കൃഷ്ണദാസ് മുരളി സംവിധാനം ചെയ്യുന്ന ഭരതനാട്യം 2: മോഹിനിയാട്ടം എന്ന സിനിമയെക്കുറിച്ച് സോഷ്യല് മീഡിയയില് കുറിപ്പ് പങ്കുവെച്ച് സംവിധായകന് തരുണ് മൂര്ത്തി. ഈ ചിത്രം കണ്ടിട്ട് ചിരി നിര്ത്താനായില്ലെന്നും 2 മണിക്കൂര് 20 മിനിറ്റ് നീണ്ടുനില്ക്കുന്ന രസകരമായ യാത്രയാണ് ഭരതനാട്യം 2: മോഹിനിയാട്ടം എന്ന സിനിമയെന്നും തരുണ് കുറിച്ചു.
എല്ലാവരും കാണേണ്ട ഒരു സിനിമയാണ് ഭരതനാട്യം 2: മോഹിനിയാട്ടം എന്നും ഈ സിനിമയ്ക്ക് തിയറ്ററില് നിറഞ്ഞ് സദസ്സ് പ്രതീക്ഷിക്കാമെന്നും അദ്ദേഹം കൂട്ടിച്ചേര്ത്തു. സിനിമയുടെ പോസ്റ്റര് പങ്കുവെച്ചുകൊണ്ടാണ് ഫെയ്സ്ബുക്ക് പോസ്റ്റ് പങ്കുവെച്ചിരിക്കുന്നത്.
‘സാധാരണയായി റിലീസ് ചെയ്യുന്നതിന് മുമ്പ് ഞാന് സിനിമകളെക്കുറിച്ച് എഴുതാറില്ല. പക്ഷേ ഇതെന്നെശരിക്കും ആകര്ഷിച്ചു. പലപ്പോഴും ഞാന് ചിരി നിര്ത്താന് കഴിയാതെ ചിരിച്ചുകൊണ്ടിരുന്നു. ഒരു യഥാര്ഥ ഡാര്ക്ക് കോമഡി. ഭരതനും കുടുംബവും നിങ്ങളെ 2 മണിക്കൂര് 20 മിനിറ്റ് നീണ്ടുനില്ക്കുന്ന രസകരമായ യാത്രയിലേക്ക് കൊണ്ടുപോകുന്നു. തീര്ച്ചയായും കാണേണ്ട ചിത്രമാണിത്. ഈ സിനിമയ്ക്ക് നറിഞ്ഞ സദസ്സ് പ്രതീക്ഷിക്കാം, ഇത് തിയറ്ററിലെ മുഴുവന് ആളുകളെയും പ്രധാന നിമിഷങ്ങളില് പൊട്ടിച്ചിരിപ്പിക്കുന്ന തരം സിനിമയാണ്. ശ്രദ്ധിക്കുക, ഇതൊരു ഫീല് ഗുഡ് ഫാമിലി സിനിമയല്ല, പൂര്ണമായും യുക്തിയില്ലാത്ത ഡാര്ക്ക് കോമഡിയാണ്. ശരിയായ മാനസികാവസ്ഥയോടെ തിയറ്ററില് ചെല്ലുക, ശേഷം ഹൃദയം നിറഞ്ഞ ചിരി ചിരിക്കുക ’തരുണ് മൂര്ത്തി കുറിച്ചു.
സൈജു കുറുപ്പിന്റെ 150 ാം ചിത്രം എന്ന പ്രത്യേകതയും മോഹിനിയാട്ടത്തിനുണ്ട്. കൃഷ്ണദാസ് മുരളിയും വിഷ്ണു ആര് പ്രദീപും ചേര്ന്നാണ് ചിത്രത്തിന്റെ രചന നിര്വഹിക്കുന്നത്. ചിത്രം എപ്രില് 10 ന് തിയറ്ററുകളിലെത്തും.
