എന്ത് കാര്യത്തിലും വ്യത്യസ്തത കൊണ്ടുവരുന്നത് ആളുകള്ക്ക് ഏറെ ഇഷ്ടപ്പെടുന്ന ഒന്നാണ്. ഇത്തരത്തില് ജപ്പാനിലെ ടോക്യോയിലെ ഒരു മെയ്ഡ് കഫേയില് ഉപഭോക്താക്കള്ക്ക് വേണ്ടി ആരംഭിച്ച ഒരു പുതിയ ആശയമാണ് ഇപ്പോള് സോഷ്യല് മീഡിയയില് ശ്രദ്ധനേടുന്നത്. 'Cafe Where You Can Become a Maid' എന്ന കഫേയില്, സാധാരണ മെയ്ഡ് കഫേകളില് നിന്ന് വ്യത്യസ്തമായി ഉപഭോക്താക്കള്ക്കാണ് മെയ്ഡ് വേഷം ധരിച്ച് സ്റ്റാഫിനെ സേവിക്കാനുള്ള അവസരം നല്കുന്നത്. ഏകദേശം 4,000 യെന് ( ഏകദേശം 2,298 ഇന്ത്യന് രൂപ ) അടച്ച് 90 മിനിറ്റോളം നീളുന്ന ഈ പ്രത്യേക അനുഭവത്തിനായി നിരവധി പേര്, പ്രത്യേകിച്ച് പുരുഷന്മാര്, എത്തിച്ചേരുന്നുവെന്നാണ് റിപ്പോര്ട്ട്.
ജപ്പാനില് ഏറെ ജനപ്രിയമായ മെയ്ഡ് കഫേകളില് സാധാരണയായി യുവതികളാണ് മെയ്ഡ് വേഷം ധരിച്ച് ഉപഭോക്താക്കളെ സേവിക്കുന്നത്. എന്നാല്, ഈ കഫേയില് മാത്രം ആ രീതി തിരിച്ച് നടപ്പാക്കുന്നു. അതായത് ഇവിടെ ഉപഭോക്താവാണ് 'മെയ്ഡ്' ആയി മാറി കഫേയിലെ ജീവനക്കാരെ സേവിക്കുന്നത്. വ്യത്യസ്തമായ ഈ ആശയം സമൂഹ മാധ്യമങ്ങളിലൂടെയും പ്രാദേശിക മാധ്യമങ്ങളിലൂടെയും വൈറലായി മാറി. 'മറ്റുള്ളവരെ സേവിക്കുന്നതിലൂടെ എളിമയും വിനോദവും ഒരുമിച്ച് അനുഭവിക്കാന് സാധിക്കുന്നു' എന്നതാണ് ചില സന്ദര്ശകരുടെ അഭിപ്രായം.
കഫേയുടെ ഉടമസ്ഥര് പറയുന്നത്, ഇത് 'ലിംഗഭേദങ്ങളെ മറികടന്ന്, മെയ്ഡ് വേഷത്തിന്റെ സാംസ്കാരിക സൗന്ദര്യം ആഘോഷിക്കാനുള്ളൊരു അനുഭവം' ആണെന്നാണ്. ഈ ആശയം ഇപ്പോള് ജപ്പാനിലെ യുവാക്കളെയാണ് ഏറെ ആകര്ഷിച്ചിരിക്കുന്നത്. സമൂഹത്തില് നിലനില്ക്കുന്ന പരമ്പരാഗത ലിംഗധാരണകള്ക്ക് വെല്ലുവിളിയായി ഈ ആശയം കാണുന്നവരുമുണ്ട്. 'പുരുഷന്മാര്ക്ക് മെയ്ഡ് വേഷം ധരിക്കാനും ആ ഭാവത്തില് സ്വയം അവതരിപ്പിക്കാനും അവസരം ലഭിക്കുന്നത്, മനോഹരമായ അനുഭവം' ആണെന്നാണ് സമൂഹ മാധ്യമങ്ങളിലെ ചില അഭിപ്രായങ്ങള്. സംഗതി എന്താണെങ്കിലും ടോക്യോയിലെ ഈ 'മെയ്ഡ്'കഫേ, ഇപ്പോള് വിനോദ സഞ്ചാരികളുടെയും സാമൂഹ്യശാസ്ത്രജ്ഞരുടെയും പഠനവിഷയമായി മാറിയിരിക്കുകയാണ്.
