ആലപ്പുഴ: ജി. സുധാകരനെയും എ.ഐ.സി.സി. ജനറല് സെക്രട്ടറി കെ.സി. വേണുഗോപാലിനെയും അധിക്ഷേപിച്ച് മന്ത്രി സജി ചെറിയാന് നടത്തിയ പ്രതികരണം അമ്പലപ്പുഴയിലും ചെങ്ങന്നൂരിലും എല്.ഡി.എഫ്. പരാജയം ഉറപ്പിച്ചതിനു തെളിവാണെന്നു കെ.പി.സി.സി. വൈസ് പ്രസിഡന്റും കായംകുളത്തെ യു.ഡി.എഫ്. സ്ഥാനാര്ഥിയുമായ എം. ലിജു.
'കെ.സി. വേണുഗോപാല് അദ്ദേഹത്തിന്റെ കടമയാണ് നിര്വഹിക്കുന്നത്. മുന്കാലങ്ങളില് കെ.ആര്. ഗൗരിയമ്മയ്ക്കും എം.വി. രാഘവനും സി.പി.എമ്മില്നിന്ന് അവഗണനയും അധിക്ഷേപവും നേരിട്ടപ്പോള് അവര്ക്കു യു.ഡി.എഫ്. രാഷ്ട്രീയ പിന്തുണ നല്കിയിരുന്നു.
അതുപോലെ ജി. സുധാകരനെയും പാര്ട്ടി മാറ്റിനിര്ത്തിയപ്പോള് അഭയം നല്കുകമാത്രമാണ് കെ.സി. വേണുഗോപാലും എ.ഐ.സി.സിയും ചെയ്തത്. കെ.സി. വേണുഗോപാലും ജി. സുധാകരനും കൃഷ്ണപിള്ള സ്മാരകം കത്തിച്ചതിനെക്കുറിച്ചു പറഞ്ഞതിനു പാര്ട്ടി കൃത്യമായ മറുപടിനല്കുന്നില്ല. തെരഞ്ഞെടുപ്പിനു മുമ്പു പറഞ്ഞാല് കൂടുതല് വിവരങ്ങള് പുറത്തുവരുമോ എന്ന ഭയമുണ്ടായിരുന്നോയെന്നു സംശയിക്കണം.
സജി ചെറിയാന് പറഞ്ഞതുപോലെ കടലില് ചാടേണ്ടത് ആരാണെന്നു നാലിനറിയാം. സജി ചെറിയാനും പിണറായിയും കടലിലെ തിരമാലകള്ക്കൊപ്പം നീന്തത്തക്ക രീതിയില് നീന്തല് പഠിക്കണം. മുഖ്യമന്ത്രി എറണാകുളംകാരന് ആകണമെന്നു ഡി.സി.സി. പ്രസിഡന്റ് മുഹമ്മദ് ഷിയാസ് പറഞ്ഞത് പ്രാദേശിക വികാരവും താത്പര്യവും കണക്കിലെടുത്താകാം. ഇഷ്ടമുള്ളവര് മുഖ്യമന്ത്രിയാകണമെന്ന് എല്ലാവര്ക്കും ആഗ്രഹം കാണുമല്ലോ. ഹൈക്കമാന്ഡാണ് ഇതില് തീരുമാനമെടുക്കേണ്ടത്'-ലിജു പറഞ്ഞു.
