ലക്നൗ: ഉത്തര്പ്രദേശിലെ തൊഴില് മേഖലയില് വിപ്ലവകരമായ മാറ്റങ്ങള് സംഭവിക്കുന്നതായി മുഖ്യമന്ത്രി യോഗി ആദിത്യനാഥ്. കഴിഞ്ഞ ഒന്പത് വര്ഷത്തിനിടെ സംസ്ഥാനത്തെ വനിതാ തൊഴില് പങ്കാളിത്തം മൂന്നിരട്ടിയായി വര്ധിച്ചുവെന്ന് അദ്ദേഹം വ്യക്തമാക്കി. ഗൊരഖ്പൂരിലെ മദന് മോഹന് മാളവ്യ സാങ്കേതിക സര്വകലാശാലയില് സംഘടിപ്പിച്ച ചടങ്ങില് സംസാരിക്കുകയായിരുന്നു അദ്ദേഹം.
സംസ്ഥാനത്തെ സ്ത്രീകളുടെ തൊഴില് പങ്കാളിത്ത നിരക്കില് വലിയ പുരോഗതിയാണ് രേഖപ്പെടുത്തിയിരിക്കുന്നത്. 2017-ന് മുന്പ് വെറും 12 ശതമാനമായിരുന്ന വനിതാ തൊഴില് പങ്കാളിത്തം കുതിച്ചുയര്ന്ന ഇപ്പോള് 36.1 ശതമാനമായെന്ന് അദ്ദേഹം പറഞ്ഞു. ഭയരഹിതമായി ജോലിക്ക് പോകാന് കഴിയുന്ന സാഹചര്യം ഒരുങ്ങിയതാണ് ഈ നേട്ടത്തിന് കാരണമെന്നും അദ്ദേഹം കൂട്ടിച്ചേര്ത്തു.
സര്ക്കാര് നടപ്പാക്കിയ 'മിഷന് ശക്തി' പോലുള്ള സുരക്ഷാ പദ്ധതികള് സ്ത്രീകള്ക്ക് ആത്മവിശ്വാസം നല്കി. തൊഴിലെടുക്കുന്ന സ്ത്രീകള്ക്കായി പ്രധാന നഗരങ്ങളില് ഹോസ്റ്റലുകള് നിര്മ്മിക്കുമെന്ന് മുഖ്യമന്ത്രി പ്രഖ്യാപിച്ചു. പവര് ഗ്രിഡ് കോര്പ്പറേഷന്റെ സഹകരണത്തോടെ നിര്മ്മിക്കുന്ന 144 ബെഡുകളുള്ള പെണ്കുട്ടികളുടെ ഹോസ്റ്റലിന് അദ്ദേഹം തറക്കല്ലിട്ടു.
വ്യാവസായിക രംഗത്തെ സംസ്ഥാനത്തിന്റെ വളര്ച്ചയെക്കുറിച്ചും മുഖ്യമന്ത്രി പരാമര്ശിച്ചു. ഇന്ത്യയില് ഉല്പാദിപ്പിക്കപ്പെടുന്ന മൊബൈല് ഫോണുകളുടെ 55 ശതമാനവും ഉത്തര്പ്രദേശില് നിന്നാണെന്നത് അഭിമാനകരമായ നേട്ടമാണെന്ന് അദ്ദേഹം ചൂണ്ടിക്കാട്ടി. ബിരുദധാരികളെ സൃഷ്ടിക്കുന്നതിന് പകരം വിപണിക്കും വ്യവസായങ്ങള്ക്കും ആവശ്യമായ നൈപുണ്യമുള്ള പ്രൊഫഷണലുകളെ വാര്ത്തെടുക്കാനാണ് സര്ക്കാര് ലക്ഷ്യമിടുന്നത്. സാങ്കേതിക വിദ്യാഭ്യാസത്തിനും നൈപുണ്യ വികസന പദ്ധതികള്ക്കും പ്രത്യേക മുന്ഗണന നല്കുമെന്നും പറഞ്ഞു.
