ഇന്ത്യയിലെ ആദ്യത്തെ ഡി+ എസ്യുവി (D+ SUV) ആയ എംജി മജസ്റ്റര് ഇപ്പോള് പുഷ്പം പോലെ ഗിന്നസ് വേള്ഡ് റെക്കോര്ഡും നേടിയിരിയ്ക്കുകയാണ്. റെയില് പാളത്തിലൂടെ ലോകത്തിലെ ഏറ്റവും ഭാരമേറിയ ട്രെയിന് വലിച്ച എസ്യുവി എന്ന നേട്ടമാണ് മജസ്റ്റര് സ്വന്തമാക്കിയത്. ഗുഡ്സ് ലോക്കോമോട്ടീവ്, പാസഞ്ചര് കോച്ചുകള് എന്നിവയടക്കം 406.4 ടണ് ഭാരമാണ് വാഹനം വലിച്ചത്. ജമ്മു കശ്മീരിലെ കാക്കാപോറ, അവന്തിപുര റെയില്വേ സ്റ്റേഷനുകള്ക്കിടയിലുള്ള ട്രാക്കിലായിരുന്നു ഈ പ്രകടനം അരങ്ങേറിയത്.
ഏകദേശം 300 അടി ദൂരമാണ് എംജി മജസ്റ്റര് ഇത്രയും വലിയ ഭാരം വഹിച്ചുകൊണ്ട് സഞ്ചരിച്ചത്. ഗിന്നസ് റെക്കോര്ഡിന് ആവശ്യമായ 400 ടണ് ഭാരം, 100 അടി ദൂരം എന്നീ മാനദണ്ഡങ്ങളെ മജസ്റ്റര് അനായാസം മറികടന്നു. ഈ പരീക്ഷണത്തിനായി ഉപയോഗിച്ചത് എഞ്ചിനിലോ ഡ്രൈവ് ട്രെയിനിലോ മാറ്റങ്ങള് വരുത്താത്ത സാധാരണ പ്രൊഡക്ഷന് വാഹനമായിരുന്നു. വാഹനത്തിന്റെ ട്രാക്ഷന് മാനേജ്മെന്റ്, ടോര്ക്ക് ഡെലിവറി, സ്ട്രക്ചറല് ഇന്റഗ്രിറ്റി എന്നിവ പരിശോധിക്കപ്പെട്ടിരുന്നു. സ്വതന്ത്ര ഓട്ടോമോട്ടീവ് വിദഗ്ധരുടെ മേല്നോട്ടത്തിലാണ് ഗിന്നസ് പ്രോട്ടോക്കോള് പ്രകാരം എല്ലാ നടപടിക്രമങ്ങളും പൂര്ത്തിയാക്കിയത്.
മജസ്റ്ററിന്റെ 2.0 ലിറ്റര് ട്വിന് ടര്ബോ ഡീസല് എഞ്ചിനാണ് ഈ കരുത്തുറ്റ പ്രകടനത്തിന് പിന്നില് പ്രവര്ത്തിച്ചത്. 215.5 PS പവറും 478.5 Nm ടോര്ക്കും ഉത്പാദിപ്പിക്കാന് ശേഷിയുള്ളതാണ് ഈ എഞ്ചിന്. കൃത്യമായ നിയന്ത്രണത്തോടും സ്ഥിരതയോടും കൂടിയാണ് എസ്യുവി ഇത്രയും ദൂരം ട്രെയിന് വലിച്ചുനീക്കിയത് എന്ന് വിദഗ്ധര് സാക്ഷ്യപ്പെടുത്തുന്നു. എംജി മജസ്റ്ററില് മികച്ച ഇന്ധനക്ഷമതയും സുഗമമായ യാത്രയും ഉറപ്പാക്കാന് 8-സ്പീഡ് ഓട്ടോമാറ്റിക് ട്രാന്സ്മിഷനാണ് നല്കിയിരിക്കുന്നത്. കൂടാതെ, ഓഫ്-റോഡ് യാത്രകള്ക്കായി ട്രിപ്പിള് ഡിഫറന്ഷ്യല് ലോക്കുകള് (ഫ്രണ്ട്, റിയര്, സെന്റര്), അഡ്വാന്സ്ഡ് 4WD സിസ്റ്റം എന്നിവയും ഒരുക്കിയിട്ടുണ്ട്. 219 mm ഗ്രൗണ്ട് ക്ലിയറന്സും 810 mm വാട്ടര് വേഡിംഗ് കപ്പാസിറ്റിയും ഇതിനുണ്ട്.
എസ്യുവിയുടെ പ്രീ-ബുക്കിംഗ് നിലവില് 41,000 രൂപയ്ക്ക് ഔദ്യോഗിക വെബ്സൈറ്റ് വഴി ആരംഭിച്ചു കഴിഞ്ഞു. ആദ്യ 3,000 ഉപഭോക്താക്കള്ക്കായി 'എംജി കംപ്ലീറ്റ് പീസ് ഓഫ് മൈന്ഡ്' പ്രോഗ്രാം കമ്പനി വാഗ്ദാനം ചെയ്യുന്നു. ഇതില് 5 വര്ഷത്തെ അണ്ലിമിറ്റഡ് വാറണ്ടി, റോഡ് സൈഡ് അസിസ്റ്റന്സ്, 5 സൗജന്യ സര്വീസുകള് എന്നിവ ഉള്പ്പെടുന്നു. കരുത്തും ആധുനിക സാങ്കേതികവിദ്യയും ആഗ്രഹിക്കുന്ന ഉപഭോക്താക്കള്ക്കായിട്ടാണ് മജസ്റ്റര് രൂപകല്പ്പന ചെയ്തിരിക്കുന്നത്. ഈ ഗിന്നസ് റെക്കോര്ഡ് നേട്ടം മജസ്റ്ററിന്റെ വിപണിയിലെ സ്വീകാര്യത വര്ദ്ധിപ്പിക്കുമെന്ന് ജെഎസ്ഡബ്ല്യു എംജി മോട്ടോര് ഇന്ത്യ മാനേജിംഗ് ഡയറക്ടര് അനുരാഗ് മെഹ്റോത്ര പറഞ്ഞു.
