കഴിഞ്ഞ ഏതാനും നാളുകളായി രാജ്യത്തിന്റെ പലഭാഗത്തും തെരുവുനായ ശല്യം അതിരൂക്ഷമായി വരുകയാണ്. നിരവധിപേര്ക്കാണ് ഇവയുടെ ആക്രമണത്തില് ജീവന് നഷ്ടമാകുകയും ഗുരുതരമായി പരിക്കേല്ക്കുകയും ചെയ്തിട്ടുള്ളത്. ഇതിനിടയിലാണ് രാജസ്ഥാനിലെ ജയ്പൂരില് ഒരു നായയെ കെട്ടിയിട്ട് വൈദ്യുതാഘാതമേല്പ്പിച്ച് കൊലപ്പെടുത്തുന്നതിന്റെ ദൃശ്യങ്ങള് സമൂഹ മാധ്യമങ്ങളില് വ്യാപകമായി പ്രചരിച്ചുകൊണ്ടിരിക്കുന്നത്. മനുഷ്യത്വരഹിതമായ പ്രവര്ത്തിയെന്ന് സമൂഹ മാധ്യമ ഉപയോക്താക്കള് ഒന്നടങ്കം വിശേഷിപ്പിച്ച വീഡിയോ ദൃശ്യങ്ങള് വലിയ ചര്ച്ചകള്ക്കാണ് തിരികൊളുത്തിയിരിക്കുന്നത്. വീഡിയോ ദൃശ്യങ്ങളില് സംഭവത്തിന് സാക്ഷിയായ ഒരു മനുഷ്യന് ഇരുന്ന് അരുതെന്ന് പറഞ്ഞ് കരയുന്നതും കാണാം.
'StreetdogsofBombay' എന്ന ഇന്സ്റ്റാഗ്രാം അക്കൗണ്ടിലാണ് വീഡിയോ പങ്കുവെച്ചിട്ടുള്ളത്. വെള്ളിയാഴ്ച സുപ്രീം കോടതി പുറപ്പെടുവിച്ച ഉത്തരവിന്റെ ആദ്യ ഇരയാണ് ഈ നായയെന്ന് മൃഗാവകാശ പ്രവര്ത്തകര് പറഞ്ഞു. 'ക്രൂരമായ വിധിയുടെ ആദ്യ ഇര!' എന്ന ക്യാപ്ഷനോടെയാണ് ഈ വീഡിയോ പങ്കുവെച്ചിരിക്കുന്നത്. പൊതു ഇടങ്ങളില് നിന്നും പ്രത്യേകിച്ച് സ്കൂള്, ആശുപത്രികള്, മറ്റ് പൊതു ഇടങ്ങള് എന്നിവിടങ്ങളില് നിന്നും തെരുവ് നായ്ക്കളെ മാറ്റണമെന്ന് സുപ്രീം കോടതി കഴഞ്ഞ ദിവസത്തെ ഉത്തരവില് ആവശ്യപ്പെട്ടിരുന്നു.
സമൂഹ മാധ്യമ കുറിപ്പില് സംഭവത്തെക്കുറിച്ച് വിവരിച്ചിരിക്കുന്നത് ഇങ്ങനെയാണ്, ജയ്പൂരിലെ നിസ്സഹായനായ ഒരു തെരുവ് നായയെ കെട്ടിയിട്ട് 20 അടി ഉയരമുള്ള ഒരു ട്രാന്സ്ഫോര്മറില് എറിഞ്ഞ് വൈദ്യുതാഘാതം ഏല്പ്പിച്ച് കൊലപ്പെടുത്തി. നായയുടെ പരിചാരകനായിരുന്ന വ്യക്തി സങ്കടം സഹിക്കവയ്യാതെ കരയുന്നത് കാണാം. ഒരു ദേശീയ മാധ്യമങ്ങളും ഈ വാര്ത്ത റിപ്പോര്ട്ട് ചെയ്തില്ല. ഇതേസമയം ഒരു നായ, മനുഷ്യനെ കടിച്ച വാര്ത്ത ആയിരുന്നെങ്കില് എല്ലാ തലക്കെട്ടുകളിലും നിറയുമായിരുന്നു. ക്രൂരതയ്ക്ക് സാധുത ലഭിക്കുകയും അനുകമ്പ നിശബ്ദമാക്കപ്പെടുകയും ചെയ്യുമ്പോള് സംഭവിക്കുന്നത് ഇതാണ്' എന്നും കുറിപ്പില് പറയുന്നു.
