ഉത്തര്പ്രദേശിലെ ഫറൂഖാബാദില് മഹീന്ദ്ര ഥാര് പാര്ക്ക് ചെയ്യുന്നതിനിടെയുണ്ടായ അപകടത്തില് 70 കാരിക്ക് ദാരുണാന്ത്യം. വീടിനുള്ളിലെ പാര്ക്കിംഗ് സ്ഥലത്ത് വാഹനം കയറ്റാന് കൊച്ചുമകനെ സഹായിക്കുന്നതിനിടെയാണ് ദാരുണ സംഭവം. പാര്ക്കിംഗിനിടെ ഹാന്ഡ് ബ്രേക്ക് ഇടുന്നതില് വന്ന പിഴവാണ് വാഹനം പിന്നിലേക്ക് ഉരുളാന് കാരണമായതെന്ന് കരുതപ്പെടുന്നു.
പോലീസ് പറയുന്നതനുസരിച്ച്, വ്യാഴാഴ്ച വൈകുന്നേരം 8:30 ഓടെ, 70 വയസ്സുള്ള സരള കത്യാര് എന്ന സ്ത്രീ തന്റെ കൊച്ചുമകനെ വാഹനം പാര്ക്ക് ചെയ്യാന് സഹായിക്കുകയായിരുന്നു. വീടിനുള്ളിലെ പാര്ക്കിംഗ് ലോട്ടില് ഒരു മഹീന്ദ്ര ഥാര് പാര്ക്ക് ചെയ്യുന്നതിനിടെയാണ് അപകടം. സിസിടിവി ദൃശ്യങ്ങളില്, കൊച്ചു മകന് എസ്യുവി വീടിനടുത്തേക്ക് മാറ്റിയിടുന്നത് കാണാം. അതേസമയം മുത്തശ്ശി ഗേറ്റിന് അടുത്ത് നില്ക്കുകയും ഗേറ്റ് തുറന്ന് പിടിച്ച് കൊച്ചുമകന് വാഹനം കയറ്റിയിടാന് സഹായിക്കുന്നതും കാണാം. വാഹനം പൂര്ണമായും ഗേറ്റ് കടന്ന് ഉള്ളിലേക്ക് കയറിയതിന് ശേഷം മുത്തശ്ശി ഗേറ്റ് അടയ്ക്കാന് ശ്രമിക്കുന്നതിനിടെ വാഹനം പിന്നീലേക്ക് ഉരുണ്ടുവന്നു. ഈ സമയം ഇരുവങ്ങളിലേക്ക് ഓടാന് സാധിക്കാതെ വന്ന മുത്തശ്ശി വാഹനത്തോടൊപ്പം മുന്നോട്ട് നീങ്ങുകയും റോഡിന് മറുവശത്തുള്ള മതിലില് തട്ടി നിക്കുന്നു. തൊട്ട് പിന്നാലെ വാഹനം ഇവരുടെ ശരീരത്തില് അമര്ന്ന് അവര് താഴെ വീഴുന്നതും ഈ സമയം കൊച്ച് മകന് ഓടിവരുന്നതും വീഡിയോയില് കാണാം.
സംഭവത്തിന് പിന്നാലെ കൊച്ചുമകനെ പോലീസ് മനഃപൂര്വ്വമല്ലാത്ത നരഹത്യയ്ക്ക് കസ്റ്റഡിയിലെടുത്തു. മുന് ആരോഗ്യ പ്രവര്ത്തകയായ സരള കത്യാര് കുടുംബത്തോടൊപ്പമാണ് താമസിച്ചിരുന്നത്. കുടുംബം ഇതുവരെ ഔദ്യോഗികമായി പരാതി നല്കിയിട്ടില്ലെങ്കിലും രേഖാമൂലമുള്ള റിപ്പോര്ട്ട് ലഭിച്ചാല് കൂടുതല് നടപടികള് സ്വീകരിക്കുമെന്ന് പോലീസ് അറിയിച്ചു.
WTF did I just see 😲
A driverless Thar took someone's life.
Always put the car in 1st gear and then apply the handbrake after parking 🙏🏻 pic.twitter.com/bYw3k18WZ9— Lakshay Mehta (@lakshaymehta08) April 5, 2026
