അഭിനേതാവ്, തിരക്കഥാകൃത്ത്, സംവിധായകൻ, നിർമ്മാതാവ് എന്നീ നിലകളില് ശ്രദ്ധിക്കപ്പെട്ട താരമാണ് പി.ശ്രീകുമാര്. 150 ലധികം മലയാള സിനിമകളില് സപ്പോര്ട്ടിംഗ് റോളുകളില് അഭിനയിച്ചിട്ടുള്ള താരം തന്റെ സ്വപ്നസിനിമയായ കര്ണ്ണന്റെ സ്ക്രിപ്റ്റ് എഴുതി പൂര്ത്തിയാക്കിയിട്ട് ഒരുപാട് വര്ഷങ്ങളായി. തിരക്കഥ സിനിമയാക്കാന് കാലതാമസം എടുക്കുന്നതിനുള്ള കാരണം സിനിമയിലേക്ക് നായക വേഷത്തിലേക്ക് ഒരു താരവും നിർമാതാവും എത്താത്തതാണ്. ഒരിടയ്ക്ക് മമ്മൂട്ടി കർണ്ണനായി അഭിനയിക്കുമെന്ന് റിപ്പോർട്ടുകള് ഉണ്ടായിരുന്നുവെങ്കിലും പിന്നീട് അതും പാതി വഴിയില് നിലച്ചു.
ഇപ്പോഴിതാ അടുത്തിടെ ഉണ്ണി മുകുന്ദൻ കർണ്ണന്റെ സ്ക്രിപ്റ്റ് ആവശ്യപ്പെട്ട് തന്നെ സമീപിച്ചിരുന്നുവെന്ന് വെളിപ്പെടുത്തുകയാണ് പി. ശ്രീകുമാർ. പല നിർമ്മാതാക്കള്ക്ക് മുന്നിലും കർണ്ണൻ വായിച്ച് കേള്പ്പിച്ചിട്ടുണ്ടെന്നും ശ്രീകുമാർ പറയുന്നു.
‘‘കർണ്ണൻ ഒന്ന് രണ്ട് വലിയ നിർമാതാക്കളുടെ അടുത്ത് കൊണ്ടുപോയി വായിക്കേണ്ടി വന്നിട്ടുണ്ട്. അതുപോലുള്ള ആളുകള് ഇടപെട്ട് കണക്ട് ചെയ്തിട്ടാണ് ഞാൻ വായിച്ച് കേള്പ്പിക്കാൻ പോയത്. അല്ലാതെ ഞാനായിട്ട് ഇടിച്ച് കേറി പോയതല്ല. അങ്ങനെ പോയ സമയത്ത് മോശമായി പെരുമാറിയ ഗ്രേറ്റ് പ്രൊഡ്യൂസേഴ്സ് വരെയുണ്ട്. ഒരിക്കല് ഒരു നിർമാതാവിനോട് കഥ പറയാൻ പോയി. ഞാൻ കഥ വായിക്കുമ്പോള് അയാള് ഡ്രസ്സ് ചെയ്യുകയായിരുന്നു.
അത് കഴിഞ്ഞ് അയാള് പെട്ടിയൊക്കെ പാക്ക് ചെയ്ത് എന്നേയും കൂട്ടി പുറത്തേക്കിറങ്ങി. ശേഷം കാറിലിരുന്ന് ബാക്കി കഥ വായിച്ച് കേള്പ്പിച്ചു. ഇങ്ങനെയുള്ള നിർമാതാക്കളുണ്ട്. മറ്റ് ചിലർ അഞ്ച് സീൻ വായിക്കുമ്പോഴേക്കും മതി നിർത്താൻ പറയും. ചിലരുടെ സംസാരത്തിന് ചുട്ട മറുപടി കൊടുത്ത് അടുത്ത സെക്കന്റില് ഓട്ടോ വിളിച്ച് തിരികെ പോന്നിട്ടുള്ള ആളുമാണ് ഞാൻ. ന്യൂജനറേഷന്റെ അടുത്ത് അധികം കഥ പറയാൻ ഞാൻ പോയിട്ടില്ല. അടുത്ത കാലത്ത് ഒരു സംഭവമുണ്ടായി. അതായിരുന്നു കർണൻ സിനിമയ്ക്ക് വേണ്ടിയുള്ള അവസാനത്തെ ശ്രമം. മാളികപ്പുറം ഹിറ്റായപ്പോള് വിജയരാഘവൻ ഉണ്ണി മുകുന്ദനോട് പറഞ്ഞു എന്റെ കയ്യില് ഇങ്ങനൊരു സ്ക്രിപ്റ്റുണ്ടെന്നും നിനക്ക് ചേരുന്നതാണെന്നും. ശേഷം ഉണ്ണി മുകുന്ദൻ എന്നെ വിളിച്ച് ചോദിച്ചു.
