കൊച്ചി: സിനിമാമേഖലയിലെ വ്യാജ കാസ്റ്റിങ് കോളിനെക്കുറിച്ചുള്ള വിവരങ്ങള് പങ്കുവച്ച് നടി ഷൈനി സാറ രംഗത്ത്. സുരേഷ് കുമാര് കാസ്റ്റിങ്സ് എന്ന ഏജന്സിയാണ് ജയിലറിലേക്ക് ഒരു വേഷമുണ്ടെന്നുപറഞ്ഞു തന്നെ ബന്ധപ്പെട്ടതെന്നു ഷൈനി ഫെയ്സ്ബുക്ക് വീഡിയോയില് പറഞ്ഞു. തുടര്ന്ന് താന് തെരഞ്ഞെടുക്കപ്പെട്ടെന്നു പറയുകയും ഒരു വീഡിയോ കാള് വഴി അഭിമുഖം നടത്തുകയും ചെയ്തു.
വളരെ മാന്യമായിട്ടാണ് അവര് പെരുമാറിയത്. തന്നെ തെരഞ്ഞെടുത്തെന്നു അറിയിച്ച് ഒരു ഇ-മെയിലും അവര് അയച്ചു. എന്നാല് അതിനുശേഷം അവര് തന്നോട് ആര്ട്ടിസ്റ്റ് കാര്ഡ് ഉണ്ടോയെന്നു ചോദിച്ചു. ഇല്ല എന്നുപറഞ്ഞപ്പോള് ആര്ട്ടിസ്റ്റ് കാര്ഡ് എടുക്കണമെന്നും അതിനായി 12,500 രൂപ അടയ്ക്കണമെന്നും പറഞ്ഞു. എന്നാല്, രണ്ടു ദിവസത്തെ സാവകാശം വേണമെന്നു പറഞ്ഞപ്പോള് പകുതി പൈസ ഇപ്പോള് അയക്കാന് അവര് പറഞ്ഞു. അതില് സംശയം തോന്നിയ താന് ലിജോമോളിനെയും മാല പര്വതിയെയും വിളിച്ചെങ്കിലും അവര് ഫോണ് എടുത്തിരുന്നില്ല. പിന്നീട് മാല പാര്വതി എന്നെ വിളിച്ച് ഇതു തട്ടിപ്പാണെന്നും അങ്ങനെ ഒരു ആര്ട്ടിസ്റ്റ് കാര്ഡ് ഇല്ലെന്നും പറഞ്ഞു.
കാസ്റ്റിങ് കോളിന്റെ എല്ലാ സ്ക്രീന് ഷോട്ടുകളും തന്റെ കൈയില് ഉണ്ടായിരുന്നു. അത് താന് മാലാ പാര്വതിക്ക് അയച്ചുകൊടുത്തു. മാല പാര്വതി ഉടന് തമിഴില് വര്ക്ക് ചെയ്യുന്ന തേനപ്പന് എന്ന ആളെ വിളിച്ചപ്പോള് ഇത്തരം ഒരു കാസ്റ്റിങ് നടന്നിട്ടില്ലെന്ന് അവര് പറഞ്ഞുവെന്നും ഷൈനി സാറ പറയുന്നു. നടി മാല പാര്വതിയുടെ ഫേസ്ബുക്ക് പേജ് വഴിയാണ് വീഡിയോ പുറത്തുവിട്ടത്.
