പത്തനംതിട്ട: എംഎല്എ സ്ഥാനം രാജിവെക്കില്ലെന്ന് യൂത്ത് കോണ്ഗ്രസ് നേതാവ് രാഹുല് മാങ്കൂട്ടത്തില്. കോണ്ഗ്രസ് എംഎല്എമാര്ക്കെതിരെ തന്നെ നേരത്തെ സമാന ആരോപണം വന്നപ്പോള് രാജിവെച്ചില്ലല്ലോയെന്നാണ് രാഹുല്പക്ഷത്തിന്റെയും വാദം. അതുകൊണ്ട് കീഴ്വഴക്കമല്ലാത്തതിനാല് രാഹുല് രാജിവെക്കേണ്ടതില്ലെന്ന അഭിപ്രായമാണ് പാര്ട്ടിക്കുള്ളിലുള്ളത്.
പത്തനംതിട്ടയിലെ വീട്ടിലുള്ള രാഹുല് ഉടന് തന്നെ മാധ്യമങ്ങളെ നേരില് കണ്ട് നിലപാട് വ്യക്തമാക്കിയേക്കും. വീട്ടില് സുരക്ഷ ഒരുക്കിയിട്ടുണ്ട്. ആരോപണം ഉയര്ന്നുവന്നതിന് പിന്നാലെ രാഹുല് യൂത്ത് കോണ്ഗ്രസ് അധ്യക്ഷസ്ഥാനം രാജിവെച്ചതിന് ശേഷം മാധ്യമങ്ങളെ കണ്ടിട്ടില്ല. രാഹുല് എംഎല്എ സ്ഥാനം രാജിവെക്കേണ്ടതില്ലെന്ന് നേരത്തെ തന്നെ കോണ്ഗ്രസ് നേതൃത്വം വ്യക്തമാക്കിയിരുന്നു. രാഹുലിനെതിരെ ആരോപണം ഉന്നയിക്കുന്നുവെന്നതല്ലാതെ പാര്ട്ടിയിലും പൊലീസിലും ഇതുവരെ പരാതികളൊന്നും വന്നിട്ടില്ലെന്നാണ് നേതാക്കളുടെ നിലപാട്.
സിപിഐഎം എംഎല്എമാര്ക്കെതിരെ ആരോപണമുണ്ടായപ്പോള് രാജിവെച്ചിട്ടില്ലെന്നും കോണ്ഗ്രസ് നേതാക്കള് പറയുന്നു. രാഹുല് മാങ്കൂട്ടത്തിലിനെതിരെ പാര്ട്ടിക്ക് ഒരു പരാതിയും വന്നിട്ടില്ലെന്ന് കേരളത്തിന്റെ ചുമതലയുള്ള എഐസിസി ജനറല് സെക്രട്ടറി ദീപാദാസ് മുന്ഷി മാധ്യമങ്ങളോട് വ്യക്തമാക്കിയിരുന്നു. രാഹുല് എംഎല്എ സ്ഥാനം രാജിവെക്കേണ്ടതില്ലെന്നും ദീപാദാസ് മുന്ഷി പറഞ്ഞിരുന്നു.
യുവ നേതാവിനെതിരെ മാധ്യമപ്രവര്ത്തകയും അഭിനേതാവുമായി റിനി ആന് ജോര്ജ് രംഗത്തെത്തിയതോടെയാണ് വിവാദങ്ങള്ക്ക് തുടക്കമായത്. യുവ നേതാവ് അശ്ലീല സന്ദേശം അയച്ചെന്നും ഫൈവ് സ്റ്റാര് ഹോട്ടലിലേക്ക് ക്ഷണിച്ചെന്നുമായിരുന്നു മാധ്യമപ്രവര്ത്തക പറഞ്ഞത്. തൊട്ടുപിന്നാലെ രാഹുലിനെതിരെ വിമര്ശനവുമായി എഴുത്തുകാരി ഹണി ഭാസ്കരനും രംഗത്തെത്തിയിരുന്നു. ഇതിന് പിന്നാലെയാണ് വിവാദത്തിന് മൂര്ച്ചകൂട്ടി ഗര്ഭഛിദ്രവുമായി ബന്ധപ്പെട്ട കാര്യത്തിലുള്ള ഫോണ് സംഭാഷണവും പുറത്തുവന്നത്.
