രണ്ടു തവണ നോട്ടീസ് വന്ന വിഷയം വീണ്ടും അനുവദിക്കുന്നത് ചട്ടലംഘനമാണെന്ന് മന്ത്രി എംബി രാജേഷ് പറഞ്ഞപ്പോള് സ്പീക്കര് റൂളിട്ട കാര്യത്തില് മന്ത്രി എതിര്പ്പ് പറയുന്നത് പ്രതിപക്ഷ നേതാവ് ചൂണ്ടിക്കാട്ടി. എന്നാല് സ്പീക്കറെ തിരുത്തുകയല്ലെന്നും ചട്ടം ചൂണ്ടിക്കാണിച്ചതായിരുന്നെന്നുമായിരുന്നു ഇതിന് മന്ത്രി പറഞ്ഞത്.
