ഇന്ത്യൻ നഗരങ്ങളിലെ ഉയർന്ന ജീവിതച്ചെലവുകളെക്കുറിച്ചുള്ള ചർച്ചകൾ പലപ്പോഴും സോഷ്യൽ മീഡിയയിൽ സജീവമാകാറുണ്ട്. ഇപ്പോഴിതാ , ബെംഗളൂരുവിൽ താമസിക്കുന്ന 22-കാരിയായ ശ്രദ്ധ സൈനി പങ്കുവെച്ച 'ജെൻ സിയുടെ ചെലവുകൾ' സംബന്ധിച്ച വീഡിയോയാണ് സമൂഹമാധ്യമങ്ങളിൽ വലിയ തരംഗമുണ്ടാക്കുന്നത്. സ്വന്തം മാനസികാരോഗ്യത്തിനും വ്യക്തിഗത പരിചരണത്തിനും മുൻഗണന നൽകുന്ന ഒരു ജീവിതരീതിയാണ് ശ്രദ്ധ വീഡിയോയിലൂടെ പങ്കുവയ്ക്കുന്നത്. മില്ലേനിയലുകൾക്ക് ഒരുപക്ഷേ അസ്വാഭാവികമായി തോന്നാവുന്ന, എന്നാൽ പുതിയ തലമുറ സ്വാഭാവികമായി കാണുന്ന ചെലവുകളെക്കുറിച്ചാണ് 'ജെൻ സി കോസ്റ്റ്' എന്ന പേരിൽ ശ്രദ്ധ സംസാരിക്കുന്നത്.
തന്റെ മാസവരുമാനത്തിൽ വലിയൊരു ഭാഗം സ്വയം പരിപാലനത്തിനായി ശ്രദ്ധ നീക്കിവയ്ക്കുന്നു. പ്രതിമാസം 10,000 രൂപ തെറാപ്പിക്കായും, പൂക്കൾ വാങ്ങുന്നതിനായി 2,000 രൂപയും, ഞായറാഴ്ചകളിലെ ബ്രഞ്ച് ഡേറ്റുകൾക്കായി 2,000 രൂപയും താരം ചെലവഴിക്കുന്നു. ഇതുകൂടാതെ മസാജ്, പെഡിക്യൂർ തുടങ്ങിയ സൗന്ദര്യ പരിചരണങ്ങൾക്കായി 5,000 രൂപയും, നഖങ്ങളുടെ സംരക്ഷണത്തിനായി 3,000 രൂപയും മാറ്റിവയ്ക്കുന്നു. ഗൈഡഡ് ജേർണലുകൾ, വിഷൻ ബോർഡുകൾ തുടങ്ങിയവയ്ക്കായി വേറെയും പണം ചെലവാക്കുന്നുണ്ടെന്ന് ശ്രദ്ധ വ്യക്തമാക്കുന്നു.
ശ്രദ്ധയുടെ ഈ വീഡിയോ സമൂഹമാധ്യമങ്ങളിൽ വലിയ വാദപ്രതിവാദങ്ങൾക്കാണ് വഴിതെളിച്ചത്. മാനസികാരോഗ്യത്തിന് പ്രാധാന്യം നൽകുന്നതിനെ ഒരു വിഭാഗം പ്രശംസിക്കുമ്പോൾ, ഇതൊരു അനാവശ്യ ധൂർത്താണെന്നാണ് മറ്റൊരു വിഭാഗത്തിന്റെ വാദം. മില്ലേനിയലുകൾ കഠിനാധ്വാനത്തിന് മുൻഗണന നൽകിയപ്പോൾ, ജെൻ സി തലമുറ സ്വന്തം സന്തോഷത്തിനും മാനസിക ഉല്ലാസത്തിനും പണം ചെലവഴിക്കാൻ മടിക്കുന്നില്ല എന്നതും ഈ ചർച്ചകളിലെ പ്രധാന നിരീക്ഷണമാണ്. വരുമാനത്തെക്കുറിച്ച് പരാമർശിക്കാത്തതിനാൽ ഈ കണക്കുകൾ പ്രായോഗികമാണോ എന്ന ചോദ്യവും ഉയരുന്നുണ്ട്
