ബോളിവുഡിന്റെ എക്കാലത്തെയും പ്രിയതാരമാണ് മനീഷ കൊയ്രാള. നേപ്പാളിലെ പ്രമുഖ രാഷ്ട്രീയ കുടുംബത്തിൽ നിന്ന് സിനിമയിലെത്തിയ താരം ഹിന്ദി ചലച്ചിത്രങ്ങളില് മാത്രമല്ല തെന്നിന്ത്യയിലും ആരും കൊതിക്കുന്ന കഥാപാത്രങ്ങളെ അവതരിപ്പിച്ചാണ് പ്രേക്ഷകഹൃദയം കീഴടക്കിയത്. ഇന്നും താരത്തിന്റെ അഭിനയമികവ് എടുത്തുകാട്ടുന്ന കഥാപാത്രങ്ങള് എവര്ഗ്രീനായി പ്രേക്ഷകമനസ്സിലുണ്ട്.
പക്ഷേ കരിയറിൽ കത്തിനിൽക്കുന്ന സമയത്താണ് താരം അർബുദ ബാധിതയായത്. എന്നാലതിനൊന്നും തളരാതെ, ലൈംലൈറ്റില് നിന്ന് ചെറിയൊരു ഇടവേളയെടുത്ത് താരം അര്ബുദവുമായി പൊരുതി. ഇപ്പോള് ജീവിതത്തിന്റെ രണ്ടാംഘട്ടം, ഓരോ നിമിഷവും ആഘോഷിച്ചു ജീവിക്കുകയാണ് ഈ 55 വയസ്സുകാരി. ഈയടുത്ത് സഞ്ജയ് ലീല ബൻസാലിയുടെ ‘ഹീരാമണ്ടി’ എന്ന സീരീസിലെ മനീഷയുടെ അഭിനയം ഏറെ പ്രശംസ നേടിയിരുന്നു.
ഇപ്പോഴിതാ വാർദ്ധ്യക്യത്തിന്റെ സൗന്ദര്യം പങ്കിടുകയാണ് താരം. തന്റെ സാൾട്ട് ആൻഡ് പെപ്പർ ലുക്ക് അനായാസമായി ആസ്വദിക്കുന്ന ചിത്രങ്ങളാണ് താരം സോഷ്യല് മീഡിയയില് പങ്കിട്ടിരിക്കുന്നത്. മൃദുവായ സ്വർണ്ണ വെളിച്ചത്തിൽ കുളിച്ചും സ്റ്റേറ്റ്മെന്റ് ആഭരണങ്ങൾ ധരിച്ചുള്ള സൺ കിസ്സ്ഡ് ചിത്രങ്ങളാണ് താരം പങ്കിട്ടിരിക്കുന്നത്. പാസ്റ്റൽ പിങ്ക് സാരിയും സാറ്റിൻ ഷർട്ടും ധരിച്ച താരത്തിന്റെ നീളം കുറഞ്ഞ, ഇളം നരച്ച മുടിയാണ് ഒരു പ്രത്യേക രാജകീയ ആകർഷണം നൽകുന്നത്. സുഹൃത്ത് ഫറാ ഖാൻ അലിയുടെ ലേബലിൽ നിന്നുള്ള സ്റ്റേറ്റ്മെന്റ് പേൾ ഗോൾഡൻ ജുംകകളും താരം ധരിച്ചിട്ടുണ്ട്. സൂര്യപ്രകാശത്തിൽ തിളങ്ങുന്ന ഒരു കാർ സെൽഫിയാണിത്. ചിത്രത്തില് മനീഷയുടെ മുഖത്ത് മൃദുവായ സ്വർണ്ണ വെളിച്ചം പതിക്കുന്നത് കാണാം. ‘‘എല്ലാ പ്രശ്നങ്ങളെയും പുഞ്ചിരിയോടെ മറക്കൂ...എന്റെ അതിപ്രതിഭാധനനായ സുഹൃത്ത്, ഫറാ ഖാൻ അലിയുടെ ഈ അതിശയകരമായ കമ്മലുകൾ എനിക്ക് വളരെ ഇഷ്ടപ്പെട്ടു...’’ എന്ന ക്യാപ്ഷന് നല്കിയാണ് താരം ചിത്രം പങ്കിട്ടിരിക്കുന്നത്.
വളരെ വേഗത്തില് താരത്തിന്റെ ചിത്രങ്ങള് ആരാധകര് ഏറ്റെടുത്തു. ചുവന്ന ഹൃദയങ്ങളും ഊഷ്മളമായ ആശംസകളും കൊണ്ട് കമന്റ് ബോക്സുകള് ആരാധകര് സ്നേഹത്താല് നിറച്ചു. 90-കളിലെ താരത്തിന്റെ നരച്ച മുടിയാണ് പ്രധാന സംസാര വിഷയമായത്. ‘ഇന്ത്യൻ ബ്രിഡ്ജർട്ടണിലെ ക്വീന് ഷാർലറ്റ്’ എന്നും കമന്റുകളില് കുറിച്ചവരുണ്ട്. ‘ആ മോതിരവും കമ്മലുകളും നിങ്ങളും മനോഹരമാണ്, നിത്യഹരിതസുന്ദരി, നിങ്ങൾ എന്നേക്കും ചെറുപ്പമായി തുടരും, പുഞ്ചിരിക്കും, ഞങ്ങൾക്കെല്ലാവർക്കും വേണ്ടി സന്തോഷിക്കും, എന്റെ എക്കാലത്തെയും പ്രിയപ്പെട്ട നായികമാരിൽ ഒരാൾ, ഞാൻ നിങ്ങളെ സ്നേഹിക്കുന്നു മാഡം...’ എന്നതടക്കമാണ് കമന്റുകള്.
