ചെന്നൈ: ശശികല ജയിലിലായതിന് പിന്നാലെ പളനി സ്വാമിയും പനീര്ശെല്വവും മുഖ്യമന്ത്രി സ്ഥാനത്തേക്ക് അവകാശവാദം ഉന്നയിക്കുമ്പോള് തമിഴ്നാട് രാഷ്ട്രീയം കൂടുതല് കലങ്ങിമറിയുന്നു. പനീര്ശെല്വത്തെ നീക്കുന്ന കാര്യത്തില് സുപ്രീംകോടതി വിധി വരുന്നത് വരെ നിശബ്ദത പാലിച്ച ഗവര്ണര് വിദ്യാസാഗര് റാവു ഇനിയുമെന്തിനാണ് മൗനം അവലംബിക്കുന്നതെന്നാണ് തമിഴ്നാട് ഉറ്റു നോക്കുന്നത്.
നിയമസഭയില് രഹസ്യബാലറ്റ് വേണമെന്നാണ് പനീര്ശെല്വത്തിന്റെ ക്യാമ്പ് ആവശ്യപ്പെടുന്നത്. ഇതിനൊപ്പം പ്രശ്നങ്ങള് അവസാനിപ്പിക്കാനുള്ള ശ്രമങ്ങളും നടത്തുന്നുണ്ട്. ബുധനാഴ്ച രാത്രിയില് രണ്ടു ക്യാമ്പുകളിലെയും ആള്ക്കാര് സര്ക്കാര് രൂപീകരണം ആവശ്യപ്പെട്ട് രാജ്ഭവനില് ഗവര്ണറെ കണ്ടിരുന്നു. പത്തു നേതാക്കളും കൂട്ടത്തില് ഉണ്ടായിരുന്നു. കൂടിക്കാഴ്ച 25 മിനിറ്റ് നീണ്ടു നില്ക്കുകയും ചെയ്തു. ഇത് ഭൂരിപക്ഷത്തിന്റെ പ്രശ്നം മാത്രമാണെന്നും പളനിസ്വാമിയെ സര്ക്കാര് ഉണ്ടാക്കാന് ഗവര്ണര് ക്ഷണിക്കണമെന്നും പാര്ട്ടി നേതാക്കള് വ്യക്തമാക്കി.
എന്നാല് ഗവര്ണര് ഇക്കാര്യത്തില് ഒരു അഭിപ്രായവും രേഖപ്പെടുത്തിയിട്ടില്ല. എന്നാല് തങ്ങള്ക്ക് 124 എംഎല്എമാരും അവര്ക്ക് എട്ട് എംഎല്എമാരുമാണ് ഉള്ളത്. എട്ടാണോ 124 ആണോ വലുതെന്നും ഇത് ചിന്തിക്കണമെന്നും പറഞ്ഞു. രാത്രി 8.30 യോടെ മറ്റ് ഒമ്പതുപേരുമായി പനീര്ശെല്വവും ഗവര്ണറെ കാണാനെത്തി. ഈ കൂടിക്കാഴ്ചയും 25 മിനിറ്റോളം നീണ്ടുനിന്നു. സര്ക്കാര് രൂപീകരിക്കാന് ആവശ്യമായ പിന്തുണയുണ്ടെന്ന് കാണിച്ച് ഗവര്ണറോഡ് പനീര്ശെല്വത്തെ വിളിക്കാന് ആവശ്യപ്പെട്ടതായി പനീര്ശെല്വത്തിന്റെ ക്യാമ്പും വ്യക്തമാക്കിയിട്ടുണ്ട്.
