തിരുവനന്തരപുരം: സംസ്ഥാന നിയമസഭാ തിരഞ്ഞെടുപ്പിന്റെ പരസ്യപ്രചാരണത്തിന് ഇന്ന് തിരശ്ശീല വീഴുന്നു. വൈകുന്നേരം 6 മണിയോടെ പരസ്യമായ എല്ലാ പ്രചാരണ പരിപാടികളും അവസാനിപ്പിക്കും. ആവേശകരമായ പരസ്യപ്രചാരണത്തിന് അന്ത്യം കുറിച്ച് വലിയ ആള്ക്കൂട്ടങ്ങളും വാദ്യമേളങ്ങളുമായി കൊട്ടിക്കലാശം ആഘോഷമാക്കാനുള്ള ഒരുക്കത്തിലാണ് മുന്നണികളെല്ലാം.
സംസ്ഥാനത്തെ 140 മണ്ഡലങ്ങളിലും പരസ്യപ്രചാരണത്തിന് സമാപ്തിയാകുന്നതോടെ പ്രധാന നഗരങ്ങളിലെല്ലാം കൊട്ടിക്കലാശത്തിന്റെ ആവേശത്തിലാണ് പ്രവര്ത്തകര്. പോളിംഗിന് മുന്നോടിയായുള്ള 48 മണിക്കൂര് നിശബ്ദ പ്രചാരണ കാലയളവില് സ്ഥാനാര്ത്ഥികള്ക്ക് നേരിട്ട് വോട്ടര്മാരെ കാണാം, എന്നാല് പൊതുയോഗങ്ങളോ മൈക്ക് പ്രചാരണങ്ങളോ അനുവദിക്കില്ല.
അടുത്ത 48 മണിക്കൂര് പരസ്യപ്രചാരണം അവസാനിക്കുന്നതോടെ തിരഞ്ഞെടുപ്പ് കമ്മീഷന് കടുത്ത നിയന്ത്രണങ്ങളാണ് ഏര്പ്പെടുത്തിയിരിക്കുന്നത്. ടെലിവിഷന്, റേഡിയോ, സോഷ്യല് മീഡിയ പ്ലാറ്റ്ഫോമുകള് എന്നിവ വഴി തിരഞ്ഞെടുപ്പ് പരസ്യങ്ങളോ പ്രചാരണങ്ങളോ നടത്താന് പാടില്ല.
പത്രങ്ങളില് രാഷ്ട്രീയ പരസ്യങ്ങള് നല്കുന്നതിന് മീഡിയ സര്ട്ടിഫിക്കേഷന് ആന്ഡ് മോണിറ്ററിംഗ് കമ്മിറ്റിയുടെ മുന്കൂര് അനുമതി നിര്ബന്ധമാണ്. ഏപ്രില് 9 നാണ് പോളിംഗ് ദിനം. മെയ് 4 ന് വോട്ടെണ്ണലും ഫലപ്രഖ്യാപനവും നടക്കും.
സംസ്ഥാനത്തെ 140 മണ്ഡലങ്ങളിലും എല്.ഡി.എഫ്, യു.ഡി.എഫ്, എന്.ഡി.എ മുന്നണികള് തമ്മില് ശക്തമായ ത്രികോണ മത്സരമാണ് അരങ്ങേറുന്നത്. ഏപ്രില് ഒന്പതിന് ജനം വിധിയെഴുതുമെങ്കിലും ഫലമറിയാന് അടുത്ത മാസം നാല് വരെ കാത്തിരിക്കേണ്ടി വരും.