തിരുവനന്തപുരത്തെ വീട്ടില് വന്നാല് സ്ക്രിപ്റ്റ് വായിച്ച് കേള്പ്പിക്കാമെന്ന് ഞാൻ പറഞ്ഞു. കർണ്ണനിലെ ഡയലോഗ് ഡെലിവറിക്ക് പ്രാധാന്യമുള്ളതുകൊണ്ട് അത് വായിച്ച് കേള്പ്പിക്കണം. താളത്തില് വായിച്ച് കൊടുത്താലെ പവർ മനസിലാകൂ. അങ്ങനെ തിരുവനന്തപുരത്ത് വരുമ്പോള് വിളിക്കാമെന്ന് പറഞ്ഞ് ഉണ്ണി മുകുന്ദൻ വെച്ചു. അങ്ങനെ അയാള് തിരുവനന്തപുരത്ത് വന്നപ്പോള് ഞാൻ വിളിച്ചു.
ഞാൻ പ്രമോഷനുമായി ഓടി നടക്കുകയാണ്. വളരെ ബിസിയാണ്. എനിക്ക് ഇപ്പോള് അങ്ങോട്ട് വരാൻ കഴിയില്ല. അതുകൊണ്ട് ഞാൻ ആളെ അയക്കാം. സ്ക്രിപ്റ്റ് കൊടുത്തയക്കാൻ ആയിരുന്നു ഉണ്ണിയുടെ മറുപടി. എത്ര വലിയ നടനായാലും ആരും എന്നോട് ഇന്നേവരെ അങ്ങനെ പറഞ്ഞിട്ടില്ല. ഉണ്ണിയുടെ മറുപടി കേട്ടപ്പോള് എനിക്ക് വല്ലാതെയായി. ഒന്നുമില്ലെങ്കിലും 1966 മുതല് സിനിമയെന്ന് പറഞ്ഞ് ഇറങ്ങി നടന്നൊരാളെന്ന മാന്യതയെങ്കിലും ഇയാള് കാണിക്കണ്ടേ.
അയാളും ഞാനും ഒരുമിച്ച് അഭിനയിച്ചിട്ടുമുണ്ട്. ഫയർമാൻ ആയിരുന്നു സിനിമ. ആ മാന്യത പോലും കാണിക്കാതിരുന്നപ്പോള് ഞാൻ പറഞ്ഞു ഇത് കൊടുത്തയക്കാനുള്ള സ്ക്രിപ്റ്റ് അല്ല. നിങ്ങള്ക്ക് സമയം ഉണ്ടാകുമ്പോള് വാ അപ്പോഴേക്കും വേറെ ആർക്കും കൊടുത്തിട്ടില്ലെങ്കില് നിങ്ങള്ക്ക് വായിച്ച് കേള്പ്പിച്ച് തരാമെന്ന്. അതോടെ ഫോണ് കട്ട് ചെയ്തു. അയാള് ഇത് ചെയ്തിരുന്നുവെങ്കില് എവിടെ എത്തിയേനെ.
ഇവരെപ്പോയല്ല മമ്മൂട്ടി. ഒരു കഥാപാത്രമുണ്ടെന്ന് അറിഞ്ഞാല് അദ്ദേഹം പാഞ്ഞ് പിടിക്കും. മമ്മൂട്ടിയുടെ പാഷൻ ലെവലേശം അണഞ്ഞുപോയിട്ടില്ല. ആ ട്രെന്റൊന്നും ഇവരില് ഞാൻ കാണുന്നില്ല. അതുപോലെ ടൊവിനോ തോമസിന്റെ അടുത്ത് അങ്ങോട്ട് ഈ സ്ക്രിപ്റ്റുമായി പോയാല് അർഹിക്കുന്ന വില തരുമോ?. അതാണ് പോകാത്തത്. എനിക്ക് കാശ് തന്നാല് സ്ക്രിപ്റ്റ് ഞാൻ ആവശ്യക്കാർക്ക് കൊടുക്കും...’’ ശ്രീകുമാർ പറഞ്ഞു.
വീഡിയോ ശ്രദ്ധിക്കപ്പെട്ടതോടെ പി.ശ്രീകുമാറിനെ പിന്തുണച്ചും ഉണ്ണി മുകുന്ദനെ പിന്തുണച്ചും പലരും കമന്റുകളിടുന്നുണ്ട്. ‘ഇയാൾക്കു എക്സ്പീരിയൻസ് ഉണ്ടെന്ന് കരുതി എല്ലാ സ്ക്രിപ്റ്റ് എല്ലാ നടന്മാരും എഗ്രി ചെയ്യണം എന്നുണ്ടോ.. അതൊക്കെ അവരുടെ ചോയ്സ്, നല്ല അവസരങ്ങൾ കൊടുത്ത മമ്മൂട്ടിക് അവൻ പണിഞ്ഞു...പിന്നെയാണ് ചേട്ടൻ...’ എന്നതടക്കമാണ് കമന്റുകള്.
