പാലാ/ഇടമറ്റം: ബസ് ഓടിക്കുന്നതിനിടെ കുഴഞ്ഞുവീണ ഡ്രൈവര് മരിച്ചു. നിയന്ത്രണം വിട്ട ബസ് അപകടത്തില്പെട്ട് വിദ്യാര്ഥികളടക്കം 20 യാത്രക്കാര്ക്കു പരുക്കേറ്റു. ഇടമറ്റം മുകളേല് (കൊട്ടാരത്തില്)ഗോപാലകൃഷ്ണന് നായരുടെ മകന് എം.ജി. രാജേഷാ(41)ണു മരിച്ചത്.
ചേറ്റുതോട് -ഭരണങ്ങാനം - പാലാ റൂട്ടിലോടുന്ന കൂറ്റാരപ്പള്ളില് ബസാണ് ഇടമറ്റം ചീങ്കല്ല് ജംഗ്ഷനു സമീപം ഇന്നലെ രാവിലെ 7.15 ന് അപകടത്തില്പെട്ടത്. ഡ്രൈവര് രാജേഷ് ഇവിടെവച്ച് ദേഹാസ്വാസ്ഥ്യത്തെത്തുടര്ന്ന് കുഴഞ്ഞുവീഴുകയായിരുന്നെന്നു യാത്രക്കാര് പറഞ്ഞു. തുടര്ന്നു നിയന്ത്രണം വിട്ട ബസ് കലുങ്കും മതിലും ഇടിച്ചു തകര്ത്ത് തെങ്ങിലിടിച്ചാണു നിന്നത്.
രാവിലെ ആയതിനാല് റോഡില് ആളുകളും വാഹനങ്ങളും കുറവായിരുന്നു. എന്നാല്, പരീക്ഷയ്ക്കു പോയ സ്കൂള് വിദ്യാര്ഥികളടക്കം ബസില് നിരവധി യാത്രക്കാരുണ്ടായിരുന്നു. ഇടിയുടെ ആഘാതത്തില് ബസ് നിശേഷം തകര്ന്നു. ഡ്രൈവര് ഓപ്പറേറ്റിങ് ഡോര് സംവിധാനവും തകരാറിലായതിനെത്തുടര്ന്ന് പരുക്കേറ്റവരെ പുറത്തിറക്കാന് താമസം നേരിട്ടു.
ഇതുവഴി സര്വീസ് നടത്തുന്ന വളയത്തില് ബസിലും മറ്റു വാഹനങ്ങളിലുമായി ഡ്രൈവറെയും പരുക്കേറ്റവരെയും പാലാ ജനറല് ആശുപത്രിയിലെത്തിച്ചെങ്കിലും ഡ്രൈവറുടെ ജീവന് രക്ഷിക്കാനായില്ല. പരുക്കേറ്റവരെ വിവിധ ആശുപത്രികളില് പ്രവേശിപ്പിച്ചു.
എസ്.എസ്.എല്.സി. പരീക്ഷ എഴുതാനുള്ള രണ്ടു വിദ്യാര്ഥികളടക്കം 10 പേരെ ഭരണങ്ങാനം മേരിഗിരി ആശുപത്രിയില് പ്രഥമ ശ്രുശ്രൂഷ നല്കി വിട്ടയച്ചു. പാലാ പോലീസും മോട്ടോര് വാഹന വകുപ്പും സ്ഥലത്തെത്തി പരിശോധന നടത്തി.
രാജേഷിന്റെ മൃതദേഹം പാലാ ജനറല് ആശുപത്രിയില് പോസ്റ്റ്മോര്ട്ടം നടത്തി. സംസ്കാരം ഇന്ന് രാവിലെ 11 ന് വീട്ടുവളപ്പില്. മാതാവ്: ലീലാമ്മ മുകളേല് (ഇടമറ്റം). ഭാര്യ അഞ്ജു എസ്.നായര് തിടനാട് ചാരാത്ത് കുടുംബാംഗം. മക്കള്: അനശ്വര, ഐശ്വര്യ (ഇടമറ്റം കെ.ടി.ജെ.എം. ഹൈസ്കൂള് വിദ്യാര്ഥികള്) സഹോദരന്: അംബ രാജീവ്.
