ജനാധിപത്യത്തിന്റെ മഹോത്സവമെന്ന് നാം കൊട്ടിഘോഷിക്കുന്ന തെരഞ്ഞെടുപ്പ് ദിനത്തില് കേരളത്തിന്റെ വിവിധ ഭാഗങ്ങളില് നിന്ന് പുറത്തുവന്ന ചില വാര്ത്തകള് അങ്ങേയറ്റം ആശങ്കാജനകവും ലജ്ജിപ്പിക്കുന്നതുമാണ്. വോട്ടര് പട്ടികയിലെ ക്രമക്കേടുകളും ഉദ്യോഗസ്ഥരുടെ അനാസ്ഥയും രാഷ്ട്രീയ പാര്ട്ടികളുടെ വഴിവിട്ട നീക്കങ്ങളും ചേര്ന്ന് ജനാധിപത്യത്തിന്റെ അന്തസ്സത്തയെത്തന്നെ വെല്ലുവിളിക്കുന്ന കാഴ്ചയാണ് നാം കാണുന്നത്. പറവൂര്, ചവറ, കളമശേരി, പയ്യന്നൂര് തുടങ്ങി സംസ്ഥാനത്തിന്റെ വിവിധ മണ്ഡലങ്ങളില് റിപ്പോര്ട്ട് ചെയ്യപ്പെട്ട കള്ളവോട്ട് പരാതികള് നിസ്സാരമായി കാണാനാവില്ല. വിദേശത്തോ ആശുപത്രിയിലോ കഴിയുന്ന പൗരന്റെ വോട്ട് മറ്റൊരാള് രേഖപ്പെടുത്തുന്നതും, വ്യാജ തിരിച്ചറിയല് കാര്ഡുകള് ഉപയോഗിച്ച് വോട്ട് ചെയ്യാന് എത്തുന്നതും നമ്മുടെ തെരഞ്ഞെടുപ്പ് സംവിധാനത്തിന്റെ വിശ്വാസ്യതയ്ക്കേറ്റ കടുത്ത പ്രഹരമാണ്. കോഴിക്കോട്ടും പയ്യന്നൂരിലും കള്ളവോട്ടിന് ശ്രമിച്ചവര് പിടിയിലായ വാര്ത്തകള് സൂചിപ്പിക്കുന്നത് ഇത് ഒറ്റപ്പെട്ട സംഭവങ്ങളല്ല, മറിച്ച് ആസൂത്രിതമായ നീക്കങ്ങളാണെന്നാണ്.
പാലക്കാട് മണ്ഡലത്തില് ഉയര്ന്നുവന്ന പണവും സാരിയും വിതരണം ചെയ്തെന്ന ആരോപണങ്ങള് കേരളീയ രാഷ്ട്രീയ ധാര്മികതയുടെ അധഃപതനത്തെയാണ് വെളിപ്പെടുത്തുന്നത്. വോട്ട് എന്നത് പണം കൊടുത്തു വാങ്ങാവുന്ന ഒരു ചരക്കായി മാറുമ്പോള്, അവിടെ ജനഹിതമല്ല മറിച്ച് പണക്കൊഴുപ്പാണ് വിജയിക്കുന്നത്. ഇതിനൊപ്പം കണ്ണൂരില് റിപ്പോര്ട്ട് ചെയ്യപ്പെട്ട അക്രമസംഭവങ്ങള് നമ്മുടെ തെരഞ്ഞെടുപ്പ് സംസ്കാരത്തിന് കരിനിഴല് വീഴ്ത്തുന്നു. സ്ഥാനാര്ഥികളെ ബൂത്തില് തടയുന്നതും ഏജന്റുമാരെ മര്ദിക്കുന്നതും കുത്തിപ്പരിക്കേല്പ്പിക്കുന്നതും ഒരു പരിഷ്കൃത സമൂഹത്തിന് ഒട്ടും ചേര്ന്നതല്ല. ആശയങ്ങള് കൊണ്ട് പൊരുതേണ്ടവര് ആയുധങ്ങള് കൊണ്ട് വോട്ടിനെ നേരിടാന് ശ്രമിക്കുന്നത് ജനാധിപത്യത്തെ അട്ടിമറിക്കലാണ്.
ബൂത്തുകള്ക്ക് പരിസരത്ത് സംഘം ചേരുന്നതും വോട്ടര്മാരെ ഭയപ്പെടുത്തുന്ന രീതിയിലുള്ള ആള്ക്കൂട്ട ഇടപെടലുകളും ജനാധിപത്യപരമായ സംവാദങ്ങള്ക്കോ സ്വതന്ത്രമായ വോട്ടിങ്ങിനോ ഒട്ടും ഗുണകരമല്ല. രാഷ്ട്രീയ പാര്ട്ടികള് തങ്ങളുടെ ശക്തി പ്രകടിപ്പിക്കേണ്ടത് ബൂത്തിന് പുറത്തെ ആള്ബലത്തിലൂടെയല്ല, മറിച്ച് തങ്ങള് മുന്നോട്ടുവയ്ക്കുന്ന ആശയങ്ങളിലൂടെയും വികസന കാഴ്ചപ്പാടുകളിലൂടെയുമാകണം. എന്നാല്, പലപ്പോഴും വോട്ടെടുപ്പ് കേന്ദ്രങ്ങള് സംഘര്ഷഭരിതമാകുന്നതും നിസ്സാര കാര്യങ്ങളുടെ പേരില് പോലീസും രാഷ്ട്രീയ പ്രവര്ത്തകരും തെരുവില് ഏറ്റുമുട്ടുന്നതും വോട്ടര്മാരില് ഭീതിയുണ്ടാക്കാനേ ഉപകരിക്കൂ. ഈ സംഭവങ്ങളൊക്കെ സൂചിപ്പിക്കുന്നത് നമ്മുടെ തെരഞ്ഞെടുപ്പ് സംസ്കാരം ഇപ്പോഴും പക്വതയാര്ജ്ജിച്ചിട്ടില്ല എന്ന വസ്തുതയാണ്.
തെരഞ്ഞെടുപ്പ് എന്നത് നാടിന്റെ ഭാവി നിര്ണയിക്കുന്ന പവിത്രമായ പ്രക്രിയയാണ്. കള്ളവോട്ട് ചെയ്യുന്നവര്ക്കും അതിന് ഒത്താശ ചെയ്യുന്ന ഉദ്യോഗസ്ഥര്ക്കും രാഷ്ട്രീയ ഗുണ്ടകള്ക്കുമെതിരേ മാതൃകാപരമായ ശിക്ഷാ നടപടികള് ഉറപ്പാക്കണം. ജനാധിപത്യത്തിന്റെ മഹത്വം വോട്ടുകളുടെ മൂല്യമാണ്. ആ മൂല്യം സംരക്ഷിക്കാന് വോട്ടര്മാരും രാഷ്ട്രീയ പ്രസ്ഥാനങ്ങളും ഭരണകൂടവും ഒരേപോലെ ജാഗ്രത കാട്ടേണ്ടതുണ്ട്. ജനാധിപത്യത്തിന്റെ വിശുദ്ധി കാത്തുസൂക്ഷിക്കാന് ഓരോ പൗരനും അകക്കണ്ണ് തുറക്കേണ്ട നിമിഷമാണിത്.
