ഓമനത്തമുള്ള മൃഗങ്ങളെ വീട്ടില് വളര്ത്താന് ഇഷ്ടപ്പെടുന്നവര്ക്കിടയില് നായ്ക്കളും പൂച്ചകളും കഴിഞ്ഞാല് അപൂര്വ്വമായി മറ്റു ചില അതിഥികളും എത്താറുണ്ട്. അത്തരത്തില് അപ്രതീക്ഷിതമായി വീടിന്റെ ഭാഗമാകുന്ന ജീവികള് മനുഷ്യരുമായി പെട്ടെന്ന് ഇണങ്ങാറുണ്ട്. ഇപ്പോള് സോഷ്യല് മീഡിയയില് വൈറലാകുന്നത് ഒരു കൊച്ചു മിടുക്കിയും വീട്ടിലെ അണ്ണാന്കുഞ്ഞും തമ്മിലുള്ള രസകരമായ കളിയുടെ വീഡിയോയാണ്. നാലു വയസ്സുകാരിയായ പെണ്കുട്ടിക്ക് പിന്നാലെ വീടുമുഴുവന് ഓടിനടക്കുന്ന അണ്ണാന്കുഞ്ഞിന്റെ ദൃശ്യങ്ങള് കാഴ്ചക്കാരുടെ മനസ്സ് നിറയ്ക്കുകയാണ്.
വീടിനുള്ളില് അങ്ങോട്ടുമിങ്ങോട്ടും പായുന്ന അണ്ണാന്കുഞ്ഞിന് പിടികൊടുക്കാതെ ഓടിനടക്കുകയാണ് ഈ കുട്ടി. ഇടയ്ക്ക് ഓടിവന്ന് അച്ഛന്റെ കൈകളില് തൂങ്ങിയാടുന്നതും ഒടുവില് ഓടിത്തളര്ന്ന കുട്ടിയുടെ തോളില് അണ്ണാന്കുഞ്ഞ് പമ്മി ഇരിക്കുന്നതും വീഡിയോയില് കാണാം. ഒറ്റനോട്ടത്തില് പേടിച്ച് ഓടുകയാണെന്ന് തോന്നുമെങ്കിലും, അവര് തമ്മിലുള്ള ഗാഢമായ സൗഹൃദമാണ് ഇതിലൂടെ വെളിപ്പെടുന്നത്. മഴ നനഞ്ഞു വന്നതിന് അണ്ണാന്കുഞ്ഞിനെ ഈ കൊച്ചുമിടുക്കി വഴക്കുപറയുന്ന മറ്റൊരു വീഡിയോയും ഇതേ അക്കൗണ്ടില് കാണാന് സാധിക്കും.
കുട്ടികളുള്ള വീടുകളില് ഇത്തരം ജീവികള് വളരെ വേഗത്തില് ഇണങ്ങാറുണ്ട്. അവര്ക്ക് കളിക്കാനും സംസാരിക്കാനും ഒരു ഉറ്റ സുഹൃത്തിനെ കിട്ടിയ സന്തോഷമാണ് ഇത് നല്കുന്നത്. അണ്ണാന് പോലുള്ള ജീവികള്ക്ക് തങ്ങളെ ഉപദ്രവിക്കില്ലെന്ന് ബോധ്യപ്പെട്ടാല് അവ മനുഷ്യരുമായി പെട്ടെന്ന് കൂട്ടാകും. മനോഹരമായ ഈ സൗഹൃദ വീഡിയോ നിമിഷങ്ങള്ക്കകം തന്നെ സോഷ്യല് മീഡിയ ഏറ്റെടുത്തു കഴിഞ്ഞു.
